جازعى ازيا ويىندارىنىڭ الدىنداعى دايىندىق ءتۋرنيرى سانالاتىن تايلاندتاعى جارىسقا ازيا, افريكا جانە ەۋروپا قۇرلىقتارىنىڭ 19 مەملەكەتىنەن بوكسشىلار قاتىسىپ جاتىر. بوكستان قازاقستان ۇلتتىق قۇراماسىنىڭ باس باپكەرى قايرات ءساتجانوۆ بۇل جارىستا ەلىمىزدىڭ نەگىزگى قۇرام وكىلدەرى مەن جاستار اراسىنداعى ازيا, الەم بىرىنشىلىگىنىڭ چەمپيوندارىنان قۇرالعان جاس بوكسشىلاردى سىناقتان وتكىزگەندى ءجون كورگەن ەكەن.
جارىستىڭ العاشقى اينالىمىن ءساتتى باستاعان جەرلەستەرىمىزدىڭ قاتارى شيرەك فينالدان كەيىن سيرەي باستادى. تايلاندتاعى تۋرنيرگە قازاقستان قۇراماسىنان 11 بوكسشى اتتانعان بولسا, سونىڭ تەك سەگىزى عانا حالىقارالىق دودانىڭ جارتىلاي فينالىنا جولداما الدى. وكىنىشكە قاراي, بىرنەشە بوكسشىمىز جەرەبەگە سايكەس العاشقى كەزدەسۋلەردە ءبىر-بىرىنە قارسىلاس اتانىپ, جارىس جولىنان شىعىپ قالدى. توكيو وليمپياداسىنىڭ قولا جۇلدەگەرى, الەم چەمپيونى ساكەن بيبوسىنوۆ شيرەك فينالدا كۇتپەگەن جەردە شارشى الاڭ يەسى تانارات ساەنفەتتەن تورەشىلەردىڭ ارالاس شەشىمىمەن (27:30, 29:28, 28:29, 30:27, 28:29) جەڭىلىپ, ءتۋرنيردى ەرتە اياقتاۋعا ءماجبۇر بولدى.
جەكپە-جەكتەن سوڭ ساكەن بيبوسىنوۆ قازاقستاندىق Bassport.kz سايتىنا پىكىر ءبىلدىرىپ, جەڭىلىسىنىڭ سەبەبىن ءتۇسىندىردى. «بۇل – مەنىڭ الەم چەمپيوناتىنان كەيىن قاتىسقان العاشقى جارىسىم. ءبىرىنشى جەكپە-جەگىمدى ءساتتى وتكىزگەنىممەن, ەكىنشى ايقاسىمدا جەرگىلىكتى بوكسشىدان ايلامدى اسىرا المادىم. قارسىلاسىم تايلاندتىق بوكسشى بولعان سوڭ, تورەشىلەر وعان كومەكتەستى دەپ ەسەپتەيمىن. مەن جەڭىلگەن جوقپىن, تورەشىلەر تاراپىنان ازداپ بۇرمالاۋ بولدى. بۇل بوكسشىمەن بىلتىرعى الەم چەمپيوناتىنىڭ ىرىكتەۋ كەزەڭىندە كەزدەسىپ, ايقىن باسىمدىقپەن جەڭگەن بولاتىنمىن. الايدا, بۇل – سپورت. سپورت بولعان سوڭ جەڭىس پەن جەڭىلىس قاتار جۇرەدى ەمەس پە؟ ءاربىر جەڭىلىستەن قورىتىندى شىعارىپ, كەلەسى جەكپە-جەكتەرگە بۇدان دا مىقتى بولىپ ورالامىز. باپكەرلەرىم دە بارىنشا قولداۋ ءبىلدىرىپ, ۋايىمعا سالىنباۋىمدى سۇراپ جاتىر. الەم چەمپيوناتىنان كەيىنگى ءۇزىلىس ماعان جاقسى اسەرىن تيگىزدى. ءبىراز تىنىعىپ, جاڭا كۇشپەن ورالدىق. بيىلعى ماۋسىمنىڭ باستى باسەكەسى – قىتايدا وتەتىن جازعى ازيا ويىندارى. سول باسەكەدە ەلىمىزدىڭ كوك بايراعىن بيىككە كوتەرۋدى ماقسات ەتتىم», دەدى ساكەن بيبوسىنوۆ.
ماسكەۋ وليمپياداسىنىڭ كۇمىس جۇلدەگەرى ۆيكتور دەميانەنكو بۇل جەكپە-جەكتە بيبوسىنوۆ جەڭىلگەن جوق دەپ ەسەپتەيدى. «دەگەنمەن, ايقاس شارشى الاڭ يەسىمەن وتكەننەن كەيىن قازاقستاندىق بوكسشى ءبىر باس جوعارى ونەر كورسەتۋى كەرەك ەدى», دەيدى ول.
– جەكپە-جەكتى كورىپ شىقتىم. مەنىڭشە, ەكى بوكسشى دا تەڭ دارەجەدە ونەر كورسەتتى. سوققىلار سانى بويىنشا بيبوسىنوۆ جەڭىلگەن جوق, دەگەنمەن بۇل جەردە ونىڭ رينگ يەسىمەن جۇدىرىقتاسقانىن ەسكەرۋ كەرەك. مۇنداي جاعدايدا ءبىر باس جوعارى جۇدىرىقتاسىپ, تورەشىلەرگە ويلاناتىنداي مۇمكىندىك قالدىرماۋ كەرەك. ساراپشى مامان رەتىندە ايتار بولسام, ساكەن جەكپە-جەك بارىسىندا وتە كوپ ارتىق قيمىل جاساپ, سوققىلارى كوزدەگەن جەرىنە جەتپەي جاتتى. ول قارسى سوققىعا جۇمىس ىستەۋى كەرەك ەدى. بۇل سالماقتا نوكاۋتقا جىبەرەتىن سوققى سيرەك كەزدەسەدى», دەيدى ۆ.دەميانەنكو.
ساكەن بيبوسىنوۆتان بولەك, جاستار اراسىنداعى الەم چەمپيونى سانجار تاشكەنباي (52 كيلو) مەن تيمۋر نۇرسەيىتوۆ (75 كيلو) تە جارىستى ەرتە اياقتادى.
ال شيرەك فينالدا قارسىلاستارىنان باسىم تۇسكەن سەرىك تەمىرجانوۆ (57 كيلو), ءساناتالى تولتاەۆ, سۇلتان مۋسينوۆ (63,5 كيلو), اسلانبەك شىمبەرگەنوۆ (69 كيلو), اياتۋللا تاكىجانوۆ (75 كيلو) جانە ساعىندىق توعامباي مەن ايبەك ورالباي (91 كيلو) جارتىلاي فينالعا شىعىپ, كەم دەگەندە قولا مەدالعا قول جەتكىزدى. شيرەك فينالدا سەرىك تەمىرجانوۆ سينگاپۋر وكىلى موحامەد حانۋردين بين حاميدتەن 5:0 (30-24, 30-25, 30-25, 30-26, 30-24) ەسەبىمەن باسىم تۇسسە, 63,5 كيلوداعى ءساناتالى تولتاەۆ تايپەي بوكسشىسى چۋ-ەن ءلايدى تورەشىلەردىڭ ارالاس شەشىمىمەن جەڭدى. ال سۇلتان مۋسينوۆ ۆەتنام بوكسشىسى ۆۋ تاندى نوكاۋتپەن ۇتتى.
بيىلدان باستاپ ۇلتتىق قۇرامانىڭ كاپيتانى بولعان اسلانبەك شىمبەرگەنوۆ تە العاشقى جەكپە-جەگىندە تەحنيكالىق نوكاۋتپەن جەڭىسكە جەتتى. ول شيرەك فينالدا فيليپپيندىك مارجون پيانارمەن كەزدەسىپ, ءبىرىنشى راۋندتا ەكى رەت نوكداۋنعا جىبەردى. 75 كيلوداعى اياتۋللا تاكىجانوۆ جارتىلاي فينالعا جولداما بەرۋشى كەزدەسۋدە جەرگىلىكتى بوكسشى بورۆورن كادامنۋانعا ەش مۇمكىندىك قالدىرمادى. ءتىپتى ءۇشىنشى راۋندتا تاكىجانوۆ قارسىلاسىن ءبىر مارتە ەسەڭگىرەتىپ الدى.
اۋىر سالماقتاعى ساعىندىق توعامباي مەن ايبەك ورالباي ۆەتنام جانە ءۇندىستان بوكسشىلارىن قاپى قالدىرىپ, جارتىلاي فينالعا جولداما الدى. جەرەبە بويىنشا جەكپە-جەكتەرىن جارتىلاي فينالدان باستاعان نۇربەك ورالباي ءبىرىنشى ايقاسىندا تايلاند بوكسشىسى اناۆات تونگكاتوكتى تەحنيكالىق نوكاۋتپەن جەڭىپ, قازاقستاندىق بوكسشىلار اراسىنان ءبىرىنشى بولىپ فينالعا شىقتى.
ايتا كەتەيىك, جارتىلاي فينال جەكپە-جەكتەرى بۇگىنگە, ال فينال كەزدەسۋلەرى ەرتەڭگە جوسپارلانعان.
