قر سىرتقى ىستەر مينيسترلىگىنىڭ ءباسپاسوز قىزمەتى تاراتقان اقپاراتقا قاراعاندا, 30 جىل ىشىندە قازاقستان-يزرايل ىنتىماقتاستىعىنىڭ جىلدان-جىلعا نىعايىپ, ەكىجاقتى ساياسي, ساۋدا-ەكونوميكالىق جانە مادەني-گۋمانيتارلىق سالالارداعى ىقپالداستىق جوعارى دەڭگەيگە جەتتى. ءداستۇرلى تۇردە جوعارعى جانە اسا جوعارى دەڭگەيدەگى كەزدەسۋلەر وتۋدە. پارلامەنتارالىق بايلانىس دامىپ كەلەدى. ءسىم ارالىق كونسۋلتاتسيالار تۇراقتى نەگىزدە وتكىزىلۋدە.
تاراپتار ازياداعى ءوزارا ءىس-قيمىل جانە سەنىم شارالارى كەڭەسى (اوسشك) ءوزارا ءىس-قيمىل جاساۋدا, سونداي-اق يزرايلدىك وكىلدەر الەمدىك جانە ءداستۇرلى دىندەر ليدەرلەرى سەزىنىڭ جۇمىسىنا بەلسەندى قاتىسىپ كەلەدى.
ەكىجاقتى بايلانىستاردىڭ ماڭىزدى باعىتتارىنىڭ ءبىرى ساۋدا-ەكونوميكالىق سالا بولىپ تابىلادى.
2021 جىلى يزرايلدەن قازاقستان ەكونوميكاسىنا قۇيىلعان تىكەلەي شەتەلدىك ينۆەستيتسيا كولەمى 33 ميلليون اقش دوللارىن قۇرادى.
1992 جىلدان باستاپ ساۋدا-ەكونوميكالىق ىنتىماقتاستىق جونىندەگى قازاقستان-يزرايل بىرلەسكەن كوميسسياسى جۇمىس ىستەيدى. ەكى ەلدىڭ مەديتسينا ماماندارى اراسىندا قارقىندى الماسۋ جۇرگىزىلەتىن دەنساۋلىق ساقتاۋ سالاسى ماڭىزدى ءرول اتقارادى.
ەكىجاقتى قارىم-قاتىناستاردىڭ كۇن تارتىبىندە اۋىل شارۋاشىلىعى سالاسىنداعى ىنتىماقتاستىق تا ماڭىزدى ورىن الادى. قازاقستاننان يزرايلگە كوشىپ بارعان ەۆرەي ۇلتىنىڭ وكىلدەرى بۇگىندە ەكى ەل اراسىنداعى ماڭىزدى «دوستىق كوپىرى» بولىپ تابىلادى.
«ايتۋلى كۇنگە وراي قازاقستان پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردى مەن ءيزرايلدىڭ سىرتقى ىستەر ءمينيسترى ياير لاپيد ءبىر-بىرىنە قۇتتىقتاۋ حات جولدادى», دەلىنگەن حابارلامادا.
