جەلتوقسان ايىنىڭ باسىندا ءوزىم ەمدەلەتىن ەمحانادان ءتيىستى تەگىن دارىلەرىمدى الماقشى بولىپ بارعانىمدا ءدارىحانا قىزمەتكەرى: ء«دارى جوق, ونى الۋعا اقشا جوق», دەدى. سودان ىشىمنەن بيۋدجەتتەن قارجى ءبىر جىلعا دەپ بولىنەدى. سوندا ەكى-ءۇش ايدىڭ اقشاسى قايدا كەتتى ەكەن دەپ ويلادىم. ال ءتىلىمنىڭ ۇشىنا ناقتى نە كەلگەنىن ايتپاي-اق تۇسىنۋگە بولاتىنى انىق. ويتكەنى اسا تەرەڭدەپ كەتكەندىكتەن, بىزدە جەمقورلىق دەگەن پالەكەتتىڭ تامىرىنا بالتا شابۋ وڭاي شارۋا بولماي تۇر. قازاقتا ء«ۇش جىلدىعىن ويلاماعان ەركەكتەن بەز...» دەگەن ءسوز بار. ال بۇل شەنەۋنىكتەر ءۇش جىل تۇگىلى, كەلەسى جىلدىڭ دارىلەرىن دە ۇزدىكسىز الىپ تۇرۋدى ويلاي قويمايتىن سياقتى. سوندا اۋرۋ ادام ءدارى ىشپەۋى كەرەك پە, الدە از عانا زەينەتاقىسىنان جىرىپ ءدارى ساتىپ الۋى كەرەك پە؟ مىسالى, مەن كۇنىنە بەس-التى ءتۇرلى ءدارى ىشەمىن. ءدارىحانا بەرمەگەن سوڭ دارىلەردى ساتىپ الۋعا ءماجبۇر بولا باستادىم. ءار ءدارىنىڭ قۇنى ءۇش مىڭ تەڭگەگە تاياۋ. ەسەپتەي بەرىڭىز...
ەكىنشى ماسەلە, تابانجولداردىڭ اسا تايعاق ەكەنى. جاياۋ ءجۇرۋ مۇمكىن ەمەس. مەن امالسىزدان كولىك جۇرەتىن جولدىڭ شەتىمەن جۇرۋگە تىرىسامىن. ءبىر جاعىنان كولىك قاعىپ كەتپەس پە ەكەن دەپ قورقامىن. جول قىزمەتىنىڭ ءبىر جۇمىسشىسىنان نەگە جاياۋ جۇرگىنشىلەردىڭ جولىن مۇزدان تازارتپايسىڭدار دەپ سۇراپ ەدىم, پروبلەمانى بىلەمىز, تۇز جوق, دەگەن جاۋاپ الدىم. ەلىمىزدە, جالپى الەمدە نە كوپ, تۇز كوپ ەمەس پە؟!
بىزدە ءبىر جامان ادەت بار, وقيعا بولعاننان كەيىن عانا ويلانا باستايمىز. بۇل جاعدايدا دا ءبىراز ادامنىڭ قۇلاپ, مايىپ بولۋىن توسىپ جۇرگەن سياقتىمىز. جولعا جاۋاپ بەرەتىن باسشىلار ۇكىمەت ادامدارى عوي, ولار ەل پرەزيدەنتىنىڭ حالىقتى ەستيتىن مەملەكەت قۇرايىق. ۇكىمەت ادامدارى حالىقتىڭ مۇڭ-مۇقتاجىنا قۇلاق قويىپ, تەز ارادا شەشۋ جولدارىن قاراستىرۋلارى ءتيىس, دەگەن سوزدەرىن ەستىمەي مە الدە؟
وسىنداي كەمشىلىكتەردى ءار سالادان تابۋعا بولادى. سوندىقتان ءوز ىسىنە جاۋاپسىز باسشىلاردان قۇتىلۋ كەرەك نەمەسە ولارعا قاتىستى قاتاڭ شارالار قولدانۋ قاجەت. اسىرەسە استانا باسقا قالالارعا ۇلگى بولۋى كەرەك قوي. مۇنى مەنىڭ قالا تۇرعىنى رەتىندەگى جانايقايىم دەپ تۇسىنىڭىزدەر.
حاميلا قۇلبەكقىزى,
زەينەتكەر
نۇر-سۇلتان
