كوركەم كارتينا كوڭىلدەن شىقسا, ويىڭىزدا شىر كوبەلەك اينالىپ ءجۇرىپ الادى. سۋرەتشى يۆان ءفوميچتىڭ «ماكينكا قىسى» شىعارماسى سانادا وتكەن قىستىڭ ەستەلىگىن جاڭعىرتقانداي بولدى. ۋاقىت ۇرشىعى قانشا دوڭگەلەسە دە ءار مەزگىلدە ءبىر ساعىنىش قالادى. قىلقالام شەبەرى بالالىق شاعىنىڭ باياندى ساتىنەن ءبىر ۇزىك سىر تارقاتقانداي. بۇل تۋىندىدا دا ءبىر قاسىرەت بار.
كەنەپتەن اركىم ءارتۇرلى ءتۇس كورەدى. بۇل قىستىڭ دا قىسقا بولعانى داۋسىز. ۇزاققا سوزىلعانداي كورىنگەنىمەن كوكتەم كەلگەن سوڭ كورگەن تۇستەي عانا بولىپ قالدى. ونەر يەسىنىڭ وتكەن ءومىرىنىڭ ءبىر ورنەگىندەي ماڭگى بايانىنا اينالارى انىق. كيىز ءۇي تەكتەس پىشىندە بەرىلگەن ءۇي شاتىرلارى وتكەن عاسىردىڭ كەسكىن-كەلبەتىن كوز الدىڭىزعا اكەلەدى.
شىنىندا, سۋرەتشى «ماكينكا قىسى» كارتيناسىندا تىڭ يگەرۋگە كەلگەن ەرىكتىلەر مەن ەنتۋزياستاردىڭ الدىنان شىققان تۇرمىس قيىندىقتارى مەن قاتال تابيعاتتى بەرۋگە تىرىسقان. ءبىز كارتينادان قار باسقان تۇنگى اۋىلدىڭ جاي-كۇيىن كورەمىز. ول ماكينكانى كەنەپ بەتىنە قاراڭعى اسپان, الاسا ۇيلەر, مۇرجادان بۋداقتاعان ءتۇتىن ارقىلى بەينەلەگەن. جاپالاقتاپ جاۋعان قار ۇلپىلدەپ, اينالانىڭ ءبارىن اق مامىقپەن جاۋىپ تاستاعان. باقساڭىز, كارتينا سۋىققا شومىلعانداي, ىزعىرىق اتىپ تۇرعان تابيعاتتىڭ كورىنىسىن سىيلايدى.
يۆان فوميچ سالقىن, تىنىق تۇستەردى قولدانا وتىرىپ, تىپ-تىنىش ءارى جايلى كىشكەنتاي اۋىلدىڭ بىرقالىپتى تىرشىلىگىن جەتكىزگەن. ەڭبەك ادامدارى قاقاعان ايازدى دا جەڭىپ شىعۋعا قاۋقارلى ەكەنىن باياندايدى. تۇرمىس تاۋقىمەتىن تارتقان پەندە يەسى ازاپتى سۋىقتى دا, قاندى سوعىستى دا, قاراورمان قايعىنى دا ەڭسەرەر كۇشكە يە. مولبەرتتەگى بوياۋمەن جازىلعان ماقالانىڭ ءمانى وسى.
