پوليتسيا دەپارتامەنتىنىڭ ءباسپاسوز قىزمەتى ءمالىم ەتكەندەي, سوڭعى ەكى جاعدايدا جۇرگىزۋشىلەر ماس كۇيىندە عانا ەمەس, كولىك جۇرگىزۋ قۇقىعىنان دا ايىرىلعان ەكەن.
ماسەلەن, ەسىل اۋدانى ياۆلەنكا اۋىلىنىڭ 26 جاستاعى تۇرعىنى, ءتۇن ورتاسىندا اۋىلعا ماس ساپارعا شىعۋدى ۇيعارعان. ماس ادامدى ۋچاسكەلىك پوليتسەي بايقاعان. وتكەن جىلدىڭ قاڭتارىندا ول بەس جىلعا جۇرگىزۋشى كۋالىگىنەن ايىرىلعانى بەلگىلى بولدى.
پەتروپاۆل قالاسىنىڭ تۇرعىنى دا كولىكتى ەسىرتكىگە ماس كۇيىندە جۇرگىزگەن. وتكەن جىلى 35 جاستاعى قالا تۇرعىنى دا جەتى جىلعا جۇرگىزۋشى كۋالىگىنەن ايىرىلدى.
ەندى ولارعا «كولىك قۇرالدارىن جۇرگىزۋ قۇقىعىنان ايىرىلعان جانە الكوگولدىك, ەسىرتكىلىك جانە (نەمەسە) ۋىتقۇمارلىق ماساڭ كۇيدەگى ادامنىڭ كولىك قۇرالىن باسقارۋى, سول سياقتى كولىك قۇرالىن باسقارۋدى وسىنداي ادامعا بەرۋ نەمەسە وسىنداي ادامنىڭ كولىك قۇرالىن باسقارۋعا جىبەرىلۋى» قىلمىستىق بابى بويىنشا جازا قولدانىلۋى ءتيىس. ونىڭ سانكتسياسى 5 جىلعا دەيىن باس بوستاندىعىنان ايىرۋدى جانە ءومىر بويى باسقارۋ قۇقىعىنان ايىرۋدى كوزدەيدى.
«جىل باسىنان بەرى وبلىس جولدارىندا 33 جول-كولىك وقيعاسى تىركەلىپ, 9 ادام قازا تاۋىپ, 45 ادام جاراقات الدى. 14 مىڭنان استام جول قوزعالىسى ەرەجەلەرىن بۇزۋ انىقتالدى», دەدى جەرگىلىكتى پوليتسيا قىزمەتى باسقارماسىنىڭ باستىعى ايدىن بايماتوۆ.
