ەلىمىزدە سۋ تاسقىنى كەزەڭىنە دايىندىق پەن ءوتۋدىڭ بەلسەندى كەزەڭى باستالدى. «قازگيدرومەتپەن» بىرگە توتەنشە جاعدايلار مينيسترلىگى اقپارات, بولجام الماسۋ جونىندە جۇمىس رەجىمىنە كوشتى. يۋ.ءيليننىڭ ايتۋىنشا, ناۋرىزدىڭ سوڭعى ونكۇندىگىندە «قازگيدرومەت» بولجامى ورىن العان وقيعالارعا تولىق سايكەس كەلدى. ماسەلەن, ەلىمىزدىڭ كوپ وڭىرىندە داۋىل تۇرىپ, تابيعات توسىن مىنەز كورسەتتى.
– بۇگىنگى تاڭدا بىزدە بار اقپارات بويىنشا ىلعال قورىنىڭ جيناقتالۋ كولەمى بىرقاتار وڭىردە, ەڭ الدىمەن قاراعاندى وبلىسىندا, ەسىل, قالقۇتان وزەندەرىندە, اقمولا وبلىسىنىڭ سىلەتى, اقتوبە وبلىسىنداعى قارعالىدا ورتاشا كوپجىلدىق كورسەتكىشتەن تومەن. ال اقمولا وبلىسىنداعى جاباي, شاعالالى وزەن ارنالارى, باتىس قازاقستان وبلىسىنداعى ۋتۆا وزەنى قالىپتى جاعدايدا. نورما شەگىنەن ءبىرشاما جوعارى دەپ ەسىل وزەنىنىڭ باسسەينىن اقمولا وبلىسىنىڭ سەرگەەۆ سۋ قويماسىنا دەيىنگى, تىكەلەي سولتۇستىك قازاقستان وبلىسى مەن قاراعاندى ءوڭىرىنىڭ نۇرا كولىنە دەيىنگى ارالىقتى ايتا الامىز. قازىرگى ۋاقىتتا ءبىز نولدىك فازالاردان كۇندىز جانە تۇندە وڭ تەمپەراتۋراعا اۋىسۋدى بايقايمىز. دەمەك, قار ەرۋ پروتسەسى اناعۇرلىم بەلسەندى بولادى. بۇل تيىسىنشە, ءار وقيعاعا دايىن بولۋدى قاجەت ەتەدى, – دەدى مينيستر.
توتەنشە جاعدايلار مينيسترلىگى مەن سۋ رەسۋرستارى كوميتەتىنىڭ باقىلاۋىنداعى بارلىق سۋ قويمالاردىڭ تولىمدىلىعى 50%-70%-دى قۇرايدى. سونىمەن قاتار وزەندەردىڭ ارناسىنان اسىپ, بىتەلىپ قالماۋى, مۇز ۇيىندىلەرى پايدا بولماۋى ءۇشىن مۇز جارۋ جۇمىستارى جۇرگىزىلىپ جاتىر.
– قازاقستان اۋماعى ارقىلى وتكەن داۋىلدىڭ سالدارىنان بىرقاتار ايماقتا, ياعني قىزىلوردا, الماتى, قاراعاندى وبلىستارىندا, بالقاش كولىندە مۇز ۇيىندىلەرىنىڭ پايدا بولۋىنا سەبەپ بولدى. سونداي-اق بۇل قۇبىلىس قىزىلوردا وبلىسى اۋماعىندا بىرقاتار جەكەمەنشىك دەمالىس ۇيلەرىن ءبۇلدىردى. باقىتىمىزعا وراي, وندا ەشكىم بولعان جوق. سايكەسىنشە, ادامداردىڭ ءومىرى مەن دەنساۋلىعىنا قاۋىپ تونگەن جوق. سونداي-اق تۇركىستان, جامبىل, الماتى وبلىستارىنىڭ تاۋلى ايماقتارىندا قاردىڭ قالىڭ تۇسكەنى بايقالادى. اۋا تەمپەراتۋراسى كوتەرىلگەن كەزدە تاۋداعى وزەندەردىڭ بويىمەن قارقىنى قاتتى اعىس ءجۇرىپ, قار كوشكىنى بولۋى مۇمكىن ەكەنىن الدىن الا ەسكەرتەمىز. سوندىقتان الداعى دەمالىس كۇندەرى تاۋلى جەرلەردە تۇراتىن ازاماتتاردان قار كوشكىنى ايماعىندا قالماس ءۇشىن تاۋعا بارۋدان باس تارتۋلارىن سۇرايمىز. تاۋلى جەرلەرگە بارۋعا قاتىستى دا ءتيىستى ەسكەرتۋلەر مەن شەكتەۋلەر بولادى, – دەدى ۆەدومستۆو باسشىسى.
بۇگىندە ءتۇرلى الەۋمەتتىك جەلىدە ەل ازاماتتارى قار قۇرساۋىندا قالىپ, زارداپ شەكتى دەگەن سىڭايدا ءارتۇرلى مالىمەت تاراپ جاتىر. الايدا مينيستر مۇنداي اقپاراتتاردىڭ شىندىققا جاناسپايتىنىن جەتكىزدى.
– ءۇسىپ قالعاندار, قايتىس بولعاندار تۋرالى ينتەرنەتتە تاراعان فەيك اقپاراتتار شىندىققا جاناسپايدى. قار قۇرساۋىندا جانە مۇز ۇيىندىلەرى سالدارىنان بىردە-ءبىر ادام زارداپ شەككەن جوق. جولدا قالعان ازاماتتاردى ۋاقىتشا ورنالاستىرۋ پۋنكتتەرىنە كوشىرۋ, ورنالاستىرۋ ماسەلەسىنە قاتىستى كومەك ۋاقتىلى كورسەتىلدى. تەك, وسى جول ۋچاسكەلەرىندەگى اپاتتى جاعدايعا بايلانىستى جول-كولىك وقيعاسى سالدارىنان قازا تاپقاندار بولدى. جالپى, مەرەكە كۇندەرى جانە كەيىنگى ۋاقىتتاردا وتكىزۋ پۋنكتتەرىندە 1 200-دەن استام اۆتوكولىك تۇرىپ قالدى. 1 مىڭنان استام ادامدى ءبىز ءارتۇرلى كولىك قۇرالدارىنان ەۆاكۋاتسيالادىق.
ماسەلەن, جىلىتۋ پۋنكتتەرىنە جەتكىزدىك, پسيحولوگيالىق كومەك تە, جەرگىلىكتى اتقارۋشى ورگانداردان تاماقتاندىرۋدى ۇيىمداستىرۋ بويىنشا دا ۋاقتىلى كومەك كورسەتىلدى. توتەنشە جاعدايلار مينيسترلىگىنىڭ بولىمشەلەرى مەن اۋماقتىق بولىمشەلەردە تىكەلەي ورنالاستىرىلعان شتابتاردىڭ تەلەفوندارىنا 230-دان استام قوڭىراۋ كەلىپ ءتۇستى. 7 مىڭنان استام ءتۇرلى اقپاراتتىق-انىقتامالىق حابارلامالار كەلىپ ءتۇستى, دەدى توتەنشە جاعدايلار ءمينيسترى يۋ.يلين.
