سۋرەتشى راشيد قۇلباتىروۆتىڭ «الاتاۋدىڭ بوكتەرىندە» كارتيناسى مۇزبالاق مۇقاعاليدىڭ ولەڭىن ەسكە تۇسىرەدى.
«Tay دەيتىن الىپ جۇرەك,
انا تۋعان.
مەن تاۋلىقپىن!
تاۋدان مەن جاراتىلعام». شىركىن, اقيىق اقىننىڭ وسى ەكى تارماعىنان-اق بار بولمىسىن, عۇمىرلىق قاعيداسىن كورۋگە بولادى. قاراڭىزشى, ءبىز ۇسىنعان تۋىندى دا اۆتوردىڭ جان الەمىنىڭ گالەرەياسىن ايشىقتاپ تۇرعانداي.
زاماناۋي جاس سۋرەتشى راشيد قۇلباتىروۆتى تابيعي لاندشافتتار مەن قالا ءانسامبلىنىڭ زاڭدى «جىرلاۋشىسى» دەپ اتايدى. ول قىلقالاممەن جەڭىل ءارى شەبەرلىكپەن جۇمىس ىستەي وتىرىپ, قازاقستان مەن ەۋروپانىڭ ۇلكەندى-كىشىلى قالالارىنىڭ كورىنىستەرىن, قازاقتىڭ شەكسىز جازيرا دالاسىن, ىلە الاتاۋى تاۋ جوتالارىنىڭ ەڭ بيىك شىڭدارىن, كاسپي تەڭىزىنىڭ پەيزاجدارىن, سول سياقتى كوشپەندىلەردىڭ ءداستۇرلى اۋىلدارىنىڭ كومپوزيتسيالارىن جازدى. سۋرەتكەر تابيعاتقا كەلگەندە تۋىندىلارىندا تۇستىك اكتسەنتتەر, بوياۋلاردىڭ اشىقتىعى مەن قارقىندى جاعىلۋى ەرەكشە مانەرلى.
«الاتاۋدىڭ بوكتەرىندە» كارتيناسى رەاليستىك جانردا جازىلعان. وزەن جاعاسىنداعى اعاشتار مەن بيىك شوپتەردىڭ اراسىندا جىلقىلار, ال ولاردىڭ ۇستىنەن الىپ تاۋلار كورىنەدى. تاۋلار مۇنارلانعان تۇمانمەن كومكەرىلگەن. كۇن ساۋلەسى تاۋدىڭ تەك اقباس شىڭدارىنا ءتۇسىپ تۇر.
باقساڭىز, قىلقالام يەسى جۇمساق بوياۋلاردى, كەنەپتى رەڭك تۇرعىسىنان جەڭىل اۋىسۋلاردى پايدالانادى. ول وسى ارقىلى بەيمارالدىق پەن تىنىشتىققا قول جەتكىزەدى. ال كەنەپتەن تاۋدى بەينەلەۋ ءۇشىن كەڭ ورىندى كومپوزيتسيانى بولە وتىرىپ, الاتاۋدىڭ ايبىندىلىعى مەن بوكتەرلەرىنىڭ اسەم سۋرەتىن سالادى. سۋرەتشى ءوز تۋىندىسىندا تۋعان ولكەنىڭ سۇلۋلىعىن بەرىپ, تابيعاتقا دەگەن شەكسىز تاڭدانىسىن كورسەتەدى.
