نارىقتىڭ تالابى قاتتى. بارلىق سالادا زامانعا ساي تۇبەگەيلى وزگەرىستەر مەن جاڭا باعىتتار تاڭدالدى. بۇرىن شەتەلدىكتەرگە عانا ءتان بولىپ كەلگەن ءومىر ءسۇرۋ داعدىلارى, قىزمەت كورسەتۋ جانە تۇتىنۋ تەتىكتەرى باسقاشا سيپاتقا يە بولدى.
وزگەرىس لەبى مەديتسينا سالاسىن دا قاعىس قالدىرعان جوق. ورتادا باسەكەلەستىك پايدا بولىپ, ەمدەلۋشىگە ساپالى جانە ءتيىمدى قىزمەت كورسەتۋدە شىن جۇيرىكتەر, ءىستى ءتيىمدى ۇيىمداستىرا العاندار عانا تاڭدالاتىن كەزەڭ كەلدى. زامان باعىتىن الدىمەن اڭعارعان رەۆماتولوگ, رەابيليتولوگ دارىگەر سارا شاجايقىزى ءدۇسىپوۆا ءوز باعىتىن ەرتەرەك تاڭدادى.
اقتوبە مەملەكەتتىك مەديتسينا ينستيتۋتى «ەمدەۋ ءىسى» فاكۋلتەتىنىڭ 1992 جىلعى تۇلەگى سارا شاجايقىزى ءوزى العاش ەڭبەك جولىن باستاعان اقتاۋ قالاسىنداعى №1 ەمحانادا 20 جىلعا جۋىق ەڭبەك ەتە ءجۇرىپ, شەتەلدىك مەديتسينانىڭ دامۋى مەن وتاندىق مەديتسينانىڭ بەتالىسىن باقىلاپ, سالىستىرۋدى ەستەن شىعارعان جوق. ناتيجەسىندە, 2012 جىلى «اقەركە» اتاۋىمەن جەكە ەمدەۋ ورتالىعىن اشىپ, ءوز بەتىنشە مەديتسينالىق قىزمەتتى باستادى.
– بۇل قادامعا ءبىر جاعى تۇرمىستىق قاجەتتىلىكتەن بارعانىمدى جاسىرمايمىن. وتاعاسىم مارقۇم بولعان سوڭ ماعان نەبارى 25 مىڭ تەڭگە زەينەتاقى تاعايىندالدى. بۇل قاراجاتقا بەس بالانى باعىپ-قاعىپ, وقىتۋدىڭ قيىن ەكەندىگى ايتپاسام دا تۇسىنىكتى. كەيىن قايتا ەسەپتەتكەنىمىزدە 97 مىڭ تەڭگە ءتيىستى بولدى. بىراق مۇنىڭ ءوزى ءبىزدىڭ وتباسىنىڭ قاجەتىن تولىق وتەمەيتىن ەدى, – دەپ ەسكە الادى س.ءدۇسىپوۆا.
الدىمەن ساپالى قىزمەت كورسەتۋدى, اۋرۋ جانعا قامقور بولۋدى ويلاعان ول توڭىرەگىنە ساۋاتتى, تانىمال, بىلىكتى-ءبىلىمدى مامانداردى توپتاستىرا باستادى. ارادا 6 جىل وتكەندە «دامۋ» قورىنىڭ قولداۋىمەن ءزاۋلىم عيماراتتى تولىق ساتىپ الىپ, ەمحانانىڭ قىزمەت كورسەتۋ اۋقىمىن كەڭەيتە ءتۇستى. بۇرىن شاعىن عيماراتتا ورنالاسقان كلينيكا ەندى ءوز الدىنا زاماناۋي عيماراتقا يە بولۋمەن قاتار تۇرعىندارعا جان-جاقتى جانە ساپالى قىزمەت كورسەتۋدى باستى ورىنعا قويدى, وسىلايشا, «ەركەمەد» كوپسالالى مەديتسينالىق ورتالىعى نىعايا ءتۇستى. كەلەسى جىلى مەملەكەتتىك كونكۋرسقا قاتىسىپ, ەمحانا قىزمەتىن كورسەتۋگە ارنايى رۇقساتقا قول جەتكىزدى.
قازىرگى تاڭدا اقتاۋدا «اقەركە» مەن «ەركەمەد» جەكە ەمحانالارىن بىلمەيتىن ادام جوق. 50% جوعارى ساناتتى دارىگەرلەر, جالپى 200-گە جۋىق ادام قىزمەت كورسەتەتىن كلينيكا زاماناۋي اپپاراتتارمەن جابدىقتالعان.
– دارىگەرلەرىمىز اراسىندا تاجىريبەلى ماماندار دا, بولاشاعىنان ءۇمىت كۇتتىرەتىن جاستار دا جوق ەمەس. جوعارى ساناتتاعى دارىگەر, رەسەي, لاتۆيا ەلدەرىندە ءبىلىمىن جەتىلدىرگەن گاستروەنتەرولوگ, اللەرگولوگ, پەدياتر بيبىگۇل جايىلعانوۆا, وڭالتۋ ورتالىعىنىڭ باس مامانى, جوعارى ساناتتى رەابيليتولوگ-دارىگەر سالامات نۇرماقوۆ, جاس تا بولسا باس مامان, ءوز ءىسىنىڭ شەبەرى, ايەلدەرگە وتا جاساعاندا جانە بەدەۋلىكتىڭ الدىن الۋدا ىزدەنىسپەن جۇمىس ىستەيتىن گينەكولوگ جۇلدىز جەتكەربايقىزى, لور جانە جوعارى ساناتتاعى جالپى ەمدەۋ دارىگەرى لاريسا اللابەرگەنوۆا, «ەركەمەد» ەمحاناسىنىڭ باس دارىگەرى, ءوز ءىسىنىڭ شەبەرى, مىقتى ستراتەگ ماگيستر سەرىك قاسىم تورەحان ۇلى مەن باس دارىگەردىڭ ەمدەۋ ءىسى بويىنشا ورىنباسارى بوتاگوز قۋانىشقىزى – ەمحانانىڭ دا, ەلدىڭ دە بەلدى, بەدەلدى دارىگەرلەرى. دارىگەرلەرىمىزدىڭ ءبىلىمىن, تاجىريبەسىن ارتتىرىپ, زاماناۋي اپپاراتتارمەن جۇمىس ىستەي الاتىن مامان بولۋى ءۇشىن قولداۋ كورسەتۋدى ۇمىتپايمىز, – دەيدى س.ءدۇسىپوۆا.
بيىل ناۋرىز ايى باستالىسىمەن 4 دارىگەر دەمالىسسىز جۇمىس ىستەيتىن «چەكاپ» ەكسپەرتتىك ەندوسكوپيا ورتالىعى اشىلدى. پاتسيەنتتى 5-7 مينۋتقا ۇيىقتاتىپ, وڭەش, تىك ىشەكتى قارايتىن, وڭەشتى كەڭەيتىپ باللون قوياتىن, قاتەرلى ىسىكتى الدىن الا انىقتايتىن, تىنىس الۋ جولدارىنا تۇسكەن بوگدە نارسەلەردى الاتىن, كىسى اعزاسىن تولىق تەكسەرۋدەن وتكىزەتىن مۇنداي اپپارات ازىرگە اقتاۋدا جوق. ال گينەكولوگيالىق, پلاستيكالىق باعىتتا كەسپەي وتا جاسايتىن لاپاروسكوپ بيىل ءساۋىر ايىنان باستاپ قولدانىلا باستادى. وزونمەن, لازەرمەن ەمدەۋ ارقىلى قاندى سۇيىلتىپ, ينفاركت, ينسۋلت اۋرۋلارىنىڭ الدىن الۋعا قولدانىلاتىن اپپارات تا وبلىس بويىنشا تەك «اقەركە» ەمحاناسىنىڭ ەنشىسىندە. ەمحانانىڭ ارنايى اپپاراتتارمەن جان-جاقتى اللەرگيالىق تەستتەر جاساپ, گاستروەنتەرولوگيا, كارديولوگيا بويىنشا تولىق تەكسەرۋدەن وتكىزۋگە مۇمكىندىگى بار. بۇگىندە ماڭعىستاۋ وبلىسى بويىنشا 15 مىڭنان استام ادام تىركەلگەن ەمحانانىڭ اتىراۋ, ورال, اقتوبە قالالارىندا دارىگەرلىك تەكسەرىستەن وتكىزەتىن بولىمشەلەرى بار. اقتاۋدا بولىمشەلەرىن اشقان ەمحانا باسشىلىعىنىڭ الدىنا قويعان ارمان-جوسپارلارى از ەمەس. سولاردىڭ ءبىرى – ماڭعىستاۋ وبلىسىنىڭ بەينەۋ, تۇپقاراعان جانە ماڭعىستاۋ اۋداندارىنان ءوز بولىمشەلەرىن اشۋ.
«ەركەمەد» – ماڭعىستاۋ وبلىسى بويىنشا قازاقستان رەسپۋبليكاسىندا مەديتسينالىق-سانيتارلىق العاشقى كومەكتى دامىتۋ جونىندەگى 2019-2020 جىلدارعا ارنالعان ءىس-شارالار جوسپارىن بەكىتۋ تۋرالى بۇيرىققا سايكەس اشىلعان العاشقى ەمحانا. «ەركەمەدتە» مەملەكەتتىك تاپسىرىس نەگىزىندە قىزمەت كورسەتىلەدى. مەديتسيناداعى قارقىندى دامۋ ۇردىسىنە ىلەسۋ ءۇشىن ءبىلىم جەتىلدىرۋ, بىلىكتىلىك ارتتىرۋ ءىس-شارالارىنان ءوزى دە, دارىگەرلەرى دە قالىس قالمايتىن سارا شاجايقىزى كىتاپتارعا ەنىپ, مەملەكەت باسشىسىنىڭ, وبلىس اكىمىنىڭ العىسحاتتارىنا يە بولعان دارىگەر. ۇلتتىق قۇندىلىقتاردى قاستەرلەپ, ءوڭىردىڭ الەۋمەتتىك-ەكونوميكالىق دامۋىنا ولشەۋسىز ۇلەسىن قوسىپ جۇرگەن سارا ەلدىك ءىس-شارالاردان تىس قالمايدى.
وتاعاسى دوسان ەشمانوۆتى ماڭعىستاۋدا بىلمەيتىن ادام كەمدە-كەم. تاجىريبەلى مۇنايشى ءبىلىم سالاسىنا كەلىپ اقتاۋ قالاسىنداعى پوليتەحنيكالىق كوللەدجدى ابىرويلى باسقارىپ, بىرنەشە جۇزدەگەن جاس ماماننىڭ ساۋاتتى تەحنيكالىق ماماندىق الۋىنا سەبەپشى بولدى. وبلىستىق ءبىلىم باسقارماسى باسشىسىنىڭ ورىنباسارى بولىپ قىزمەت اتقارىپ ءجۇرىپ اياقاستىنان ءاپ-ساتتە و دۇنيەگە اتتانىپ كەتە باردى. سوڭىندا قالعان ۇلپەرشەكتەي بەس قىزىن سارا جابىرقاتپاي ءوسىرىپ, قالاعان ماماندىقتارىنا قول جەتكىزۋىنە كۇش سالدى. تۇڭعىشى ينجەنەر جانە قارجىگەر ماماندىقتارىن يگەرگەن قاراكوز – «ەركەمەد» ەمحاناسىنىڭ قۇرىلتايشى ديرەكتورى, ءارى قارجى سالاسى بويىنشا باسقارۋشى, ءمولدىر – سانكت-پەتەربۋرگ مەديتسينالىق ۋنيۆەرسيتەتىنىڭ 5-كۋرس ستۋدەنتى, بولاشاق پلاستيكالىق حيرۋرگ, ىڭكار قازاق-ورىس مەديتسينا ۋنيۆەرسيتەتىنىڭ 2-كۋرسىندا وقىسا, مەرۋەرت پەن اقەركە – مەكتەپ وقۋشىلارى.
ادال ەڭبەكپەن, اقىل-بىلىممەن ەلگە قىزمەت ەتكەن جانە جۇرت ىقىلاسىنا بولەنگەن سارا شاجايقىزى باستاعان ۇجىمنىڭ الدىنا قويعان مىندەتتەرى ايقىن ءارى اۋىر. بۇل مىندەتتەردىڭ جۇزەگە اسۋى حالىق ءۇشىن ماڭىزدى.
ماڭعىستاۋ وبلىسى
