قحل-دىڭ «شىعىس» كونفەرەنتسياسىندا ونەر كورسەتكەن «بارىس» بيىلعى تۇراقتى بىرىنشىلىكتە جالپى سانى 47 ويىن وتكىزىپ, سونىڭ تەك 14-ىندە عانا ءوز جانكۇيەرلەرىن قۋانتتى. ءتورت ويىندا قارسىلاسىنان وۆەرتايمدا باسىم تۇسسە, تاعى ءتورت كەزدەسۋدە بۋلليت سەرياسىندا باعى جاندى. ال ەكى رەتتەن وۆەرتايمدا جانە بۋلليتتە جەڭىلىسكە ۇشىرادى. سونداي-اق 21 ماتچتا قارسىلاستارىنا جول بەردى. «بارىس» حوككەيشىلەرى وسى 47 ويىندا قارسىلاس كوماندانىڭ قاقپاسىن 127 مارتە ءدال كوزدەسە, 138 رەت ءوز قاقپاسىنان شايبا الىپ شىعۋعا ءماجبۇر بولدى.
بۇل – «بارىستىڭ» وسى ماۋسىمدا كورسەتكەن ناتيجەسىنىڭ قىسقاشا ستاتيستيكاسى. ال جۋىردا كوماندانىڭ پرەزيدەنتى بوريس يۆانيششەۆ پەن باس جاتتىقتىرۋشى يۋري ميحايليس ماۋسىمدى قورىتىندىلاپ, ءوز ويلارىن ورتاعا سالدى.
– بيىلعى ماۋسىم ءبىز ءۇشىن ءساتتى ءوتتى دەپ ايتا المايمىن. وكىنىشكە قاراي, كەيىنگى ەكى جىلدا جارقىراپ ونەر كورسەتۋىمىزگە ءارتۇرلى سىرتقى فاكتورلار ءوز اسەرىن تيگىزبەي قويمادى. مىنە, وسى جولعى ماۋسىم بارىسىندا ەل ىشىندە دە, حالىقارالىق ارەنادا دا وتە ماڭىزدى وقيعالار بولدى. سول وقيعالاردان كەيىن ازداپ ەس جيۋ قيىنعا تۇسكەنى جاسىرىن ەمەس. بىراق ءبىز تۋىنداعان بارلىق قيىندىقتى ءوز پايدامىزعا قاراي شەشتىك دەپ ويلايمىن. بۇل ءۇشىن كلۋبتىڭ بارلىق قىزمەتكەرىنە العىس ايتقىم كەلەدى. مۇمكىن, باستى ماسەلە – ماۋسىمنىڭ بىرقالىپتى دەڭگەيدە وتكەنىندە بولسا كەرەك. ارينە, بۇل جەردە ەكى جىلدان بەرى جالعاسىپ جاتقان پاندەميانى دا ەسكەرۋ قاجەت. ماۋسىم بارىسىندا حوككەيشىلەرىمىز بەن قىزمەتكەرلەرىمىز ۆيرۋس جۇقتىرىپ, كومانداعا كومەكتەسە الماي قالعان كەزدەر بولدى. بۇل جاتتىعۋ پروتسەسىنە دە, تىكەلەي جۇمىسىمىزعا دا كەرى اسەر ەتتى. جاڭا جىلعا قاراي بىزدە ءبارى قالپىنا كەلگەندەي بولعان ەدى. ويىنشىلاردىڭ فيزيكالىق جاعدايى مەن جەڭىسكە دەگەن ۇمتىلىسى زور بولعان-دى. ءبىز جۇيەلى تۇردە ءار ويىندا جەڭىسكە جەتىپ, مەيلىنشە جوعارى ورىن ءۇشىن كۇرەسۋگە دايىن بولدىق. بىراق جاڭا جىلدان كەيىن تۇراقتى بىرىنشىلىكتىڭ قالعان بولىگى اۋەلى ۆيرۋسقا, كەيىننەن وليمپيا ويىندارىنا بايلانىستى توقتاتىلىپ, اقىر سوڭى مەرزىمىنەن بۇرىن اياقتالىپ تىندى. وسى ۋاقىت ارالىعىندا حوككەيشىلەر ويىن تاجىريبەسىنسىز قالدى. پلەي-وفف ويىندارى باستالعانعا دەيىن ءۇش باقىلاۋ كەزدەسۋىن وتكىزۋگە مۇمكىندىك الدى. بۇل دا كومانداعا ءسال دە بولسىن ويىن تاجىريبەسىن جيناقتاۋعا جاقسى كومەگىن تيگىزدى, – دەدى «بارىستىڭ» پرەزيدەنتى.
سونداي-اق بوريس يۆانيششەۆ باپكەرلەر قۇرامىنىڭ جۇمىسىنا كوڭىلى تولاتىنىن جانە ولارعا تاعاتىن ەشقانداي كىنا جوق ەكەنىن جەتكىزدى. «سەبەبى بيىلعى ماۋسىم الدىندا كومانداعا جانە باپكەرلەر قۇرامىنا پلەي-وفف كەزەڭىنە دەيىن جەتۋ مىندەتى قويىلعان بولاتىن. كوماندا بۇل مىندەتتى تولىعىمەن ورىندادى. بىراق پلەي-وفف كەزەڭىنىڭ ءبىرىنشى
راۋندىنان ارىعا اسا الماعانىمىز وكىنىشتى. ويتكەنى بىرقاتار ويىنشى جاراقاتىنا بايلانىستى كومانداعا كومەكتەسە المادى. دەگەنمەن, پلەي-وفف باسەكەسىنىڭ ءوز مۇزايدىنىمىزدا وتكەن ويىندارىندا جاقسى ويىن كورسەتۋىمىز كەرەك ەدى. جانكۇيەرلەر دە, مەن دە ويىنشىلاردان سونى كۇتتىك. بىراق بۇل – حوككەي. ءبارى ءبىز ويلاعانداي بولا بەرمەيدى عوي», دەدى ول.
بوريس يۆانيششەۆ الداعى ماۋسىمدا ميحايليس-ۆولك-ليليا ۇشتىگى مەن بارلىق قازاقستاندىق ويىنشىلاردى كوماندادا ساقتاپ قالعىسى كەلەتىنىن جەتكىزدى. الايدا قحل ماۋسىمى ءالى ءوز مارەسىنە جەتپەگەندىكتەن جانە ازىرشە ليگا باسشىلارىنىڭ تالابى مەن لەگيونەر سانىن قىسقارتۋ-قىسقارتپاۋى دا بەلگىسىز بولعاندىقتان, بارلىق سۇراقتىڭ جاۋابى تەك ماۋسىم سوڭىندا عانا بەلگىلى بولماق.
– پرەزيدەنت قاسىم-جومارت توقاەۆتىڭ مەملەكەت بيۋدجەتى ەسەبىنەن كاسىبي سپورت كلۋبتارىن قارجىلاندىرۋدى قىسقارتۋ تۋرالى تاپسىرماسىنان كەيىن كوماندا بيۋدجەتى ءبىراز قىسقارتىلدى. دوللاردىڭ تەڭگەگە قاتىستى باعامىنىڭ ءوسۋى دە بىزگە اسەر ەتەتىنى ءسوزسىز. ەلارالىق ۇشۋلار, قوناقۇي, كيىم-كەشەك بارلىعى شارتتى بىرلىكتەرمەن ساتىپ الىنادى. ماۋسىم تولىعىمەن اياقتالعان سوڭ الداعى جوسپارىمىزدى, كوماندا بيۋدجەتىن تالقىلايتىن بولامىز. بيۋدجەت تۋرالى ايتىلعاندا, قحل-ءدىڭ ەرەجەسىن ەسكەرۋ كەرەك بولادى. ماسەلەن, جارىس ەرەجەسىندە ويىنشىلاردىڭ تومەنگى, ورتاشا جانە جوعارى جالاقىسى قانشا بولۋ كەرەكتىگى ناقتى كورسەتىلگەن. ءبىز ازىرگە ەڭ تومەنگى جالاقىعا جاقىنبىز, بىراق كەلەر جىلى ءبىز وسى مينيمۋمنان تومەن جالاقى قوياتىن بولساق, وندا ءبىزدى ليگادان شىعارىپ جىبەرۋى مۇمكىن, – دەدى بوريس يۆانيششەۆ.
سونىمەن قاتار كوماندا باس باپكەرى يۋري ميحايليس تە بيىلعى ماۋسىمدى قورىتىندىلاپ, جەكە ويىنشىلاردىڭ شەبەرلىگى مەن ماۋسىمنىڭ ۇزدىك حوككەيشىلەرىن اتاپ ءوتتى.
– تۇراقتى بىرىنشىلىكتىڭ سوڭعى ويىندارىندا «مەتاللۋرگتەن» دە, «اۆتوموبيليستەن» دە باسىم تۇستىك. ماۋسىمنىڭ سوڭىندا حوككەيشىلەر جوعارى ەموتسيونالدى جانە فيزيكالىق كۇيدە بولدى. بىزدە تۋرنير كەستەسىنىڭ بۇدان دا جوعارى ورىندارىنا كوتەرىلەتىن مۇمكىندىك بار ەدى. وكىنىشكە قاراي, چەمپيونات بەل ورتاسىنان اۋعاندا توقتاتىلدى. تۇراقتى بىرىنشىلىكتىڭ ەكىنشى بولىگىنەن كەيىن جىگىتتەردە ءوز-وزدەرىنە دەگەن سەنىمدىلىك پايدا بولا باستادى. بالكىم, جاڭادان كەلگەن ويىنشىلار سول كەزدە ءبىر-بىرىنە ۇيرەنىسكەن بولۋى كەرەك. سونداي-اق السينگ پەن ورەحوۆ ءبىر-ءبىرىن تاماشا تولىقتىرىپ وتىردى, مارتينسسون ءبىرىنشى بەستىككە اۋىسىپ, مورروۋمەن جۇپ قۇراپ ءساتتى وينادى دەپ ايتا الامىن. كوپ ساتتەردە وتە سەنىمدى ويناپ, جانكۇيەرلەردىڭ قوشەمەتىنە يە بولدىق, – دەدى باس باپكەر.
يۋري ءميحايليستىڭ پىكىرىنشە, بيىلعى ماۋسىمىنىڭ جاڭا ەسىمى – 20 جاستاعى شابۋىلشى اڭسار شايحمەددەنوۆ. ول بۇل ماۋسىمدا مۇزايدىندا ءجيى بوي كورسەتپەسە دە, ءوزىنىڭ ەڭبەكقورلىعىنىڭ ارقاسىندا باپكەرلەردىڭ كوزىنە تۇسە ءبىلدى. سونداي-اق ول پلەي-وفف كەزەڭىندە ءوزىن جاقسى قىرىنان كورسەتتى دەپ ايتا الامىز.
