جەڭىس سەيدۋللا ۇلى «ج.ەلەبەكوۆ اتىنداعى رەسپۋبليكالىق ەسترادا-تسيرك كوللەدجى» رمقك ديرەكتورى قىزمەتىنە تاعايىندالدى. جەڭىس سەيدۋللا ۇلى 1962 جىلى 14 مامىردا قىزىلوردا وبلىسىندا دۇنيەگە كەلگەن. 1982 جىلى شىمكەنت مۋزىكا ۋچيليششەسىن بىتىرگەن, ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ تۇلەگى. ءار جىلدارى «ارقاس» ءانسامبلىنىڭ اسپاپشى-ءارتيسى, «گۇلدەر» مەملەكەتتىك ءانسامبلىنىڭ باس ديريجەرى, ءسۇيىنباي اتىنداعى الماتى وبلىستىق فيلارمونياسىنىڭ ءسوليسى بولىپ جۇمىس ىستەگەن. «گۇلدەر» ءانسامبلىنىڭ ديرەكتورى, الماتى قالاسى «قازاق اۋەندەرى» اق وڭىرلىك ديرەكتورى, ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ شىعارماشىلىق جۇمىس جانە سىرتقى بايلانىستار جونىندەگى پرورەكتورى, ج.ەلەبەكوۆ اتىنداعى رەسپۋبليكالىق ەسترادا-تسيرك كوللەدجىنىڭ ديرەكتورى قىزمەتتەرىن اتقارعان. 2016-2018 جىلدارى جامبىل اتىنداعى قازاق مەملەكەتتىك فيلارمونياسىنىڭ ديرەكتورى بولعان, 2018 جىلدان باستاپ قازىرگى ۋاقىتقا دەيىن «قازاقكونتسەرت» ۇيىمىن باسقارعان.
زۋرا جۇماحمەتوۆا «و.تاڭسىقباەۆ اتىنداعى الماتى ساندىك-قولدانبالى ونەر كوللەدجى» رمقك ديرەكتورى قىزمەتىنە تاعايىندالدى.
زۋرا جۇماحمەتوۆا 1967 جىلى 4 قازاندا الماتى وبلىسىندا دۇنيەگە كەلگەن. 1989 جىلى اباي اتىنداعى قازاق پەداگوگيكالىق ينستيتۋتىن بىتىرگەن. 2004-2013 جىلدار ارالىعىندا ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ وقۋ-ادىستەمەلىك ءبولىمىنىڭ جانە وقۋ ءبولىمىنىڭ مەڭگەرۋشىسى بولىپ قىزمەت ەتكەن. 2013-2015 جىلدارى ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ مەكتەپ-ينتەرنات, كوللەدج باسشىسىنىڭ وقۋ ءىسى جونىندەگى ورىنباسارى, 2015 جىلدان باستاپ قازىرگى ۋاقىتقا دەيىن ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ مەكتەپ-ينتەرنات, كوللەدجىنىڭ باسشىسى قىزمەتىن اتقارعان.
گۇلايىم جۇمابەكوۆا «ابىلحان قاستەەۆ اتىنداعى قر مەملەكەتتىك ونەر مۋزەيى» رمقك ديرەكتورى قىزمەتىنە تاعايىندالدى.
گۇلايىم جۇمابەكوۆا 1966 جىلى 20 ماۋسىمدا الماتى قالاسىندا دۇنيەگە كەلگەن. 1989 جىلى اباي اتىنداعى قازاق پەداگوگيكالىق ينستيتۋتىن بىتىرگەن. 1991 جىلدان 2013 جىلعا دەيىن ءار ءتۇرلى لاۋازىمداردى اتقارعان, ءا.قاستەەۆ اتىنداعى ونەر مۋزەيىندە ەكسكۋرسيا جۇرگىزۋشى, رەداكتور, عىلىمي قىزمەتكەر, اعا عىلىمي قىزمەتكەر, زەرگەرلىك ونەر سەكتورىنىڭ باسشىسى لاۋازىمىندا بولعان. 2013 جىلدان باستاپ قازىرگى ۋاقىتقا دەيىن قولدانبالى ونەر ءبولىمىنىڭ باسشىسى قىزمەتىن اتقاردى.
اسىلبەك باياجۇما «گەرالديكالىق زەرتتەۋلەر ورتالىعى» رمم ديرەكتورى قىزمەتىنە تاعايىندالدى.
اسىلبەك باياجۇما 1978 جىلى 25 جەلتوقساندا موڭعوليا استاناسى ۇلان-باتىر قالاسىندا دۇنيەگە كەلگەن. 2001 جىلى كوكشەتاۋ ۋنيۆەرسيتەتىن «ساياساتتانۋ» ماماندىعى بويىنشا بىتىرگەن. ءار جىلدارى اقمولا وبلىسىنىڭ ىشكى ساياسات سالاسىندا قىزمەت ىستەگەن, 2019 جىلعى شىلدەدەن باستاپ قازىرگى ۋاقىتقا دەيىن قازاقستان رەسپۋبليكاسى اقپارات جانە قوعامدىق دامۋ مينيسترلىگى ءدىن ىستەرى كوميتەتىنىڭ جيىنتىق تالداۋ جانە جوسپارلاۋ باسقارماسىنىڭ باسشىسى قىزمەتىن اتقارعان.
