الىستاعى اۋىلعا, شالعايداعى اۋدانعا بارىپ, حالىقپەن بەتپە-بەت وتىرىپ سويلەسۋ, ولاردىڭ ءوتىنىش-تىلەگىن, سىن-ەسكەرتپەسىن ءوز قۇلاعىڭمەن ەستۋ – بۇل اكىمدەردى قارا حالىققا جاقىنداتا تۇسەتىن العىشارتتىڭ ءبىرى جانە بىرەگەيى.
سونداي كەزدەسۋلەردىڭ ءبىرى قىزىلجار اۋىلىندا ءوتتى. قازىرگى تاڭدا بۇل ەلدى مەكەندە 800-گە تارتا ادام تۇرادى. اۋىلدا مەديتسينالىق بەكەت بار, فەلدشەر جۇمىس ىستەيدى. بىراق مۇنداعى عيمارات جوندەۋدى قاجەت ەتەتىن ەسكى ەكەن. وسى ورايدا وبلىس باسشىسى جەرگىلىكتى جۇرتقا قۋانىشتى جاڭالىقتى جەتكىزدى. بيىل اتالعان اۋىلدا جاڭا فەلدشەرلىك-اكۋشەرلىك پۋنكتتىڭ قۇرىلىسى باستالماقشى ەكەن.
قىزىلجارداعى تاعى ءبىر ماسەلە – بوس تۇرعان سپورت زالىنىڭ جاي-كۇيى. قاراۋسىز قالعان عيمارات بۇزىلا باستاعان. كەزدەسۋدە جەرگىلىكتى تۇرعىن امانگەلدى ەسەنعالي نىساننىڭ وسىنداي كۇيگە تۇسكەنىنە قىنجىلىس ءبىلدىردى.
«بالا كەزىمنەن قىزىلجاردا تۇرامىن. وسى سپورت زالدا كۇرەسپەن اينالىستىم. تالاي چەمپيوندار شىققان التىن ۇيا ەدى. اۋىلدا سپورت زالى بولماعان سوڭ, بالالار نەمەن اينالىسارىن بىلمەي, بوس ءجۇر. ال ەندى وسى عيماراتتى جوندەپ بەرسە, ءبىز ءۇشىن بۇل ۇلكەن قۋانىشتى بولار ەدى», دەيدى ول.
ءوز كەزەگىندە وبلىس اكىمى سپورت عيماراتىن جوندەۋگە كونكۋرس جاريالانعانىن ايتىپ, قىزىلجارلىقتاردى تاعى ءبىر جاعىمدى جاڭالىقپەن قۋانتتى. ءساتىن سالسا, اتالعان سپورت زالى الداعى ۋاقىتتا ادام تانىماستاي كۇيگە ەنەتىن بولادى دەپ سەندىردى ول.
راستوۆكا اۋىلىندا تۇرعىندار مەكتەپ-ينتەرناتتا جۇرگىزىلگەن جوندەۋ جۇمىستارى ساپاسىنىڭ كوڭىل كونشىتپەيتىنىن ايتىپ, سونداي-اق ءبىلىم ورداسىنداعى پەداگوگيكالىق كادرلاردىڭ تاپشىلىعىن دا تىلگە تيەك ەتتى.
وسى جايتتان حاباردار بولعان وبلىس اكىمى جوندەۋ جۇرگىزگەن مەردىگەردىڭ جۇمىسىن باعالايتىن كوميسسيا قۇرۋ قاجەتتىلىگىن ايتتى.
«بارلىق كەمشىلىكتى كومپانيا كەپىلدىك بويىنشا جويۋى كەرەك», دەپ شەگەلەدى ول.
جالپى, اتالعان اۋىلدا ىشكى جولدار اسفالتتالىپ جاتىر ەكەن. ءبىرازى بىلتىر ىسكە اسىرىلسا, قالعانى بيىل اياقتالۋى ءتيىس.
ال بوتاقارا مادەنيەت ۇيىندە وتكەن كەزدەسۋگە اۋدان ورتالىعىنىڭ عانا ەمەس, باسقا دا اۋىلداردىڭ تۇرعىندارى قاتىسىپ, ولار وزدەرىن تولعاندىرىپ جۇرگەن سۇراقتارىن تىكەلەي قويۋعا مۇمكىندىك الدى. اسىرەسە, تۇرعىنداردى قولداعى مال جايىلاتىن جايىلىم جەرلەردىڭ جەتىسپەۋشىلىگى الاڭداتادى ەكەن. كەزدەسۋدە بۇل ماسەلەنىڭ جەر زاڭناماسى اياسىندا رەتتەلەتىنى ايتىلىپ, پايدالانىلماي جانە ءتيىمسىز پايدالانىپ كەلگەن جەرلەردىڭ مەملەكەت مەنشىگىنە قايتارىلىپ, ودان كەيىن ولار اۋىل حالقىنىڭ يەلىگىنە بەرىلەتىنى ءمالىم ەتىلدى.
سونىمەن قاتار وبلىس اكىمىمەن كەزدەسۋدە باسقا دا كوپتەگەن ماسەلەلەر كوتەرىلدى. اۋدان تۇرعىندارى ەلەكتر جۇيەلەرىنىڭ الاڭداتارلىق جاعدايى, سپورتپەن اينالىسۋعا ورىن جەتىسپەۋشىلىگى, قۇرىلىس جانە جوندەۋ جۇمىستارىنىڭ جايى سياقتى باسقا دا تولىپ جاتقان الەۋمەتتىك-ەكونوميكالىق پروبلەمالاردان باستاپ مال ۇرلىعىنىڭ ازايماي تۇرعاندىعىنا دەيىنگى ماسەلەلەردى اشىپ ايتتى. تۇرعىنداردى مۇقيات تىڭداعان وبلىس اكىمى جەڭىس قاسىمبەك بىرقاتار ماسەلەلەردى سول جەردە بىردەن شەشىپ, ال قوردالانىپ قالعان جانە زەرتتەۋدى قاجەت ەتەتىن كۇردەلى پروبلەمالاردىڭ ۋاقىت وتە كەلە بىرتە-بىرتە شەشىمىن تاباتىنىنا سەندىردى.
كەزدەسۋدە وبلىس اكىمى بۇقار جىراۋ اۋدانىندا وڭ ديناميكا بار ەكەنىن اتاپ ءوتتى. تۇرعىن ۇيلەر سالىنىپ, جولدار جوندەلۋدە.
«مىسالى دوسكەي اۋىلىندا بەس قاباتتى ەكى ءۇيدىڭ كۇردەلى جوندەۋ جۇمىستارى اياقتالىپ قالدى. سونداي-اق وبلىستىق باسقارمالار ەسەبىنەن تاعى ءۇش ءۇي قالپىنا كەلتىرىلەدى. اۋداندا «اۋىل – ەل بەسىگى» ارنايى جوباسىنىڭ ارقاسىندا اۋىلداردىڭ ينفراقۇرىلىمى جاقسارۋدا. بىراق شەشىلمەگەن ماسەلەر دە از ەمەس. وسى كەزدەسۋدىڭ قورىتىندىسى بويىنشا ايتىلعان ۇسىنىستار مەن ءوتىنىش-تىلەكتەر ەسكەرىلە وتىرىپ, ءىس-شارالار جوسپارى ازىرلەنەتىن بولادى. كەلەسى كەزدەسۋدە نە ىستەلگەنى تۋرالى ەسەپ بەرەتىن بولامىز», دەدى ج.قاسىمبەك.
جالپى ەسەپتىك كەزدەسۋگە قاتىسقان اۋدان حالقى جاڭا فورماتتاعى جۇزدەسۋدىڭ كوڭىلدەن شىققانىن ايتتى. سولاردىڭ ءبىرى – بوتاقارا كەنتىنىڭ تۇرعىنى راۋشان ساعاندىقوۆا ءوزىنىڭ پىكىرىن بىلايشا ءبىلدىردى.
«قەزدەسۋدە مەن جەرلەستەرىمنىڭ پروبلەمالارى تۋرالى ايتىپ بەردىم. اكىمنىڭ ەسەبىنە ءبىرىنشى رەت كەلىپ وتىرعان جوقپىن. وسىنداي كەزدەسۋلەر كوپ بولۋى كەرەك. بۇكپەسىز, اشىق ديالوگ بولدى. ءبىزدىڭ ماسەلەلەرىمىز شەشىلەدى دەپ ۇمىتتەنەمىز. حالىققا جاقىن بولۋ – بۇل وتە جاقسى. مۇنداي كەزدەسۋلەر بيلىككە دەگەن سەنىمدى ارتتىرادى», دەپ اعىنان جارىلدى اۋدان تۇرعىنى.
