ينفوگرافيكانى جاساعان امانگەلدى قياس, «ەQ»
مەملەكەت باسشىسى جولداۋ بارىسىندا «ۇلتتىق قوعامدىق سەنىم كەڭەسى ءوز مىندەتىن تابىستى اتقاردى. ەندى ونىڭ ورنىنا قۇرامى جاعىنان اۋقىمدى ۇلتتىق قۇرىلتاي قۇرۋدى ۇسىنامىن. جاڭا قۇرىلىم ۇلتتىق كەڭەستىڭ قىزمەتىن جالپىحالىقتىق دەڭگەيدە جالعاستىرادى», دەدى. التايدان اتىراۋعا دەيىنگى ەن دالادا اتتىڭ جالىندا, تۇيەنىڭ قومىندا كۇن كەشكەن اتا-بابامىزدىڭ كۇنى كەشەگى باي, ومىرلىك تاجىريبەسىن اقىل تارازىسىنا سالىپ ەكشەسەڭىز, ەلدىك, جالپى جۇرتقا قاتىستى كەلەلى شارۋاسىن قابىرعاسىمەن كەڭەسىپ شەشكەن ەكەن. ءبىراۋىزدى بولۋى, التى الاشتىڭ اجىراماس بىرلىگى, باقۋاتتى تىرلىگى ءار كوكىرەكتەگى تىلەك پەن نيەتتىڭ ءبىر ارنادا تابىسۋىنان. بالكىم سودان بولار, «كەلىسىپ پىشكەن تون كەلتە بولماس» دەگەن اتالى ءسوز كەيىنگى ۇرپاقتىڭ بويىنا ءنار, ساناسىنا ساۋلە ۇيالاتاتىن ۇلاعات بولىپ قالعان.
ءبىزدىڭ وبلىستىق ارداگەرلەر كەڭەسىنىڭ ەسەبىندە 112 مىڭ زەينەتكەر بار. ولاردىڭ ارقايسىسى كۇنى كەشە وتان يگىلىگى ءۇشىن بويىنداعى بار قاجىر-قايراتىن, اقىل-پاراساتىن ايانباي جۇمساعان ادامدار. ەلدىك شارۋاعا كەلگەندە ءبىر جەڭنەن قول, ءبىر جاعادان باس شىعارىپ, سۇتتەي ۇيىعان ۇيىمشىلدىعىن تانىتىپ كەلدى. ارداگەرلەر اراسىنداعى بەلسەندىلەر ەل ىشىندەگى وتكىر ماسەلەلەرگە نازار اۋدارىپ, حالىق پەن بيلىكتىڭ اراسىنداعى التىن كوپىرگە اينالىپ, بىرلىكتى بەكەمدەي تۇسۋدە. جاڭا قازاقستاندى قۇرۋ جولىندا قارەكەت ەتكەن كەزدە, ومىرلىك تاجىريبەسى مول ادامداردىڭ پايىمدى پاراسات بيىگىنەن تابىلاتىن بىلىگى مەن ءبىلىمىن پايدالانۋ وتە ماڭىزدى. كۇنى ەرتەڭ ۇلتتىق قۇرىلتاي بارىسىندا ەل مەرەيىن وسىرەر ۇلى ىستەردىڭ باستاۋ كوزى اشىلىپ, ساتىمەن ساباقتالار تۇستا بۇرىنعىنىڭ بايىپتى تاجىريبەسى, ەرەن ەڭبەك ءداستۇرى, ەلدىكتىڭ مارتەبەسىن وسىرەر ىلكىمدى ءىس-ارەكەتى جالعاسىن تابۋى كەرەك دەپ ويلايمىن. بۇل جەردە جەكەنىڭ ەمەس, جالپىنىڭ ماسەلەسى قارالۋى كەرەك. تۇتاس ەلدىڭ شارۋاسىنىڭ تۇيتكىلدى تۇسى كورسەتىلىپ, ودان شىعار وڭتايلى جول نۇسقالسا, قۇبا-قۇپ.
ەل بولعان سوڭ ارينە, ايتىلۋعا ءتيىستى ءماندى ماسەلەلەردىڭ بولاتىندىعى انىق. سول ماسەلەلەر ۋشىقپاي, ۋاقتىلى شەشىلىپ وتىرسا, بۇقارا حالىق تاراپىنان وكپە-ناز ورشىمەس ەدى. قۇرىلتاي مۇشەلەرى ءار ايماقتان بولعانى ءجون. ولار ءوز وڭىرلەرىندەگى ەڭ ءبىر وتكىر, وزەكتى ماسەلەلەردى جاقسى بىلەدى ەمەس پە؟ مىنە, سول كوتەرۋگە تۇراتۇعىن تاقىرىپتاردى جان-جاقتى ويلاستىرىپ, ەل مۇراتىن كوكسەگەن قۇرىلتايدا ورتاعا سالىپ تالقىلاسا, ورىن الىپ وتىرعان ولقىلىقتىڭ ورنىن تولتىرۋعا سەپتەسسە, بۇل ءبىزدىڭ بىرلىگىمىزدى كورسەتەر ەدى. اتام قازاق «اۋرۋىن جاسىرعان ولەدى» دەگەن. ءسال قاتتىلاۋ ايتىلعانىمەن, شىندىق. قاۋمالاعان قالىڭ ەلدىڭ كوكەيىندەگى سۇراقتار ايتىلۋعا ءتيىستى. سوندا عانا وعان كوڭىل اۋدارىلىپ, ساتىمەن شەشىلمەك.
قۇرىلتاي بارىسىندا كوتەرىلگەن ەلدىك, مەملەكەتتىك ماسەلەلەر قاتتالىپ, ءتيىستى ورىندارعا تابىس ەتىلسە, نۇر ۇستىنە نۇر. شارۋانىڭ شەشىلگەن, شەشىلمەگەنى تۋرالى ەلگە ەسەپ بەرىپ وتىرسا, ارتىقتىعى بولماس ەدى. بىزدىڭشە قۇرىلتايدىڭ ەڭ باستى مىندەتى – بولاشاق قامىن قاۋزاۋ. ەل بىرلىگىنە, ىنتىماققا اسەر ەتۋ. ىنتىماق بار جەردەن ىرىس قاشپايدى.
عوسمان تولەعۇل,
جازۋشى, اقمولا وبلىستىق ارداگەرلەر كەڭەسىنىڭ توراعاسى
