مەملەكەت باسشىسى قاسىم-جومارت توقاەۆ وتكەن جىلى جاريالانعان «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى قازاقستان حالقىنا جولداۋىندا قازىرگى زاماندا باسەكەگە قابىلەتتىلىكتىڭ باستى فاكتورىنىڭ ءبىرى بارىنشا تسيفرلاندىرۋ ەكەنىنە نازار اۋدارىپ: «...وتاندىق ءىت-سەكتوردى دامىتىپ, كۇشەيتە ءتۇسۋ دە ماڭىزدى. ەلىمىزگە جاس, ءبىلىمدى ءارى ىنتالى ماماندار كەرەك. تسيفرلاندىرۋ جونىندەگى ۇلتتىق جوبانىڭ اياسىندا كەمىندە 100 مىڭ جوعارى بىلىكتى ءىت مامان دايارلاۋ قاجەت», دەگەن بولاتىن. Astana IT ۋنيۆەرسيتەتىنىڭ بۇگىنگى اياق الىسى, جۇزەگە اسىرىپ وتىرعان ءىس-شارالارى پرەزيدەنت ايقىنداعان باسىمدىقپەن تولىقتاي ۇندەسۋدە.
استانامىزدىڭ اسەم دە كورىكتى ورنى – ەكسپو اۋماعىندا ورنالاسقان ۋنيۆەرسيتەت العاشقى وقۋ جىلىن IT سالاسىنىڭ 6 ءبىلىم باعدارلاماسى بويىنشا 600-دەن استام ستۋدەنتتى قابىلداۋدان باستاسا, قازىرگى ۋاقىتتا باكالاۆريات بويىنشا 11 ءبىلىم باعدارلاماسى بويىنشا 3 مىڭنان استام بولاشاق مامان ءتالىم الۋدا. الەمدىك ترەندكە سايكەس كەلەتىن وقۋ باعدارلامالارى مەملەكەتتىك ستاندارتتا قارالعان بىلىكتىلىكپەن قاتار, IT كومپانيالارىن اشۋ مەن بيزنەستى باسقارۋ بويىنشا زاماناۋي ورنىقتى كاسىپكەرلىك قۇزىرەتتەرىن جاساقتايدى.
بۇعان قوسا ۋنيۆەرسيتەت جانىنان كوللەدج اشىلىپ, 25 وقۋشى ءىت سالاسى بويىنشا ورتا ارنايى كاسىپتىك ءبىلىم الۋدا. كوللەدج شاكىرتتەرى ءۇشىن قىسقارتىلعان بىرىكتىرىلگەن باعدارلامالار بويىنشا وقۋعا مۇمكىندىك جاسالعان. بۇل – تۇلەكتەر كاسىبي بىلىكتىلىك پەن داعدىلارعا تولى ساپالى بىلىممەن ەڭبەك نارىعىنا شىعادى دەگەن ءسوز.
ۋنيۆەرسيتەتتە وقىتۋ IT كومپانيالارىنىڭ پراكتيكالىق مىندەتتەرىن ەسكەرە وتىرىپ, جوبالىق ءتاسىلدىڭ وزىق ادىستەرى مەن تەحنولوگيالارى نەگىزىندە جۇزەگە اسىرىلادى. بۇل ستۋدەنتتەردىڭ الەمدە قالىپتاسقان وزىق تەحنولوگيالارمەن تانىسۋ ارقىلى جوعارى بىلىكتى مامان رەتىندە كەز كەلگەن ماڭىزدى مىندەتتى شەشۋلەرىنە مۇمكىندىك بەرەرى ءسوزسىز.
تاعى ءبىر جەتىستىگىمىز – 2021-2022 وقۋ جىلىنان باستاپ جاساندى ينتەللەكت, ۇلكەن دەرەكتەر جانە تسيفرلى ترانسفورماتسيالانۋ سالاسىندا كاسىبي ءبىلىم بەرۋگە باعىتتالعان «ەسەپتەۋ عىلىمدارى», «دەرەكتەردى قولدانبالى تالداۋ» جانە «جوبالاردى باسقارۋ» ءبىلىم باعدارلامالارى بويىنشا جاستار ماگيستراتۋرادا ءبىلىم الۋدا. بۇدان باسقا ەلىمىزدە العاش رەت Smart city جانە FinTech بىرلەسكەن ماگيسترلىك باعدارلامالارى دايىندالدى. بيىل كومپيۋتەرلىك عىلىمدار باعدارلاماسى بويىنشا PhD دوكتورانتۋراعا قابىلداۋ باستالادى. بۇل – ءبىلىم الۋشىعا ەڭبەك نارىعىندا ەرەكشە سۇرانىسقا يە الدىڭعى قاتارلى پانارالىق ءبىلىم الۋعا مۇمكىندىك بەرەدى.
بولاشاق مامانداردىڭ ساپالىلىعى – ءبىلىم الۋشىنىڭ ءىت سالاسىنا بەيىمدىلىگىنە تىكەلەي بايلانىستى. سوندىقتان, جوعارىدا اتالعان ماماندىقتاردىڭ ەرەكشەلىگىنە بايلانىستى تالاپكەرلەر اراسىنان اعىلشىن تىلىنە جەتىك, ۇزدىك, دارىندى جاستاردى ىرىكتەۋ – وقۋ ورنىمىزدىڭ باستى قاعيداسى. وسىعان وراي Astana IT ۋنيۆەرسيتەتىنىڭ بولاشاق ستۋدەنتتەرىن ەلىمىزدىڭ مەكتەپ, كوللەدج وقۋشىلارىنا ارنالعان وليمپيادالار, عىلىمي-يننوۆاتسيالىق جوبالار بايقاۋلارى ارقىلى ىرىكتەپ, ولارعا ىشكى گرانتتاردى تاعايىنداۋ داستۇرگە اينالعان. اتاپ ايتقاندا, 9-12 سىنىپ وقۋشىلارىنا ارنالعان باعدارلامالاۋ بويىنشا AITU iCode وليمپياداسىنا 13 مىڭنان استام وقۋشى, مەكتەپ, كوللەدج تۇلەكتەرىنە ارنالعان اعىلشىن ءتىلى بويىنشا AITU iQyn وليمپياداسىنا 3 مىڭعا جۋىق ادام قاتىسقان. بۇدان باسقا ۋنيۆەرسيتەتكە وقۋعا ءتۇسۋ ءۇشىن تالاپكەرلەر ارنايى AITU Excellence Test قابىلداۋ ەمتيحاندارىن تاپسىرادى. سونداي-اق جالپى ورتا ءبىلىم بەرەتىن مەكتەپتەردىڭ ءبىتىرۋشى سىنىپ وقۋشىلارى ءۇشىن ۋنيۆەرسيتەتكە ءتۇسۋ بويىنشا قولايلى جاعداي جاساۋ ماقساتىندا Foundation باعدارلاماسى اشىلعان. Samsung كورپوراتسياسىمەن بىرلەستىكتە اشىلعان IT-مەكتەپتە 7-11 سىنىپ وقۋشىلارى باعدارلامالاۋ تىلدەرى, روبوتتەحنيكا, ت.ب. IT سالالارى بويىنشا قوسىمشا ءبىلىم السا, ۋنيۆەرسيتەتىمىزدىڭ قۇزىرەتتىلىكتەر جانە جەتىلدىرۋ ورتالىعىندا مەملەكەتتىك قىزمەتشىلەر, پەداگوگتەر, بيزنەس وكىلدەرى تسيفرلى داعدىلارىن جەتىلدىرەدى.
وسىلايشا, Astana IT ۋنيۆەرسيتەتى قوسىمشا, تەحنيكالىق جانە كاسىپتىك, جوعارى جانە جوعارىدان كەيىنگى ءبىلىم, ەرەسەكتەرگە ءبىلىم بەرۋ جۇيەلەرىن قامتۋ ارقىلى ۇزدىكسىز ءبىلىم بەرۋ تۇجىرىمداماسىن بەلسەندى جۇزەگە اسىرىپ وتىرعانىن اتاپ وتكىمىز كەلەدى.
ۋنيۆەرسيتەت ءبىلىم جانە عىلىم مينيسترلىگى جانە باسقا دا ۇيىمدارمەن بىرلەسىپ, ستۋدەنتتەر اراسىندا باعدارلامالاۋ, كيبەرقاۋىپسىزدىك جانە باسقا دا تاقىرىپتار بويىنشا Bilim Hackathon, AITUHackday, AITU Project Challenge, Rubik CTF سىندى رەسپۋبليكالىق وليمپيادالار, حاكاتوندار, جوبالار بايقاۋىن ۇيىمداستىرۋدا. اتالعان بايقاۋلاردىڭ باستى يدەياسى – ناقتى جوبالاردى ورىنداۋ داعدىسى مەن كوماندالىق قاسيەتتەردى دامىتۋ جانە بولاشاق ماماندارىمىزدى جۇمىسپەن قامتۋ. ستۋدەنتتەر جوبامەن جۇمىس بارىسىندا كومانداعا بىرىگىپ, كەزەڭ-كەزەڭمەن تاپسىرمالاردى ورىندايدى. ءبىر سوزبەن ايتقاندا, بايقاۋ ارقىلى «جۇزدەن جۇيرىك, مىڭنان تۇلپار» انىقتالىپ, ەڭ باستىسى, جەڭىمپازدار وزدەرىنىڭ شەشىمدەرىن جۇزەگە اسىرۋعا مۇمكىندىك الادى جانە تۇراقتى جۇمىسقا ورنالاسادى. ءبىر عانا مىسال, وسى جىلدىڭ ناۋرىز ايىندا جۇلدەلىك قورى 3,5 ملن تەڭگەنى قۇراعان «BILIM Hackathon-2022» IT بايقاۋى ءوتتى. وعان ەلىمىزدىڭ بارلىق وڭىرىنەن 107 كوماندا قاتىسىپ, Astana IT ۋنيۆەرسيتەتى ستۋدەنتتەرى جۇلدەلى ورىنداردى يەلەندى. وسى ارادا جوعارىدا اتالعان بايقاۋلاردى ۇيىمداستىرۋمەن قاتار, ءبىلىم الۋشىلاردى دايىنداپ, باپتاعان ۇستازدار قاۋىمىنىڭ دا ەڭبەگى زور ەكەنىن اتاپ وتكىمىز كەلەدى.
قازاقتىڭ اسا كورنەكتى اعارتۋشى-پەداگوگى ىبىراي ءالتىنساريننىڭ «ماعان جاقسى مۇعالىم بارىنەن دە قىمبات, ويتكەنى مۇعالىم – مەكتەپتىڭ جۇرەگى», دەگەن ءسوزى بار. Astana IT ۋنيۆەرسيتەتى ءۇشىن دە پروفەسسورلىق-وقىتۋشىلىق قۇرامنىڭ جوعارى بىلىكتىلىگى – باستى باسىمدىقتاردىڭ ءبىرى. وقىتۋشىلاردىڭ جارتىسىنا جۋىعىن عىلىم دوكتورى, كانديداتى جانە PhD دوكتورلارى قۇراسا, قالعانى – ماگيسترلەر جانە ءوندىرىس ماماندارى. ۋنيۆەرسيتەتتە شەتەلدىك پروفەسسورلارمەن قاتار, پرەزيدەنتتىك «بولاشاق» جانە باسقا دا باعدارلامالار اياسىندا اقش, ۇلىبريتانيا, المانيا جانە باسقا دا شەت مەملەكەتتەردىڭ وزىق جوعارى وقۋ ورىندارىن تامامداعان ۇستازدار ءدارىس وقيدى. ولاردىڭ ىشىندە رەسپۋبليكا بويىنشا «جوو-نىڭ ۇزدىك وقىتۋشىسى» رەتىندە تانىلعاندارى دا بار. ۋنيۆەرسيتەت ءوز كەزەگىندە ۇستازدار ەڭبەگىنىڭ لايىقتى باعالانۋىن باستى نازاردا ۇستايدى. وسى ورايدا ادامي رەسۋرستاردىڭ ساپاسىن ودان ءارى جاقسارتۋ ماقساتىندا بىرقاتار زاماناۋي ىنتالاندىرۋ تەتىكتەرى قولدانىلاتىنىن ايتا كەتكەن ءجون: ميسسيامىزعا سايكەس پروفەسسورلىق قۇرامعا ساباق بەرۋمەن قاتار, عىلىمي جۇمىستارمەن ناتيجەلى اينالىسۋ ءۇشىن دەڭگەيلىك جۇكتەمە بەرۋدى كوزدەيتىن نەگىزگى كورسەتكىشتەر جۇيەسى ەنگىزىلىپ, ءبىلىم نارىعىنداعى ەڭ جوعارعى جالاقى تولەنەدى.
عىلىمي-زەرتتەۋلەرگە ەرەكشە ءمان بەرۋدىڭ ناتيجەسىندە عالىمدارىمىز سوڭعى ءبىر جارىم جىلدا كومپيۋتەرلىك عىلىم, ينجەنەريا, ماتەماتيكا, شەشىم قابىلداۋ جونىندەگى عىلىم سالالارى بويىنشا Scopus/Web of Science بازاسىنا ەنەتىن باسىلىمداردا عىلىمي ماقالالار جاريالادى. بۇل وقىتۋشىلىق-پروفەسسورلىق قۇرامنىڭ زياتكەرلىك الەۋەتىنىڭ وتە جوعارى ەكەنىن كورسەتەدى. ءبىزدىڭ ۇجىم قازاقستان جوو-لارى اراسىندا ەڭ «جاسى» ەكەنىن ايتا كەتكەن ءجون (ورتا جاس مولشەرى – 32 جاس).
عىلىم قىزمەتكەرلەرى كۇنى ۋنيۆەرسيتەت عالىمدارى جۇرگىزىپ وتىرعان عىلىمي-زەرتتەۋ جۇمىستارىنا قىسقاشا توقتالعىمىز كەلەدى. مەملەكەت باسشىسى جوعارىدا اتالعان جولداۋىندا «عىلىمدى دامىتۋ – اسا ماڭىزدى باسىمدىق, ءبىلىم بەرۋ مەن عىلىم سالاسىنىڭ الدىندا تۇرعان كەزەك كۇتتىرمەس اۋقىمدى مىندەت – ۋاقىت تالابىنا ساي بولۋمەن قاتار, ارقاشان ءبىر ادىم الدا ءجۇرىپ, تىڭ جاڭالىقتار ۇسىنا ءبىلۋ ەكەنىن» اتاپ ايتقان بولاتىن.
Astana IT ۋنيۆەرسيتەتى شەتەلدىك عىلىمي ورتالىقتارمەن تىعىز ىنتىماقتاستىقتا جانە مەملەكەتتىك ورگاندار مەن يندۋستريالىق ارىپتەستەردىڭ قولداۋىمەن ءوز قىزمەتىن «تسيفرلى قازاقستان» مەملەكەتتىك باعدارلاماسىن ىسكە اسىرۋ اياسىندا تۇراقتى عىلىمي-يننوۆاتسيالىق ەكوجۇيەنى قالىپتاستىرۋعا باعىتتاۋدا.
ۋنيۆەرسيتەتتىڭ ءبىلىم بەرۋ ىسىندە ءبىلىم بەرۋ باعدارلامالارى قۇرىلىمىنىڭ جاڭا جۇيەسى مەن ونى جۇزەگە اسىراتىن IFI تۇجىرىمداماسى ەنگىزىلگەن. اتالعان تۇجىرىمداما ءۇش قۇرامداس بولىكتەن – اسپاپتىق, ىرگەلى, يندۋستريالىق (وندىرىستىك) بولىكتەردەن تۇرادى:
- اسپاپتىق (Instrumental) بولىك اقپاراتتىق-كوممۋنيكاتسيالىق تەحنولوگيالار داعدىلارى مەن قۇزىرەتتەرىن زەردەلەۋدى, نەگىزگى تىلدەر مەن باستاپقى ەڭبەك قىزمەتىنە جىلدام كىرۋ ءۇشىن باعدارلامالاۋ تەحنولوگيالارىن قامتيدى. مىسالى, كۇردەلى ەمەس باعدارلامالاردىڭ, ءموبيلدى قوسىمشالاردىڭ كودىن جازۋ نەمەسە كوماندادا شاعىن جوبالاردى ورىنداۋ;
- ىرگەلى (Fundamental) بولىك كومپيۋتەرلىك عىلىمدار تەورياسى بويىنشا بازالىق جانە بەيىندىك پاندەردەن جانە ويلاۋ لوگيكاسى ابستراكتسياسىنىڭ ىرگەلى نەگىزى مەن دەڭگەيىن قالىپتاستىرۋعا جانە كۇردەلى قۇرىلىمدار مەن زياتكەرلىك جۇيەلەردى ۇسىنۋعا ارنالعان اقپاراتتىق جۇيەلەردەن تۇرادى. مىسالى, ماتەماتيكالىق لوگيكانى, ديسكرەتتى ماتەماتيكانى, الگوريتمدەر مەن وپەراتسيالىق جۇيەلەر تەورياسىن زەرتتەۋ ءبىلىم الۋشىلارعا جاڭا پانارالىق سالالاردا كۇردەلى جوبالاردى ورىنداۋعا جانە جاساندى ينتەللەكتىنى قولدانۋ وزىق تەحنولوگيالاردى قۇرۋعا, عىلىمي-زەرتتەۋ جۇمىستارىنا قاتىسۋعا مۇمكىندىك بەرەدى;
- يندۋستريالىق (Industrial) بولىك قازىرگى زامانعى تەحنولوگيالار ستەكتەرىن, ەسەپتەردى باسقارۋ جۇيەلەرىن, وندىرىستىك كومپانيالاردا پايدالانىلاتىن ادىستەمەلەر مەن ادىستەردى زەردەلەۋ ارقىلى كاسىبي قۇزىرەتتىلىكتى قامتاماسىز ەتۋگە باعىتتالعان بەيىندى پاندەر مەن بارلىق تۇردەگى تاجىريبەنى قامتيدى. ءبىر ەرەكشىلىك, ستۋدەنتتەرىمىزگە يندۋستريالىق پاندەر بويىنشا كومپانيالاردىڭ تاجىريبەلى ماماندارى Spring, Python, GitLab CI, JIRA, TensorFlow, BERT جانە باسقا دا قۇرالداردى وقىتادى.
بۇل رەتتە ەگەر ءبىلىم الۋشى جەتكىلىكتى ءبىلىم دەڭگەيىن كورسەتسە نەمەسە كومپانيا تارابىنان كاسىبي سەرتيفيكاتقا يە بولسا, اسپاپتىق جانە يندۋستريالىق پاندەر بويىنشا ەمتيحان تاپسىرماي-اق باعاسىن الادى. بۇل ءتاسىل بىزگە نارىق سۇرانىستارىنا يكەمدى بولۋعا جانە ۋنيۆەرسيتەتتىڭ اكادەميالىق كوميتەتتەرىنىڭ قۇرامىنا كىرەتىن كومپانيالاردىڭ ساراپشىلارىن تارتۋ ارقىلى ءبىلىم بەرۋ باعدارلامالارى مەن پاندەر مازمۇنىن جىل سايىن بەيىمدەۋگە مۇمكىندىك بەرەدى.
جالپى العاندا, اتالعان IFI ءتاسىلىن ەلدىڭ بارلىق ينجەنەرلىك-تەحنيكالىق ءبىلىم بەرۋ باعدارلامالارىنا قولدانۋعا بولادى دەپ سانايمىز. ويتكەنى ول جوعارى وقۋ ورىندارىنىڭ باعدارلامالارىن نارىق تالاپتارى مەن مەملەكەتتىك تاپسىرىستى ورىنداۋعا بارىنشا بەيىمدەيدى.
ال ۋنيۆەرسيتەت عالىمدارىنىڭ قىزمەتى بەيىندى عىلىمي-يننوۆاتسيالىق ورتالىقتار قۇرۋ, شەتەلدىك جانە وتاندىق جەتەكشى جوعارى وقۋ ورىندارىمەن بىرلەسكەن عىلىمي جوبالاردى ورىنداۋ, ستۋدەنتتەر مەن وقىتۋشىلاردىڭ زەرتتەۋلەرىنىڭ عىلىمي ناتيجەلەرىن اپروباتسيالاۋ ءۇشىن حالىقارالىق كونفەرەنتسيالار مەن سەمينارلار ۇيىمداستىرۋ جانە باسقالاردى قامتيدى.
بىلتىر اشىلعان SMART city, Industry 4.0; «ۇلكەن دەرەكتەر جانە بلوكچەين تەحنولوگيالار», AgroTech, EdTech عىلىمي-يننوۆاتسيالىق ورتالىقتارىنىڭ عىلىمي ىزدەنىستە جۇرگەن ازاماتتىڭ عىلىممەن اينالىسۋىنا ەسىگى اشىق, زاماناۋي جابدىقتالعان FabLab زەرتحاناسى ەلىمىزدىڭ عىلىمي الەۋەتىن ارتتىرۋعا ۇلەس قوسادى. سونداي-اق تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىمەن ء(تسدياوم) بىرلەسە وتىرىپ, اقپاراتتىق قاۋىپسىزدىك جانە ينتەرنەت زاتتارى زەرتحانالارى جابدىقتالماق. يننوۆاتسيالىق جوبالاردى جۇزەگە اسىرۋ ماقساتىندا ستۋدەنتتىك IT-كاسىپكەرلىك ەكوجۇيەسىنىڭ دامۋىنا جاعداي جاساۋعا ارنالعان كوۆوركينگ ورتالىق جۇمىس ىستەيدى.
اتالعان ورتالىقتار حالىقارالىق جانە وتاندىق گرانتتىق, باعدارلامالىق-نىسانالى قارجىلاندىرۋ باعدارلامالارى اياسىنداعى كونكۋرستاردى جەڭىپ الىپ, قازىرگى ۋاقىتتا جالپى سوماسى 600 ملن تەڭگەدەن اساتىن عىلىمي-يننوۆاتسيالىق جوبالار بويىنشا جۇمىس جۇرگىزۋدە. اتالعان جوبالار ن.جاكيەۆ, ا.مۇقاتاەۆ, ا.بەلوششيتسكي, د.لەبەدەۆ, ا.نەفتيسوۆ, ر.ءمادي جانە ت.ب. جەتەكشى عالىمداردىڭ باسشىلىعىمەن ورىندالۋدا. وسى ارادا اتالعان عىلىمي-زەرتتەۋ جۇمىستارىنىڭ بارلىعى كۇن تارتىبىندەگى پروبلەمالىق ماسەلەلەردى تسيفرلى تەحنولوگيالار ارقىلى شەشۋگە ارنالعان پەرسپەكتيۆالى جوبالار ەكەنىن اتاپ وتكىمىز كەلەدى. ماسەلەن, ەلورداداعى كولىك ۇيلەستىرۋ, اۋانىڭ لاستانۋى, جىلۋ ەنەرگياسىن ءتيىمسىز پايدالانۋ جانە تۇرعىنداردىڭ الەۋمەتتىك تسيفرلى بەينەسى پروبلەمالارىن كەشەندى شەشۋگە باعىتتالعان Smart city جوباسى ورىندالۋدا. سونىمەن قاتار ۋنيۆەرسيتەت جاس عالىمداردى ىنتالاندىرۋ ماقساتىندا جىل سايىن ىشكى عىلىمي جوبالار كونكۋرسىن وتكىزىپ, جەڭىمپازدارعا 1 ملن تەڭگەدەن كەم بولمايتىن گرانتتار بولەدى. ۋنيۆەرسيتەتىمىزدە جىل سايىن «ينتەللەكتۋالدى اقپاراتتىق جۇيەلەر مەن تەحنولوگيالار (IEEE SIST)» كونفەرەنتسياسى وتكىزىلەدى (28-30 ءساۋىر 2022 ج.).
يننوۆاتسيالاردى دامىتۋ ماقساتىندا ءتسدياوم قولداۋىمەن Astana IT ۋنيۆەرسيتەتى بازاسىندا كونسورتسيۋم قۇرامىندا O-RAN تەحنولوگيالارىن جانە ەلەكتروندى ونەركاسىپتى زەرتتەۋ بويىنشا رەسۋرستاردى شوعىرلاندىرۋ ماقساتىندا E-Industry تەحنولوگيالىق قۇزىرەتىنىڭ سالالىق ورتالىعى قۇرىلدى.
ۋنيۆەرسيتەتتىڭ ستراتەگيالىق باعىتتارىنىڭ ءبىرى – حالىقارالىق ىنتىماقتاستىقتى دامىتۋ. بۇگىنگى كۇنى يتاليا, بەلگيا, گەرمانيا, اقش, قىتاي, وڭتۇستىك كورەيا, چەحيا, تۇركيا, ەستونيا مەملەكەتتەرىنىڭ IT ماماندارىن دايارلايتىن جەتەكشى ۋنيۆەرسيتەتتەرىمەن بايلانىس ورناتىلعان – اكادەميالىق ۇتقىرلىق بويىنشا ستۋدەنتتەرمەن, وقىتۋشىلار جانە زەرتتەۋشىلەرمەن ءوزارا الماسۋ, ەكىجاقتى عىلىمي-زەرتتەۋ جوبالارىنا قولداۋ كورسەتۋ ءىس-شارالارى جۇزەگە اسىرىلۋدا.
ۋنيۆەرسيتەتتىڭ تاعى ءبىر ەرەكشە باعىتى – ەڭبەك نارىعىنىڭ قاجەتتىلىگىن قاناعاتتاندىرۋ ءۇشىن كادرلاردى قايتا دايارلاۋ, بىلىكتىلىگىن ارتتىرۋعا جانە كاسىبىن جاڭا باستاۋشى جاستار مەن IT كاسىپقويلارىنا ارنالعان ۆەندورلاردىڭ سەرتيفيكاتتالعان مامانداندىرىلعان كۋرستارىن ۇسىنۋ. وقىتۋ IT كومپانيالارىنىڭ پراكتيكالىق مىندەتتەرىن ەسكەرە وتىرىپ, جوبالىق باسقارۋدىڭ وزىق ادىستەرى مەن تەحنولوگيالارى نەگىزىندە جۇزەگە اسىرىلادى. بۇگىندە 3 مىڭعا جۋىق ادام ۋنيۆەرسيتەت جانىنداعى كۋرستاردان ءوتتى.
بيىل العاشقى تۇلەكتەرىمىز باكالاۆرياتتىڭ تولىق كۋرسىن ءتامامداپ, ەڭبەك نارىعىنا جولداما الادى. ۋنيۆەرسيتەتتىڭ بۇدان ارعى ءتيىمدى قىزمەتى ولاردىڭ تۇگەل جۇمىسقا ورنالاسۋ ناتيجەسىنە بايلانىستى بولعاندىقتان, ءاربىر ءبىتىرۋشى ستۋدەنتتىڭ پىكىرىن ەسكەرە وتىرىپ, ناقتى جۇمىس جۇرگىزىلۋدە. اتالعان جۇمىس, نەگىزىنەن, ستۋدەنتتەر وندىرىستىك پراكتيكادان وتكەن كاسىپورىندارمەن تىعىز بايلانىستا, مەملەكەتتىك ورگاندار, ءىت كومپانيالارمەن جاسالعان ىنتىماقتاستىق اياسىندا جۇرگىزىلەدى.
ۋنيۆەرسيتەت تۇلەكتەرىنىڭ تۇگەلدەي جۇمىسقا ورنالاساتىنىنا سەنىمىمىز مول. ويتكەنى ۋنيۆەرسيتەتتىڭ زاماناۋي ينفراقۇرىلىمى, زەرتحانالارى, ۇستازدار مەن قىزمەتكەرلەرگە قويىلعان مىندەتتەر, جوعارىدا اتالعان وليمپيادالار مەن كونكۋرستار, جوبالار – ءبىلىم الۋشىلاردىڭ كاسىبيلىگىن پراكتيكالىق تۇردە شىڭداۋعا, ولاردىڭ بويىنا جۇمىس بەرۋشى قويعان كەز كەلگەن مىندەتتى شەشە الاتىن داعدىلاردى سىڭىرۋگە ارنالدى.
وسى مۇمكىندىكتى پايدالانا وتىرىپ, Astana IT ۋنيۆەرسيتەتىنىڭ تۇلەكتەرى ەكونوميكانىڭ بارلىق سالاسىندا جۇمىس جاساۋعا ءازىر ەكەنىن اتاپ وتكىمىز كەلەدى. اتاپ ايتقاندا, «كيبەرقاۋىپسىزدىك» ماماندىعى بويىنشا ۋنيۆەرسيتەت تۇلەگى مەملەكەتتىك ورگانداردا, ۇلتتىق بانك پەن ەكىنشى دەڭگەيدەگى بانكتەردە كيبەرقىلمىسپەن كۇرەسۋگە, «مەدياتەحنولوگيالار», «تسيفرلى جۋرناليستيكا» ءبىلىم باعدارلامالارى بويىنشا ءبىلىم العان مامان بۇقارالىق اقپارات قۇرالدارىندا ساپالى كونتەنت دايىنداۋ ءۇشىن تسيفرلاندىرۋدى دامىتۋعا ءازىر. سونداي-اق ۋنيۆەرسيتەتتىڭ اسكەري كافەدراسىندا «كيبەرقاۋىپسىزدىك», «گەواقپاراتتىق جۇيەلەر» اسكەري ماماندىقتارى بويىنشا دايارلىقتان وتكەن زاپاستاعى وفيتسەر-مامانداردىڭ قۇقىق قورعاۋ ورگاندارى مەن اسكەري ۇيىمداردا قىزمەت وتەۋگە الەۋەتى بار.
«وتكەن كۇننەن الىس جوق, كەلەر كۇننەن جاقىن جوق» دەگەندەي, ۋنيۆەرسيتەت قۇرىلعالى جوسپارلانعان بىرقاتار ستراتەگيالىق مىندەت ورىندالدى. الداعى ۋاقىتتا اتقارىلۋعا ءتيىس ىرگەلى ىستەر دە جەتكىلىكتى: ۋنيۆەرسيتەت ۇلتتىق جانە حالىقارالىق ارەنادا جوعارى دەڭگەيدە باعاسىن الۋ ءۇشىن Digital University مودەلىن ىسكە اسىرۋ, ۇزدىكسىز ءبىلىم جۇيەسىندە اكادەميالىق ۇستەمدىككە جانە زەرتتەۋلەر مەن يننوۆاتسيالارداعى كوشباسشىلىققا, قارجىلىق تۇراقتىلىققا قول جەتكىزۋ ءتارىزدى ستراتەگيالىق باعىتتاردا جۇمىس ىستەيدى.
سونىمەن قاتار ۋنيۆەرسيتەتتىڭ زاماناۋي ستۋدەنتتىك كامپۋس كەشەنىن سالۋ قولعا الىنادى. ونىڭ جوبالىق قۋاتىنا سايكەس جىل سايىن IT-سالاسىنىڭ ءتۇرلى ماماندىقتارى بويىنشا ساپالى جوعارى ءبىلىمدى, اعىلشىن ءتىلىن ەركىن مەڭگەرگەن 4,5-5 مىڭ ماماندى دايارلاۋ جوسپارلانىپ وتىر.
مەملەكەت باسشىسى ق.توقاەۆتىڭ 2019 جىلعى قاراشادا Astana IT ۋنيۆەرسيتەتىمەن تانىسۋ بارىسىندا ستۋدەنتتەرىمىزگە: «...ءبىلىم بەرۋ تۇرعىسىنان بۇل ۋنيۆەرسيتەت بەدەلدى ءارى بىلىكتى ماماندار دايارلايتىن, بەدەلدى وقۋ ورنىنا اينالاتىنىنا ەشقانداي كۇمانىم جوق. نەعۇرلىم جاقسى ءبىلىم الساڭىزدار, مىنا قيىن دا الماعايىپ ومىردەن الار ەنشىلەرىڭىز سوعۇرلىم كوپ بولادى», دەگەن ءسوزى, ءبىر جاعىنان, مەملەكەت جاستاردان ۇلكەن ءۇمىت كۇتەتىنىن, ەكىنشى جاعىنان, الەمدە بولىپ جاتقان كۇردەلى گەوساياسي جاعداي ءىت سالاسىنا, ونىڭ ىشىندە اقپاراتتىق قاۋىپسىزدىك بويىنشا جوعارى بىلىكتى ماماندار دايارلاۋ ىسىنە جوعارى تالاپ قويىلاتىنىن بىلدىرەدى دەپ سانايمىز. سوندىقتان ۋنيۆەرسيتەت ۇجىمى وتاندىق ساپالى ءبىلىم بەرۋ مەن عىلىم سالاسى مىندەتتەرىن جوعارى دەڭگەيدە, جۇيەلى ورىنداۋعا بارلىق كۇش-جىگەرىن باعىتتايتىن بولادى.
دارحان احمەد-زاكي,
Astana IT University رەكتورى,
تەحنيكا عىلىمدارىنىڭ دوكتورى, پروفەسسور
