وسىلايشا, 2021 جىلدىڭ قورىتىندىسى بويىنشا ەلىمىزگە تىكەلەي شەتەلدىك ينۆەستيتسيالاردىڭ جالپى اعىنى (تشي) $23,7 ملرد قۇرادى, كورسەتكىش 2020 جىلىمەن سالىستىرعاندا 37,7%-عا ءوسىپ وتىر ($17,2 ملرد).
قازاقستان ەكونوميكاسىنا ەڭ كوپ ينۆەستيتسيا سالعان مەملەكەتتەردىڭ ۇزدىك بەستىگىندە. نيدەرلاندى, اقش, شۆەيتساريا, رەسەي جانە قىتاي 25%-دان 92%-عا دەيىن وسىمىمەن كوش باستاپ تۇر. اتالعان ەلدەردەن ينۆەستيتسيالار ۇلەسى تارتىلعان ينۆەستيتسيالاردىڭ جالپى كولەمىنىڭ 68,3% قۇرايدى.
ءوز كەزەگىندە, ۇزدىك وندىقتىڭ ەكىنشى بولىگىندە ايتارلىقتاي وزگەرىستەر بايقالدى. بەلگيا سالىنعان ينۆەستيتسيالارىنىڭ 35,1%-عا ۇلعايتىپ, ۇلىبريتانيانى باسىپ وزىپ, 6 ورىنعا يەلەندى. وڭتۇستىك كورەيا 73,2% -عا ءوسىم كورسەتىپ, 9-شى ورىننان 8-ءشى ورىنعا كوتەرىلدى. سونىمەن قاتار تۇركيا ينۆەستورلارى رەسپۋبليكامىزعا ينۆەستيتسيالاردىڭ ءوسۋىن 87%-عا قامتاماسىز ەتتىپ 9 ورىندا ورنالاستى. ۇزدىك وندىقتى فرانتسيا ينۆەستورلارى تۇيىقتادى.
انىقتاما: 2021 ج. ۇزدىك 10 ينۆەستور ەلدەر
- نيدەرلاند - $7,0 ملرد
- اقش - $2,8 ملرد
- شۆەيتساريا - $2,6 ملرد
- رف - $1,9 ملرد
- قىتاي - $1,8 ملرد
- بەلگيا - $1,06 ملرد
- ۇلىبريتانيا - $1,02 ملرد
- وڭتۇستىك كورەيا - $805,5 ملن
- تۇركيا - $679,5 ملن
- فرانتسيا - $603,1 ملن
سالالار بولىنىسىندە قارايتىن بولساق, 2021 جىلدىڭ قورىتىندىسى بويىنشا اۋىل, ورمان جانە بالىق شارۋاشىلىعىندا ينۆەستيتسيالاردىڭ سالىمدارى 2,8 ەسەگە, كاسىبي, عىلىمي-تەحنيكالىق قىزمەتى سالاسىندا 2,6 ەسەگە, اقپارات پەن بايلانىس سالاسىندا 80,1%-عا, ال ەلەكترمەن جابدىقتاۋ سالاسىندا 68,3%-عا ۇلعايدى. وڭدەۋ ونەركاسىبى دە ەداۋىر ءوسىم كورسەتتى. وتكەن جىلى ينۆەستورلار بۇل سالاعا 2020 جىلىمەن سالىستىرعاندا $2 ملرد-قا كوپ ينۆەستيتسيا قۇيدى, ءوسىم 65,4% قۇرادى.
ءوز كەزەگىندە, ينۆەستيتسيا تارتۋعا جاۋاپتى قازاقستان رەسپۋبليكاسىنىڭ سىرتقى ىستەر مينيسترلىگى وتكەن جىلى $19 ملرد استام تارتىلادى دەپ بولجامداعان.
ينۆەستيتسيالىق جوبالار پۋلىن جانە قازاقستاندا قولدانىلاتىن «قر ەلشىلىكتەر - ورتالىق مەملەكەتتىك ورگاندار - ايماقتىق اكىمشىلىكتەر» ينۆەستيتسيا تارتۋ بويىنشا ءۇش دەڭگەيلى جۇيەسىن ءساتتى جۇزەگە اسىرۋ ناتيجەسىندە ەلىمىز 2017-2019 جىلعى كورسەتكىشتەرىنە قول جەتكىزدى.
قازاقستان رەسپۋبليكاسىنىڭ ۇكىمەتى الەمدىك ستاندارتتارعا ساي ينۆەستيتسيالىق احۋالدى جاقسارتۋ بويىنشا تۇراقتى تۇردە جۇمىس جۇرگىزىپ, بيزنەس ءۇشىن مىقتى جانە باسەكەلى ورتانى قالىپتاستىرۋىنا ۇلكەن ءمان بەرەدى. بۇل باعىتتا «KAZAKH INVEST» ۇق» اق ينۆەستورلارعا جاردەمدەسۋ بويىنشا شارالار كەشەنىن كورسەتەتىن ينۆەستيتسيا تارتۋ بويىنشا بىرىنعاي وپەراتور بولىپ تابىلادى. اتاپ ايتقاندا, ۇلتتىق كومپانيا ينۆەستورلاردىڭ قازاقستانعا ساپارىن ۇيىمداستىرۋ, قارجىلاندىرۋ كوزدەرىن جانە جوبالاردى ىسكە اسىرۋعا باعىتتالعان ينۆەستيتسيالىق الاڭدارىن انىقتاۋ, جەرگىلىكتى ىسكەرلىك سەرىكتەستەرمەن بايلانىس ورناتۋ جانە رۇقسات بەرۋ جانە وزگە دە قۇجاتتاردى الۋ كەزىندە كونسۋلتاتسيالىق قولداۋ سەكىلدى قىزمەتتەر كورسەتەدى.
بۇل فاكتىلەر Standard & Poor's بەدەلدى حالىقارالىق رەيتينگ اگەنتتىگىن راستايدى. اگەنتتىك قازاقستان رەسپۋبليكاسىنىڭ تاۋەلسىز نەسيەلىك رەيتينگىن «BBB-» دەڭگەيدە ساقتاپ, بولجام «تۇراقتى» دەپ حابارلادى.
بۇگىنگى كۇنى, قازاقستان رەسپۋبليكاسىنىڭ 2025 جىلعا دەيىنگى جاڭا ينۆەستيتسيالىق ساياساتىنىڭ تۇجىرىمداماسى ESG (Environmental - قورشاعان ورتا, Social - الەۋمەتتىك سالا, Governance and Prosperity - كورپوراتيۆتىك باسقارۋ جانە ەكونوميكالىق وركەندەۋ) ستاندارتتارىنا ساي ازىرلەنۋدە.
