ايماقتار • 25 ناۋرىز، 2022

ەكولوگيا ءمينيسترى پەتروپاۆلداعى اپات بولعان جىلۋ ورتالىعىنا باردى

سولتۇستىك قازاقستان وبلىسىنا كەلگەن ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشەۆ پەتروپاۆلداعى جاقىندا اپات بولعان جىلۋ-ەلەكتر ورتالىعىنا باردى، دەپ حابارلايدى Egemen.kz.

ارمان ماناربەك ۇلى

«ەكولوگيا، گەولوگيا جانە تابيعي رەسۋرستار مينيسترلىگىنىڭ جانە ءوز اتىمنان قازا تاپقان ايەلدىڭ وتباسىنا، تۋعان-تۋىستارىنا قايعىرىپ كوڭىل ايتامىن. اۋىر قاسىرەت. جىلۋ-ەلەكتر ورتالىعىنىڭ جۇمىسشىلارىنا بار جاقسىلىقتى جانە جەمىستى ەڭبەك تىلەيمىن»، دەدى سەرىكقالي برەكەشوۆ.

ەكولوگيا ءمينيسترىنىڭ ايتۋىنشا، پەتروپاۆلداعى جىلۋ-ەلەكتر ورتالىعى وڭىردەگى اۋانى ەڭ كوپ لاستايتىن كاسىپورىنداردىڭ ءبىرى.

اتموسفەراعا تارالاتىن بارلىق زالالدى شىعارىندىلاردىڭ 70%-ى وسى ورتالىققا تيەسىلى.

«بىلتىر 40 مىڭ تونناعا جۋىق، بيىل 25 مىڭ توننا اۋاعا زياندى زاتتار تاراعان. جىلۋ ورتالىعىندا كۇل ۇيىندىسىنە قاتىستى دا ماسەلە بار. باس ديرەكتوردىڭ ايتۋىنشا، كاسىپورىننان جىلىنا 1 ملن توننادان استام كۇل شىعادى. بۇل دا شەشىمىن تابۋى ءتيىس ۇلكەن ماسەلە.

قازىرگى ۋاقىتتا كاسىپورىن كۇلدى جاي عانا توگىپ، ءۇيىپ جاتىر. بۇل قالدىقتى ءتيىمدى پايدالانۋدىڭ بىرنەشە جولى بار. ونى جول سالعاندا قولدانۋعا بولادى. قاراعاندى وبلىسىندا سول ماقساتتا قولدانۋدا. سونداي-اق تسەمەنت وندىرىسىندە دە پايدالانۋعا بولادى. بۇل تەحنولوگيالار بۇرىننان بار، تەك كاسىپورىنعا مۇنى قولعا الۋ قاجەت»، دەيدى سەرىكقالي برەكەشوۆ.

جىلۋ-ەلەكتر ورتالىعىندا مينيسترگە كاربون شىعارىندىسى تۋرالى، مونيتورينگ جۇرگىزۋدىڭ اۆتوماتتاندىرىلعان جۇيەسىن جانە ەكولوگيالىق كودەكستە بار وزىق قولجەتىمدى تەحنولوگيانى ەنگىزۋ بويىنشا سۇراقتار قويىلدى.

«بۇل ماسەلەلەردى الدا بىرلەسە قاراۋعا كەلىستىك، ورتاق ءبىر شەشىمگە كەلەمىز دەپ ويلايمىن. ۇزدىك قولجەتىمدى تەحنولوگيالاردى ەنگىزۋ ارقىلى اۋانى لاستايتىن زاتتاردىڭ شىعارىندىسىن ازايتۋعا بولادى. ەكولوگيالىق كودەكسكە سايكەس، كومپانيا 10 جىل مەرزىمگە كەشەندى ەكولوگيالىق رۇقسات الىپ، ەميسسيا تولەۋدەن بوساتىلادى. بىراق ءبىز ولاردى تەكسەرە الامىز، ەگەر كومپانيا ءوز مىندەتتەرىن ورىنداماسا، ايىپپۇل سالىنادى»، دەدى ەكولوگيا ءمينيسترى.

مامانداردىڭ ايتۋىنشا، قازىرگى ۋاقىتتا اپات بولعان كاسىپورىننان ەكولوگياعا كەلەر قاۋىپ جوق. ءتۇتىن مۇرجاسى قۇلاعاننان كەيىن ەكولوگيا دەپارتامەنتى سانيتارلىق-قورعانىش ايماعىندا مونيتورينگ جۇرگىزدى. اۋانى لاستايتىن زاتتاردىڭ نورمادان جوعارى شىعارىندىسى بولعان جوق. قازىر دە ماماندار باقىلاۋدا ۇستاپ وتىر. بۇدان بولەك «قازگيدرومەت» كۇندەلىكتى مونيتورينگ جۇرگىزەدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز