باسقارما باسشىسىنىڭ ايتۋىنشا, قازىرگى كەزدە ساۆينكا اۋىلىندا 14 ءىرى قارادان سىناما الىنىپ, نۇر-سۇلتان قالاسىنداعى ۆەتەريناريا بويىنشا ۇلتتىق رەۆەرەنتتىك ورتالىقتىڭ زەرتحاناسىنا جىبەرىلگەن.
«اۋىل بويىنشا اۋرۋعا شالدىققان بارلىعى 14 ءىرى قارا بار. ونىڭ بارلىعى جەكە قوراداعا سيىرلار. ءار مالدان سىناما الىنىپ, اۋرۋدىڭ سەبەبىن انىقتاۋ ءۇشىن نۇر-سۇلتان قالاسىنداعى ۆەتەريناريا بويىنشا ۇلتتىق رەۆەرەنتتىك ورتالىقتىڭ زەرتحاناسىنا جىبەرىلدى. اۋرۋدىڭ بەلگىلەرى اۋسىلعا ۇقسايدى. سيىرلاردىڭ اۋىزدارى كوپىرىپ, جەم-ءشوپ جەمەيدى. قازىرگى كەزدە, مال دارىگەرلەرىمىز اۋرۋ مالدىڭ اۋزىن ارنايى ەرىتىندىمەن شايىپ, كلينكالىق ەم جاساۋدا», - دەدى باسقارما باسشىسى.
سونىمەن بىرگە, باسقارما باسشىسى وسىنداي اۋرۋ وتكەن جىلى وبلىستىڭ 14 اۋدانى مەن ستەپنوگور قالاسىنداعى ءىرى قارادا تىركەلگەنىن اتاپ ءوتتى.
ونىڭ سوزىنشە, الداعى مامىر ايىندا وڭىردەگى ءىرى قاراعا ۆاكتسيناتسيا سالۋ جوسپارلانعان ەكەن. الايدا, ۇكىمەتتەن اقپان جانە ناۋرىز ايلارىندا جىبەرىلەتىن ۆاكتسينا ءالى كەشىكتىرىلىپ وتىرعان كورىنەدى.
