بۇل جيناقتا باتىس ساياحاتشىلارىنىڭ قازاق جەرىن زەرتتەۋ تاريحى باياندالعان. ەۋروپا مەن ازيانىڭ تۇيىسكەن تۇسىندا ورنالاسقان قازىرگى قازاقستاننىڭ اۋماعى ءاردايىم زەرتتەۋشىلەردىڭ, كوپەستەر مەن ساياحاتشىلاردىڭ نازارىن اۋدارعانىن بىلەمىز. كوشپەندىلەردىڭ سالقار دالاسى مەن ءشولى بويىمەن وتكەن جىبەك جولىن سولتۇستىككە باعىتتاۋعا تىرىسقان العاشقى بريتاندىق ساۋداگەرلەر ەنتوني دجەنكينسون مەن دجوناس حەنۋەي ەدى.
ن.فيلديڭ كىتابىندا ولاردىڭ قىزىقتى وقيعالارىن بايانداپ, ادەل وممەر دە گەلل, ليۋسي اتكينسون جانە ماري دە ۋيفالۆي-بۋردون سياقتى قازاق جەرىن زەرتتەگەن كورنەكتى ساياحاتشى ايەلدەر تۋرالى دا وي تولعايدى. اۆتور جيناق مازمۇنىنا توقتالا كەلە: « ۇلى دالا ساياحاتشىلارى» كىتابى, بالكىم, سوڭعى مىڭ جىل ىشىندە ۇلى دالا ەلىنە ساياحات جاساعان تۇلعالار تۋرالى اعىلشىن تىلىندەگى تۇڭعىش تاريحي شىعارما بولار. تۋىندى ۇلى شىڭعىس حان مەن ونىڭ ۇلدارىنا جىبەرىلگەن ەميسسارلاردان باستالادى. كوشپەلى قوعامدا رەسمي ساقتالعان جازبا دەرەكتەر از بولدى دەپ ويلايمىن, سوندىقتان شەتەلدىك ساياحاتشىلاردىڭ جازبالارى اسا ماڭىزدى. جازبالاردىڭ ارقاسىندا قازاقستاننىڭ تاريحى جايلى تىڭ دەرەكتەرگە قول جەتكىزۋىمىز مۇمكىن», دەيدى.
تۇساۋكەسەر بارىسىندا ن.فيلديڭ ساياحات جاساۋ كەزىندە زەرتتەۋشىلەردىڭ ەڭ قىزىقتى اڭگىمەلەرىن بايانداپ, ەرەكشە فوتوسۋرەتتەرىن كورسەتتى. ايتا كەتەيىك, كىتاپتىڭ اعىلشىن تىلىندەگى نۇسقاسى قازاقستاننىڭ ۇلىبريتانياداعى ەلشىلىگىنىڭ قولداۋىمەن جارىق كورىپ, 2020 جىلى لوندونداعى كورولدىك گەوگرافيالىق قوعامدا تانىستىرىلعان بولاتىن. ال الماتى وبلىسىنىڭ اكىمدىگى قازاقستاننىڭ ۇلىبريتانياداعى ەلشىلىگىنىڭ باستاماسىمەن قازاق-ورىس تىلدەرىندەگى جاڭا باسىلىمداردى بىلتىر اۋدارىپ, جاريالادى.
قازاقستاننىڭ ۇلىبريتانياداعى ەلشىسى ەرلان ىدىرىسوۆ جيناقتىڭ قازاقستان مەن ۇلىبريتانيا اراسىنداعى ديپلوماتيالىق قارىم-قاتىناستاردىڭ ورناعانىنا 30 جىل تولۋىنا وراي تانىستىرىلعانىن اتاپ ءوتتى.
تۇساۋكەسەرگە سىرتقى ىستەر ءمينيسترىنىڭ ورىنباسارى رومان ۆاسيلەنكو, QazaqGeography باسقارما توراعاسى ورمان نۇرباەۆ, ۇلىبريتانيانىڭ قازاقستانداعى ەلشىسى كەتي ليچ, شەتەلدىك ديپلوماتيالىق كورپۋستىڭ وكىلدەرى, قازاقستاندىق تاريحشى-عالىمدار, ەتنوگرافتار مەن ولكەتانۋشىلار قاتىستى.
ن.ءفيلديڭنىڭ كىتابى قازاقستان مەن ۇلىبريتانيا اراسىنداعى ديپلوماتيالىق قارىم-قاتىناستىڭ 30 جىل بۇرىن ەمەس, بىرنەشە ءجۇز جىل بۇرىن ورناعانىن دالەلدەيدى. جالپى, ساياحاتشى بۇعان دەيىن « ۇلى دالانىڭ وڭتۇستىگىنە قاراي: توماس پەن ليۋسي اتكينسوننىڭ 1847-52 جىلدارى شىعىس قازاقستان بويىنشا ساياحاتتارى» اتتى تۇڭعىش كىتابىن جارىققا شىعاردى. ول XIX عاسىردىڭ ورتاسىندا قازاقستان اۋماعى بويىنشا ساياحاتتاعان توماس پەن ليۋسي اتكينسوننىڭ ۆيكتوريا داۋىرىندەگى زەرتتەۋشىلەرگە ارنالعان. نيك فيلديڭ سونداي-اق Siberian Steppes بلوگىن جۇرگىزەدى, ءارى جوڭعار الاتاۋىنىڭ شالعاي تاۋلارىنا اتپەن ەكسپەديتسيالار جاساپ ءجۇر. ەسكە سالساق, 2016 جىلدىڭ جازىندا ول توماس پەن ليۋسي اتكينسوننىڭ ون ۇرپاعىن شىعىس قازاقستانعا اتا-بابالارى العاش رەت 160 جىل بۇرىن بارعان جەرلەرمەن تانىستىرۋ ءۇشىن ەرتىپ كەلگەن ەدى.
