جولداۋدىڭ ءار سويلەمىن شۇقشيا وقۋعا تۋرا كەلدى. بابالارىمىزدىڭ «ىشتەن شىققان جاۋ جامان» ءسوزى مىسالعا كەلتىرىلىپتى. جولداۋدا «توڭكەرىس جاساۋعا ۇمتىلعانداردىڭ اراسىندا بەلگىلى ادامدار بولدى» دەلىنگەن. وسى تۇستا «سول بەلگىلى ادامدار كىمدەر؟» دەگەن سۇراق كوڭىلدە كولدەنەڭدەي بەرەدى. «جوعارى لاۋازىم يەلەرى مەملەكەتكە ساتقىندىق جاساسا» بۇل دا اشىق ايتىلۋى كەرەك دەگەن ويدامىن.
ارينە, ەلباسىنىڭ وتكەن وتىز جىل ىشىندەگى ەڭبەگىن ەشكىم جوققا شىعارا قويماس. بىراق حالىق تاراپىنان وعان تاڭىلىپ جاتقان كىنالار مەن ايىپتاۋلاردىڭ ءبارىن تەرىستەۋ بيلىك پەن جۇرتشىلىق اراسىن بىتىستىرە تۇسەدى دەگەنگە سەنە قويۋ قيىن. سول كۇندەرى قاۋىپسىزدىك كەڭەسى بۇعىپ قالدى. كارىم ءماسىموۆ نەگە ساتقىندىق ارەكەتكە باردى؟ مىنە, وسى جانە باسقا سۇراقتار ەل تاعدىرىنا الاڭ ءاربىر قازاقستاندىقتى ويلاندىرىپ جۇرگەنى انىق. جولداۋدا ء«بىز تەرىس پيعىلدى ادامداردىڭ مەملەكەتتىك توڭكەرىس جاساماق بولعانىن ناقتى بىلەمىز» دەلىنسە, بۇل جايىنداعى تولىق اقپاراتتى ەل حالقىنىڭ تەزدەتىپ بىلگەنىن قالار ەدىك.
جولداۋداعى مىنا جولدار كوڭىلگە ءۇمىت ۇيالاتادى: «قاعاز بەتىندە عانا جۇزەگە اسىرىلعان, بىراق شىندىققا ەش جاناسپايتىن جالعان تابىستارعا ماساتتانىپ وتىراتىن زامان كەلمەسكە كەتتى. حالىققا كوپىرمە ءسوز, بوس ۋادە ەمەس, كوزبەن كورىپ, قولمەن ۇستاۋعا بولاتىن وڭ وزگەرىستەر كەرەك». سولاي بولسا جاقسى عوي. كوڭىلىمىزدە جۇرگەن كوپ قىجىلدى ءدوپ باسقان. شىندىققا جاناسپايتىن جالعان كورسەتكىشتەر مەن مالىمەتتەردى بەرىپ وتىرعان ءارتۇرلى دەڭگەيدەگى ستاتيستيكالىق قۇرىلىمدار. ءسىرا, كەزىندە ولارعا «جوقتى بار ەتىپ كورسەتۋ» تاپسىرماسى بەرىلگەن. ولار ول جۇكتەمەنى كۇنى بۇگىنگە دەيىن بۇلجىتپاي ورىنداۋعا ابدەن بويلارى ۇيرەنىپ كەتكەن. اعاتتىقتى ءدال سول كۇيىندە كورسەتپەۋدىڭ زاردابى قانداي بولاتىنىن ءومىردىڭ ءوزى كورسەتىپ بەردى.
جولداۋداعى مىنا جولداردى كورەگەندىك دەپ باعالايمىن. «بۇكىل قۇزىرەت ءبىر قولدا بولۋىنا نەگىزدەلگەن باسقارۋ جۇيەسى قازىر ءوزىنىڭ تيىمدىلىگىن جوعالتتى. بۇل جۇيە كوزقاراسى مەن ۇستانىمى ارقيلى ازاماتتىق قوعامدى ۇيىستىرا المايدى... الدىمىزدا پارلامەنتتىڭ ءرولىن كۇشەيتۋ مىندەتى تۇر. بۇل «حالىق ۇنىنە قۇلاق اساتىن مەملەكەت» تۇجىرىمداماسىن تابىستى جۇرگىزۋگە جول اشادى».
«بارلىق ازاماتقا بىردەي مۇمكىندىك بەرىلەتىنىنە مەملەكەت باسشىسى مىزعىماس كەپىل بولۋعا ءتيىس. سوندىقتان پرەزيدەنتتىڭ جاقىن تۋىستارىنا ساياسي مەملەكەتتىك قىزمەتشى بولۋعا جانە كۆازيمەملەكەتتىك سەكتوردا باسشىلىق لاۋازىمداردى يەلەنۋگە زاڭ جۇزىندە تىيىم سالىنادى. مۇنداي نورمانى كونستيتۋتسياعا ەنگىزسەك تە ارتىق بولمايدى دەپ سانايمىن. پرەزيدەنتتىڭ وكىلەتتىگى كوپ بولسا, ول سوعۇرلىم شەكسىز بيلىكتىڭ يەسىنە اينالادى». وتە دۇرىس ايتىلىپ وتىر. شەكسىز بيلىكتە شەكەسى شىلقىعاندار وزدەرىنىڭ نەگىزگى مىندەتىن, مەملەكەتتىڭ تۇتاستىعى مەن بىرلىگىنە جاۋاپتى ەكەندىكتەرىن ۇمىتىپ تا كەتكەندەي. بيلىككە شەكسىز قوماعايلىق, ماقتاۋ-ماداقتاۋعا مالدانۋ كىمدى بولسىن باسقارۋ تىزگىنىنەن ايىرىلۋىنا, اينالاسىنداعى سىبايلاس توپتاردىڭ ۋىسىنان شىعا الماي قالۋىنا اپارىپ سوقتىراتىنىن ءومىردىڭ ءوزى, مىنا قاڭتار وقيعاسى انىق كورسەتتى. مەملەكەتتى جەكە مەنشىگى سياقتى كورە باستاۋ, مەملەكەتتەگى ەڭ جوعارى لاۋازىمدى تۇلعانىڭ قولىندا بارلىق وكىلەتتىكتىڭ شوعىرلانۋى, وعان جاقىن تۇلعالار مەن قارجىلىق-وليگارحيالىق توپتاردىڭ ىقپالىن ورىنسىز كۇشەيتەتىن دە وتكەن ۋاقىتتىڭ بىزگە كورسەتكەن شىندىعى.
جولداۋدا وكىلدى بيلىك تارماعىن قايتا قۇرۋ ماسەلەسى كەڭ قامتىلعان. «پارتيادا جوق ازاماتتار ماجىلىسكە عانا ەمەس, جەرگىلىكتى وكىلدى ورگاندارعا دا سايلانا المايتىن بولدى. مۇنى اشىق مويىنداۋىمىز كەرەك. سونىڭ سالدارىنان حالىقتىڭ سايلاۋ ناۋقانىنا قىزىعۋشىلىعى كۇرت تومەندەدى. سايلاۋدى كەرەك قىلمايتىن ادامداردىڭ قاتارى كوبەيدى. ولار وزدەرىنىڭ داۋىسى ماڭىزدى ەكەنىنە, ەل ءومىرىن جاقسارتۋعا ىقپال ەتە الاتىنىنا سەنبەيتىن بولدى. اشىعىن ايتساق, قازىر جۇرت دەپۋتاتتاردى اسا تاني بەرمەيدى»... مىنە, كوڭىلدە جۇرگەن اششى شىندىقتىڭ ءبىرى وسى. كەزىندە ءوزىمىز ءبىر شەتىندە جۇرگەن جۇمىس بولعان سوڭ بىلەتىنىمىز, سايلاۋعا كەلمەگەن ادامداردىڭ ورنىنا وزدەرىنە قاجەتتى كانديداتۋرا ءۇشىن توپتاپ بيۋللەتەن سالىپ, وتىرىك سايلاۋ وتكىزۋ جازىلمايتىن دەرتكە اينالدى. حالىقتىڭ كوپتەگەن وكىلىنىڭ «بىردە-ءبىر دۇرىس وتكەن سايلاۋدى كورگەن جوقپىز», دەۋى راس ءسوز. ايتپەسە, بۇكىل قازاقستان بويىنشا ءبىر كانديداتۋرانىڭ 90 پايىزدان اسا داۋىس جيناۋى ەشقانداي اقىلعا سىيمايدى. دەمەك وتىرىكتى دە ويلانباي ايتاتىن دارەجەگە جەتتىك.
جولداۋدا سايلاۋ جۇيەسىن جەتىلدىرۋ, پارتيالىق جۇيەنى دامىتۋ مۇمكىندىكتەرىن كەڭەيتۋ, سايلاۋ ۇدەرىسىن جاڭارتۋ, قۇقىق قورعاۋ ورگاندارىن كۇشەيتۋ بويىنشا كوتەرىلىپ وتىرعان ماسەلەلەر ەگەر جەرگىلىكتى جەرلەردە بۇرىنعى كوز دە, بوي دا ۇيرەنگەن تاپتاۋرىن جاساندىلىقتان ارىلىپ, شىندىققا نەگىزدەلىپ جۇرگىزىلسە, جاڭارۋ مەن جاڭعىرۋ جولىنا ءتۇسىپ, جاڭا قازاقستان قۇرارىمىز انىق.
جولداۋدىڭ جەتىنشى بولىمىندە بۇقارالىق اقپارات قۇرالدارىنىڭ دا تىڭ مىندەتتەرى بەلگىلەنگەن. «بۇقارالىق اقپارات قۇرالدارى باسەكەگە قابىلەتتى جانە ەركىن بولۋى كەرەك» دەلىنگەن. دەمەك گازەتتەردىڭ ۇستىنەن قاراپ, رەداكتوردىڭ بيلىگىنە قول سۇعۋشى قانداي دا ءبىر قۇرىلىمنىڭ بولۋى – بۇدان ءارى تيىمدىلىگىن جوعالتاتىنى انىق. «جۋرناليستەر ءوز ەلىنە جانە ازاماتتارىنا شىنايى جاناشىر بولۋعا ءتيىس. بۇقارالىق اقپارات قۇرالدارى بەكەردەن بەكەر ء«تورتىنشى بيلىك» اتانباسا كەرەك», دەلىنگەن جولداۋدا. ەندەشە, ء«تورتىنشى بيلىكتىڭ» ءوز قۇزىرەتى شەڭبەرىندە قاناتىن ەركىن جازاتىنداي جاعدايى بولۋعا ءتيىس.
قاسىم-جومارت توقاەۆ جولداۋدىڭ سوڭعى بولىگىندە وتانداستارعا ارناعان سوزىندە: «وسى تۇراقسىز, قۇبىلمالى الەمدە قازاقستانىمىز بىزدەن باسقا ەشكىمگە كەرەك ەمەس. سوندىقتان ماعان ەلىمنىڭ اماندىعى مەن جەرىمنىڭ تۇتاستىعىنان اسقان قۇندىلىق جوق... بابالار اماناتىنا ادال بولىپ, ونى ۇرپاققا تابىستاۋ – مەن ءۇشىن كيەلى پارىز», دەدى. بۇل ءاربىر ەلجاندى, سانالى وتانداستىڭ ماڭگىلىك وزگەرمەيتىن جۇرەك ۇنىنە اينالىپ, سول جولدا بىرلىگىمىزدى كورسەتكەندە عانا جاڭا قازاقستاننىڭ جارقىن بەينەسىن كورە الامىز.
تاڭاتار دارەل ۇلى,
قازاقستاننىڭ قۇرمەتتى ءجۋرناليسى,
قۇرمانعازى اۋدانىنىڭ قۇرمەتتى ازاماتى, «قۇرمەت» وردەنىنىڭ يەگەرى
