مىنە, وسى سۇراعى كوپ, جاۋابى از جاعداي قاراعاندىدا «شوپان اتا» مال شارۋاشىلىعى ۇلتتىق قاۋىمداستىعىنىڭ قاتىسۋىمەن وتكەن شارۋالاردىڭ وڭىرلىك قۇرىلتايىندا جان-جاقتى تالقىلاندى. سونىمەن قاتار كەزدەسۋگە قاتىسۋشىلار اۋىل شارۋاشىلىعىنىڭ وزەكتى ماسەلەلەرىن كوتەرىپ, ءوز ۇسىنىستارىن دا ورتاعا سالدى.
جالپى, قاراعاندى وبلىسىندا بارلىعى 13 مىڭنان استام اۋىل شارۋاشىلىعى قۇرىلىمى بار ەكەن. ونىڭ 12 مىڭنان استامى مال شارۋاشىلىعىمەن اينالىسادى. اۋىل شارۋاشىلىعى ماقساتىنداعى جەرلەردىڭ كولەمى 17 ملن گەكتاردان اسادى. ال جايىلىمنىڭ اۋدانى 35,5 ملن گەكتاردى قۇراسا, ەگىس القابىنىڭ اۋماعى 1,3 ملن گەكتار جەردى الىپ جاتىر.
قۇرىلتايعا قاتىسقان ءوڭىر باسشىسى جەڭىس قاسىمبەك اگروونەركاسىپتىك سەكتور ماسەلەلەرىنىڭ بۇگىندە وتە وزەكتى بولىپ تۇرعانىن جوققا شىعارمادى.
– بۇل سالاداعى ماسەلەلەر از ەمەس. ءبىز ۇنەمى شارۋالارمەن كەزدەسىپ, ولارعا كومەكتەسۋگە تىرىسامىز. بىلتىر جەمشوپ داقىلدارىن سۋبسيديالاي باستادىق. قازىرگى ۋاقىتتا وسى جۇمىستى جالعاستىرامىز, – دەدى ول.
قۇرىلتاي جۇمىسىنا ارنايى كەلگەن «شوپان اتا» قازاقستان مال وسىرۋشىلەر ۇلتتىق قاۋىمداستىعىنىڭ توراعاسى الماسبەك سادىرباەۆ ۆەتەرينارلىق دارىگەرلەردىڭ مارتەبەسىن كوتەرۋ جانە ولارعا لايىقتى جاعداي جاساۋ ماسەلەسىن كوتەردى.
– ۆەتەريناريا جۇيەسىن رەفورمالاۋ – وتە ماڭىزدى ماسەلە. دەگەنمەن, ول جەرگىلىكتى اتقارۋشى ورگاندارعا تىكەلەي بايلانىستى ەمەس. بۇل ۇكىمەت دەڭگەيىندە كوتەرىلۋى ءتيىس. ءبىز سىندارلى ۇسىنىستار جاساۋىمىز كەرەك. اتاپ ايتقاندا, ۆەتەرينارلاردىڭ ەڭبەكاقىسىن كوتەرۋدى جانە ولاردىڭ مارتەبەسىن ايقىنداۋدى ۇسىنامىز, – دەدى ا.سادىرباەۆ.
ال فەرمەرلەر بولسا, اۋىلدىق جەرلەردە شتات سانىن كوبەيتۋ قاجەتتىگىن تىلگە تيەك ەتتى.
وبلىس اكىمى جەڭىس قاسىمبەك ۆەتەرينارلىق جۇيەنى رەفورمالاۋدىڭ ماڭىزدىلىعىنا توقتالىپ, بۇل باعىتتا جەرگىلىكتى اتقارۋشى بيلىكتىڭ وعان جان-جاقتى قولداۋ كورسەتەتىنىن جەتكىزدى. وعان مىسال رەتىندە ول الدىمىزداعى ءساۋىر ايىندا جەزقازعان وڭىرىندە ۆەتەرينارلىق قىزمەت جانىنان ۆەتەرينارلىق زەرتحانانىڭ اشىلاتىنىن ايتتى. سونىمەن بىرگە وبلىستىق بيۋدجەت ەسەبىنەن وڭىردە ۆەتەرينارلىق بەكەتتەردىڭ سالىنىپ جاتقانىن دا اتاپ ءوتتى.
كەزدەسۋ بارىسىندا جەرگىلىكتى شارۋالار وزدەرىن تولعاندىرىپ جۇرگەن ءبىرتالاي سۇراققا جاۋاپ الدى. سونىمەن قاتار جيىندا اۋىل شارۋاشىلىعى جەرلەرىن الۋ ءۇشىن جاستارعا كۆوتا ءبولۋ, بيە سۇتىنەن كوسمەتولوگيالىق قۇرالدار شىعارۋ ءوندىرىسىن قولداۋ, زاماناۋي سۋ ۇنەمدەۋ تەحنولوگيالارىن ەنگىزۋ, تامشىلاتىپ سۋارۋ جۇيەسىن پايدالانۋ جانە سۋبسيديالاردى ورتا جانە شاعىن شارۋا قوجالىقتارى اراسىندا ءبولۋ بويىنشا بىرقاتار ۇسىنىستار ايتىلدى.
جالپى العاندا, ۇيىمداستىرۋشى تاراپ تا, كەزدەسۋگە قاتىسقان شارۋا قوجالىقتارىنىڭ وكىلدەرى دە قۇرىلتاي جۇمىسىنىڭ ناتيجەلى جانە سىندارلى سيپاتتى وربىگەنىن ءبىراۋىزدان اتاپ ءوتتى. جيىن قورىتىندىسىندا وبلىستاعى اتقارۋشى ورگانداردىڭ قۇزىرەتىندەگى ماسەلەلەر جەرگىلىكتى جەرلەردە شەشىمىن تابۋى ءتيىس ەكەنى باسا ايتىلدى. ال رەسپۋبليكالىق دەڭگەيگە قاتىستىلارىن ىلگەرىلەتۋ جانە وڭتايلى شەشىلۋىنە ىقپال ەتۋ قاجەت بولاتىنى قاپەرگە الىندى.
قاراعاندى
