«بوزوق» ۇلتتىق پاركى جوباسى اياسىندا عىلىم كۇنىنە ارنالعان سەمينار «تۇركى تاريحي-مادەني مۇراسىن رەپرەزەنتاتسيالاۋ مەن زەرتتەۋدەگى جاڭا باعىتتار» تاقىرىبىمەن ءوتتى.
سەميناردىڭ ماقساتى ورتاعاسىرلىق تاريحتى زەرتتەۋدىڭ وزەكتى ماسەلەلەرىن تالقىلاۋ, تاريحي-مادەني مۇرا ەسكەرتكىشتەرىن قايتا قۇرۋ جانە تانىمال ەتۋ بويىنشا حالىقارالىق تاجىريبەنى زەردەلەۋ بولدى.
تۇركيا مەن قازاقستان اراسىنداعى ءوزارا قارىم-قاتىناس دوستىققا, باۋىرلاستىققا جانە سەنىمگە نەگىزدەلگەن. قازاقستان مەن تۇركيا اراسىنداعى ىنتىماقتاستىق جاڭا تاريح كەزەڭىندە ەكى مەملەكەتتىڭ ساياسي جانە ساۋدا-ەكونوميكالىق قاتىناستاردى عانا ەمەس, مادەني-گۋمانيتارلىق بايلانىستاردى دا كەڭەيتۋگە جانە تەرەڭدەتۋگە ۇمتىلۋىمەن ەرەكشەلەنەدى. اتالعان ۇدەرىستەرگە تۇركىتىلدەس حالىقتاردىڭ تاريحي تامىرى مەن مادەني قۇندىلىقتارىنىڭ ورتاقتىعى وبەكتيۆتى تۇردە ىقپال ەتەدى.
ەكى ەل عالىمدارىنىڭ بىرلەسكەن ىنتىماقتاستىعى تاريحي-مادەني مۇرانى زەرتتەۋ, ساقتاۋ جانە رەپرەزەنتاتسيالاۋ ماسەلەلەرىن شەشۋدە ماڭىزدى ءرول اتقارادى.
سەمينار جۇمىسىنا مادەنيەت جانە سپورت مينيسترلىگى مادەنيەت كوميتەتى توراعاسىنىڭ ورىنباسارى ماقسات ارعىنبەكوۆ قاتىستى. ماقسات ارعىنبەكوۆ «بوزوق» جوباسى ەلىمىزدىڭ تاريحي-مادەني بايلىعىن دامىتۋ جانە ساقتاۋ ءۇشىن پەرسپەكتيۆالى سانالاتىنىن جانە ونى ۇكىمەت تاراپىنان مادەنيەت جانە سپورت مينيسترلىگى بەلسەندى قولدايتىنىن اتاپ ءوتتى.
«بوزوق» مۋزەي-قورىعىنىڭ ديرەكتورى ساۋلە بۋرباەۆاعا اشىق اسپان استىنداعى «بوزوق» ۇلتتىق پاركىن قۇرۋ جوباسىن تانىستىردى.
تۇركيا رەسپۋبليكاسى مادەنيەت جانە تۋريزم مينيسترلىگى كوللەكتسيالار باسقارماسى فيليالىنىڭ ديرەكتورى ازيمە ەۆرەنسەل «بوزوق» جوباسى ءوزىنىڭ بىرەگەيلىگىمەن تاڭ قالدىراتىنىنا نازار اۋداردى. تاريحي-مادەني مۇرانىڭ بايلىعىن ساقتاپ قانا قويماي, سونىمەن قاتار قاراپايىم ادام ءۇشىن ءوزىنىڭ العاشقى كەلبەتىن قالپىنا كەلتىرەتىن مۇنداي اۋقىمدى جوبالار بۇكىل الەمدە وتە سيرەك كەزدەسەدى.
قازاقستانداعى تىكا ۇيلەستىرۋشىسى حيكمەت وزدەنوۋلۋ تۇركيا تاراپىنان جوبانى ىسكە اسىرۋدا ىنتىماقتاستىققا دايىندىعىن ءبىلدىردى. حيكمەت وزدەنوۋلدىڭ ۇسىنىستارىنىڭ ءبىرى – تاجىريبە الماسۋ ءۇشىن تۇركيانىڭ مۋزەي ءىسىنىڭ جەتەكشى ماماندارىن قازاقستانعا جىبەرۋ.
سەمينار جۇمىسىندا قازاقستاننىڭ مۋزەي قىزمەتكەرلەرى ءۇشىن تۇركيا رەسپۋبليكاسىنىڭ جەتەكشى مادەني جانە عىلىمي ورتالىقتارىنا تاعىلىمدامالار ۇيىمداستىرۋ, تۇركيا رەسپۋبليكاسىنىڭ الدىڭعى قاتارلى عىلىمي جانە مۋزەي ورتالىقتارىنىڭ رەستاۆراتسيالاۋداعى, كونسەرۆاتسيالاۋداعى حالىقارالىق جۇمىس تاجىريبەسىن زەردەلەۋ, مادەني مۇرانى تانىستىرۋ سالاسىنداعى جەتىستىكتەرمەن تانىسۋ ماسەلەلەرى كوتەرىلدى.
ءىس-شاراعا قر بعم عك مەملەكەت تاريحى ينستيتۋتىنىڭ, ل. ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ, ك.ا. اقىشەۆ اتىنداعى ارحەولوگيا عزي, ءا.ح. مارعۇلان اتىنداعى ارحەولوگيا عزي وكىلدەرى قاتىستى. «بوزوق» جوباسىن ىسكە اسىرۋدىڭ باستى اسپەكتىلەرى جانە اشىق اسپان استىنداعى مۋزەيلەردە تاريحي-مادەني مۇرانى رەپرەزەنتاتسيالاۋ جونىندەگى ۇسىنىمدار تالقىلاندى.
قازاقستان ستراتەگيالىق سەرىكتەستەردىڭ ءبىرى رەتىندە تۇركيا رەسپۋبليكاسىمەن جان-جاقتى ىنتىماقتاستىقتى نىعايتۋعا ۇلكەن ءمان بەرەدى.
