اسا تاجىريبەلى قىزمەتكەرلەردەن ارنايى قۇرىلعان جەدەل تەرگەۋ توبى ءتورت اي بويى قىلمىستىق توپ جۇمىسىن باقىلاعان. ءىىم ەسىرتكى قىلمىسىنا قارسى ءىس-قيمىل دەپارتامەنتى باستىعىنىڭ مىندەتىن اتقارۋشى اسقار مۇحامەتقاليەۆتىڭ ايتۋىنشا, ۇستالعاندار قاراعاندى جانە تەمىرتاۋ قالالارىنىڭ تۇرعىندارى. ولار 2021 جىلدىڭ مامىرىنان باستاپ وسى ۋاقىتقا دەيىن نۇر-سۇلتان, الماتى قالالارىندا, سونداي-اق, قاراعاندى جانە شىعىس قازاقستان وبلىستارىندا اسا ءىرى كولەمدە سينتەتيكالىق ەسىرتكىنى ساتۋمەن اينالىسقان.
ۇستالعانداردىڭ ايتۋىنشا, ەسىرتكىنى ساتۋ Telegram الەۋمەتتىك جەلىسىندەگى ينتەرنەت-دۇكەن ارقىلى جۇرگىزىلگەن. توپتىڭ قىزمەتى جاقسى ۇيىمداستىرىلعان. توپتىڭ 10 مۇشەسى اراسىندا ۇيىمداستىرۋشى, بۋىپ-ءتۇيۋشى, وپەراتور, ديلەر, ەسىرتكىنى تىعىپ جاسىرۋشى رولدەرى مەن فۋنكتسيالارى ناقتى بولىنگەن.
«فيگۋرانتتاردىڭ تۇرعىلىقتى جەرىن ءتىنتۋ كەزىندە ساتۋعا دايىن 300 دوزادان استام ەسىرتكى زاتى تاركىلەندى, سونىمەن قاتار جالعا الىنعان پاتەرلەردىڭ بىرىندە شامامەن 3 كەلى سينتەتيكالىق زات («مەفەدرون» جانە «الفا-PVP»), ەسىرتكى زاتتاردى وراۋ ءۇشىن قولدانىلاتىن زاتتار (ەلەكترون تارازى, zip قالتاشالار) تاركىلەندى», دەلىنگەن حابارلامادا.
قازاقستان رەسپۋبليكاسى قىلمىستىق كودەكسىنىڭ 297-بابى 3-بولىگى 5-تارماعى بويىنشا «ەسىرتكى, پسيحوتروپتىق زاتتاردى, سول تەكتەستەردى وتكىزۋ, جونەلتۋ نەمەسە وتكىزۋ ماقساتىندا زاڭسىز دايىنداۋ, ساقتاۋ, تاسىمالداۋ» بويىنشا سوتالدى تەرگەۋ باستالعان. قىلمىستىق توپتىڭ مۇشەلەرى مۇلكى تاركىلەنىپ, 15 جىلعا دەيىن باس بوستاندىعىنان ايىرىلۋى مۇمكىن.
