توتەنشە جاعدايلار ءمينيسترى يۋري ءيليننىڭ ايتۋىنشا, بۇگىنگى تاڭدا اقتوبە جانە باتىس قازاقستان وبلىستارىندا كۇردەلى جاعداي قالىپتاسىپ وتىر.
سۋ تاسقىنى كەزەڭى باستالعاننان بەرى اقتوبە, باتىس قازاقستان, پاۆلودار, قاراعاندى وبلىستارىنىڭ 8 ەلدى مەكەنىندە 184 تۇرعىن ءۇي جانە 72 ساياجاي ۇيلەرى, 2 الەۋمەتتىك نىسان ەرىگەن قار سۋىنىڭ استىندا قالدى.
«تجم مەن جەرگىلىكتى اتقارۋشى ورگانداردىڭ كۇشىمەن باتىس قازاقستان, پاۆلودار, اقتوبە جانە قاراعاندى وبلىستارىنداعى 184 ۇيدەن, اقتوبە قالاسىنداعى 17 ساياجاي ۇيىنەن, سونداي-اق 2 الەۋمەتتىك نىساننان سۋ شىعارىلدى. سۋ باسقان 57 ساياجاي ءۇيى باقىلاۋدا تۇر. بۇگىندە قازاقستان وڭىرلەرىندە 969 ادام ەۆاكۋاتسيالاندى, ولاردىڭ 493-ءى ۋاقىتشا پانالاۋ پۋنكتتەرىندە, 476-سى تۋىستارىنىڭ ۇيلەرىنە ورنالاستىرىلدى», دەپ حابارلادى يۋ. يلين.
تجم باسشىسىنىڭ ايتۋىنشا, اقتوبە وبلىسىنداعى رەسپۋبليكالىق ماڭىزى بار جولدىڭ ءبىر ۋچاسكەسىن, وبلىستىق جانە جەرگىلىكتى ماڭىزى بار 12 ۋچاسكەنى سۋ باستى, جەرگىلىكتى ماڭىزى بار اۆتوجولداردىڭ 15 ۋچاسكەسىن سۋ شايىپ كەتتى جانە اقتوبە وبلىسىنداعى ءبىر كوپىر قيرادى.
اپاتتىق-قۇتقارۋ جۇمىستارىنا 2 مىڭنان استام ادام, 500 تەحنيكا, سۋ سورعىش قۇرالدار مەن ءجۇزۋ قۇرالدارى جۇمىلدىرىلدى.
سۋ تاسقىنى جاعدايىنىڭ كۇردەلەنۋىنە بايلانىستى باتىس قازاقستان وبلىسىنا ماڭعىستاۋ جانە اتىراۋ وبلىستارىنان تجم قوسىمشا قۇتقارۋ بولىمشەلەرى, جەكە قۇرامنان 92 ادام, 13 بىرلىك تەحنيكا, ءجۇزۋ قۇرالدارى مەن موتوپومپالار جىبەرىلدى.
يۋ. ءيليننىڭ ايتۋىنشا, ورىن العان جاعدايعا اۋا-رايىنىڭ كۇرت جىلىنۋى ىقپال ەتتى, بۇل قاردىڭ تەز ەرۋىنە جانە ەگىستىكتەردەن ەرىگەن قار سۋلارىنىڭ كەلۋىنە سەبەپ بولدى. تەك سوڭعى اپتادا ەلدەگى قار جامىلعىسى 60-تان 40%-عا دەيىن تومەندەدى. سوڭعى جىلدارى كليماتتىڭ وزگەرۋىنە بايلانىستى ەلىمىزدە بولىپ جاتقان پروتسەستەر سۋ تاسقىنى جاعدايىنا تۇبەگەيلى اسەر ەتەدى, ويتكەنى سوڭعى 50 جىل جانە ودان دا كوپ ۋاقىت بويى سۋ باسۋ ماسەلەسى بولماعان ەلدى مەكەندەردە سۋ باسۋ جاعدايلارى تىركەلىپ جاتىر.
ورىن العان جاعدايدىڭ نەگىزگى سەبەپتەرى — قاردىڭ ۋاقىتىلى شىعارىلماۋى, سۋ وتكىزۋ قۇرىلىستارىنىڭ, درەناجدىق نەمەسە ارىق جۇيەلەرىنىڭ جەتكىلىكسىز تازالانۋى, ينەرتتى ماتەريالدار قورىنىڭ دايىن بولماۋى.
كەڭەس قورىتىندىسى بويىنشا قر پرەمەر-ءمينيسترى وڭىرلەردە قالىپتاسقان سۋ تاسقىنى جاعدايى اكىمدىكتەردىڭ قاردى ۋاقىتىلى شىعارماۋىنا, كانالدار مەن ارىقتاردىڭ جەتكىلىكسىز تازارتىلۋىنا, سۋ تاسقىنىنىڭ الدىن الۋ شارالارىن قارجىلاندىرۋدىڭ جەتكىلىكسىز بولعانىنا بايلانىستى دەدى.
وسى ورايدا باتىس قازاقستان, اقتوبە, پاۆلودار جانە قاراعاندى وبلىستارىنىڭ اكىمدەرى قاۋىپسىز جەرگە كوشىرىلگەن ازاماتتارعا ءتيىستى جاعداي جاساپ, ەرىگەن قار سۋىن شىعارۋ, سۋ استىندا قالعان ۇيلەر مەن ينفراقۇرىلىمدى قالپىنا كەلتىرۋ بويىنشا جۇمىستار جۇرگىزۋى كەرەك.
تاياۋ كۇندەرى اۋا تەمپەراتۋراسى كوتەرىلىپ, بىرقاتار وڭىردە احۋال ودان سايىن اۋىرلاي ءتۇسۋى مۇمكىن. وسىعان بايلانىستى ءاليحان سمايىلوۆ سۋ تاسقىنىنا تۇراقتى مونيتورينگ پەن باقىلاۋ جاساپ, قالىپتاسقان جاعدايعا جەدەل ارەكەت ەتۋدى تاپسىردى.
«سۋ تاسقىنى قاۋپى بار ۋچاسكەلەرگە جاقىن ماڭعا ارنايى جانە ينجەنەرلىك تەحنيكانى, قۇم سالىنعان قاپتاردى جەتكىزۋ قاجەت. سونداي-اق سۋ تاسقىنى كەزىندە كولىك قاتىناسى شەكتەلۋى مۇمكىن ەلدى مەكەندەردى انىقتاپ, ول جەرلەردە ازىق-ت ۇلىك ونىمدەرى مەن اۋىز سۋ قورىن دايىنداعان ءجون», دەدى پرەمەر-مينيستر.
ەكولوگيا مينيسترلىگى وڭىرلەردىڭ اكىمدىكتەرىمەن بىرلەسىپ, سۋ قويمالارىنىڭ جاي-كۇيىنە, سونداي-اق سۋ تاسقىنى قاۋپى بار وزەندەردەگى جاعدايعا تۇراقتى باقىلاۋ ورناتۋى قاجەت. قاجەت بولعان جاعدايدا سۋ قويمالارىن الدىن الا جانە قاۋىپسىز بوساتۋ بويىنشا شارالار قابىلداۋ كەرەك.
تجم اقپارات مينيسترلىگىمەن بىرلەسە وتىرىپ, ەلدى مەكەندەردى سۋ باسۋ جانە قاۋىپتى ايماقتاردان ەۆاكۋاتسيالاۋ كەزىندە تۇرعىنداردىڭ ءتيىستى قاۋىپسىزدىك ەرەجەلەرىن ساقتاۋ تۋرالى اقپاراتتاندىرۋ جۇمىستارىن جانداندىرۋى ءتيىس.
ءاليحان سمايىلوۆ سونداي-اق وڭىرلەردىڭ اكىمدەرىنە سۋ تاسقىنى بارىسىن قاتاڭ باقىلاۋعا الۋدى, كەلەسى جىلى سۋ باسۋ قاۋپىن ەداۋىر تومەندەتۋ ءۇشىن 2021-2023 جىلدارعا ارنالعان سۋ تاسقىنىنا قارسى ءىس-شارالاردىڭ جول كارتاسىن ىسكە اسىرۋ بويىنشا شارالار قابىلداۋدى تاپسىردى.
