كوللاجدى جاساعان قونىسباي شەجىمباي, «EQ»
«تەكسەرىلگەن شىنايى اقپاراتتى پايدالانۋ نەگىزىندە ۆيرتۋالدى ءبىلىم بەرۋ دەڭگەيىن ارتتىرۋ» تاقىرىبىندا وتكەن جيىندا ساراپشىلار دۇنيەجۇزىلىك اقپارات الەمىندەگى جاڭالىقتاردى ورتاعا سالىپ, زەرتتەۋلەرىمەن ءبولىستى. بيىل بەسىنشى رەت وتكەن عىلىمي جيىنعا نيدەرلاندى, سلوۆاكيا, تۇركيا, رەسەي, قازاقستان, قىرعىزستان, وزبەكستان عالىمدارى ۆيرتۋالدى وقىتۋ مەن تسيفرلى ءبىلىم بەرۋدىڭ شەكارالارى مەن فورماتتارىنا دەن قويدى.
ءىس-شارانىڭ اشىلۋىندا بۇۇ جاھاندىق كوممۋنيكاتسيالار دەپارتامەنتىنىڭ وكىلى ۆلاستيميل سامەك بۇۇ «عالامشار يگىلىگى ءۇشىن جۇمىلىڭىز, تەڭسىزدىكپەن جانە جالعان اقپاراتپەن كۇرەسىڭىز» كوممۋنيكاتسيا بويىنشا بايانداماسىندا عىلىمي قاۋىم وكىلدەرىنىڭ نازارىن جۋرناليستيكا سالاسىندا اقپاراتتىق ورتاداعى سەنىم مەن سەنىمسىزدىك, فاكتچەكينگ جانە تەكسەرۋ ادىستەرىنە اۋداردى. سونداي-اق سىرتقى ىستەر مينيسترلىگىنىڭ الماتى قالاسىنداعى وكىلدىگىنىڭ ساياسي ىنتىماقتاستىق باسقارماسىنىڭ باسشىسى الماشا ارەنوۆا ەلدەگى مەملەكەتتىك قىزمەت سالاسىندا الەۋمەتتىك جەلىلەردىڭ باسىمدىقتارىن اتاپ ءوتتى. الەمدەگى, ەلدەگى اقپاراتتىق احۋالدىڭ كوڭىلگە الاڭ تۋدىرعان كەزەڭىندە ءار ازاماتقا دۇرىس اقپاراتتى جەتكىزەتىن باق ارنالارى مەن وكىلدەرى ەكەنىن ەرەكشە اتاپ وتكەن سەنات توراعاسىنىڭ بۇقارالىق اقپارات قۇرالدارىمەن بايلانىس جونىندەگى كەڭەسشىسى بيبىگۇل جەكسەنباي مەديا كەڭىستىكتەگى اقپاراتتىق قاۋىپسىزدىك ماسەلەسىنە توقتالدى.
ەۋروپالىق جۋرناليستەر دايارلايتىن اسسوتسياتسيانىڭ كەڭەسشىسى (EJTA), جۋرناليستيكا سالاسىنداعى ءبىلىم بەرۋ بويىنشا دۇنيەجۇزىلىك كەڭەس توراعاسىنىڭ ورىنباسارى, ۆيندەسحايم قولدانبالى عىلىمدار ۋنيۆەرسيتەتىنىڭ پروفەسسورى نيكو دروك ساراپشىلار نازارىن دەزينفورماتسيا كەزەڭىندە جۋرناليستىك ءبىلىم بەرۋدى باعدارلاۋ ماسەلەسىنە اۋدارىپ, «وقىتۋشى رەتىندەگى پارىزىمىز – ستۋدەنتتەردى وقىتۋ عانا ەمەس, فاكتىلەردى تەكسەرۋدىڭ تەحنيكالىق قۇرالدارى, سونىمەن قاتار تاريحي, ساياسي, مادەني جانە الەۋمەتتىك-فاكتىلەردى ماعىنالى جانە تەڭگەرىمدى كونتەكستكە قويۋ ءۇشىن ەكونوميكالىق ءبىلىم بەرۋ», دەپ اتاپ ءوتتى. 2020 جىلدان بەرى قازۇۋ-ءدىڭ جۋرناليستيكا فاكۋلتەتى EJTA مۇشەسى رەتىندە كەڭەستەر, كونۆەنتسيالارعا قاتىسۋعا مۇمكىندىك العان.
جيىندا سلوۆاكيا عىلىم اكادەمياسىنىڭ بولجاۋ ينستيتۋتى پروفەسسورى ۆ.باچيشين, ترت «تۇركيا ءۇنى» راديوسى قازاق رەداكتسياسىنىڭ رەداكتور-جۇرگىزۋشىسى ۋفۋك تۋزمان, م. ۇلىقبەك اتىنداعى وزبەكستان ۇۋ پروفەسسورى يا.ماماتوۆا, سانكت-پەتەربۋرگ مۋ پروفەسسورلارى د.گاۆرا, ي.بىكوۆ, رۋدن ۋنيۆەرسيتەتى جۋرناليستيكا تەورياسى مەن تاريحى كافەدراسىنىڭ دوتسەنتى ۆ.ماتۆيەنكو, مەديا دامىتۋ كورپوراتيۆتىك قورى مەديا جوبالار ءبولىمىنىڭ جەتەكشىسى ب.قۇلامان, Elorda-Aqparat مەدياحولدينگى ديرەكتورىنىڭ ورىنباسارى ق.اۋەسباي, ج.بالاساعۇن اتىنداعى قىرعىز ۇۋ جۋرناليستيكا فاكۋلتەتىنىڭ دەكانى ش.كوستيۋك, ت.ب. عالىمدار بايانداما جاسادى. سانكت-پەتەربۋرگ مۋ پروفەسسورى دميتري گاۆرانىڭ مەدياكوممۋنيكاتسيا سالاسىنداعى ترەندتەردى تالداعان بايانداماسى عىلىمي جاڭالىعى, تەزيستىك تۇجىرىمدارى قاتىسۋشىلار نازارىن اۋداردى. وسىعان وراي 2020-2022 جىلدارى كوممۋنيكاتسيا سالاسىنىڭ ۇردىستەرى مەن درايۆەرلەرى, كوممۋنيكاتسيا ماماندارىنا كاسىبي ءبىلىم بەرۋ جۇيەسىندەگى قاتەرلەر بايانداماسى قازاق, اعىلشىن تىلدەرىنە اۋدارىلاتىن بولادى.
عىلىمي شارانىڭ باس سەرىكتەسى Comenius Analytica ورتالىعى قولداۋىمەن جۋرناليستيكا فورۋمىنىڭ ماتەريالدار جيناعى سلوۆاكيانىڭ IRIS Publishing and printing باسپا ۇيىندە جاريالانادى.
قاتىسۋشىلار تۇركيالىق عالىمداردىڭ ۇلتتىق كوممۋنيكاتسيا ارنالارىنىڭ ينتەگراتسياسى, ەۋروپالىق عالىمداردىڭ شىندىققا نەگىزدەلگەن اقپاراتتى وقۋ پروتسەسىنە ەنگىزۋ تۋرالى تۇجىرىمدارى الداعى ۋاقىتتا اكادەميالىق ىنتىماقتاستىققا جول اشادى دەگەن سەنىمدە.
الماتى
