راسىندا دا, وسىعان دەيىن قالالىق اكىمدىكتەردىڭ ء«تىلىن تابۋدى» بىلەتىن قۇرىلىس كومپانيالارىنىڭ يەلەرى مەن جەكەلەگەن كاسىپكەرلەر تەك پايدا كورۋدى ويلاپ, تۇرعىنداردىڭ تالاپ-تىلەكتەرىن ەلەپ-ەسكەرمەستەن, كوپقاباتتى تۇرعىن ۇيلەردىڭ اۋلالارىن مۇلدەم تارىلتىپ جاڭا تۇرعىن ۇيلەر مەن باسقا دا وبەكتىلەر سالماق بولىپ, اياقاستىنان داۋ-داماي تۋعىزىپ كەلدى. بۇعان ايعاق رەتىندە الىسقا بارماي-اق, بيىلعى جىلدىڭ باسىندا ەلورداداعى Highvill اstana تۇرعىن ءۇي كەشەنىنىڭ تۇرعىندارى Highvill Kazahstan جاۋاپكەرشىلىگى شەكتەۋلى سەرىكتەستىگىنىڭ بۇرىن جوسپارلانعان مەكتەپ پەن بالاباقشانىڭ ورنىنا بىرنەشە كوپپاتەرلى تۇرعىن ءۇي سالۋىنا اشىق نارازىلىق بىلدىرگەنىن ايتۋعا بولادى.
ال الماتىدا بىلتىر «جەتىسۋ-3» شاعىناۋدانىنىڭ تۇرعىندارى ءوز ۇيلەرىنىڭ جانىنان تاعى ءبىر تۇرعىن ءۇي كەشەنىن سالۋعا قارسى شىققان. ولار ونسىز دا كولىك قوياتىن ورىن جەتىسپەيتىنىنە, بالالار الاڭى جوقتىعىنا شاعىمدانعان. سونداي-اق وتكەن جىلى وڭتۇستىك استانادا ەرتەرەكتە جەر زاڭناماسىن ورەسكەل بۇزۋشىلىققا جول بەرىلۋىنىڭ سالدارىنان ەرمەنساي شاعىناۋدانىنداعى ءبىر كوپپاتەرلى تۇرعىن ءۇيدىڭ اۋلاسىنداعى بالالار الاڭىن جەكەمەنشىك يەسى بۇزىپ تاستاي جازداعان.
«قىزىم ساعان ايتامىن, كەلىنىم, سەن تىڭدا» دەمەكشى, پرەزيدەنتتىڭ قوس مەگاپوليس اكىمدەرىنە بەرگەن تاپسىرماسىن باسقا قالالاردىڭ باسشىلارى دا قاپەرلەرىنە السا, قۇبا-قۇپ. ويتكەنى قۇرىلىس زاڭناماسىن بۇزۋ دەرەكتەرى وڭىرلەردەگى تالاي شاھاردان تابىلىپ جاتقانى بەلگىلى.
ماسەلەن, بىلتىر اتىراۋ قالاسىنداعى «گاۋھارتاس» تۇرعىن ءۇي كەشەنىنىڭ تۇرعىندارى وزدەرى قارجى جيناپ, بىرلەسىپ ورناتقان بالالار الاڭىنىڭ ورنىنا ونىڭ ورنالاسقان جەرىن بۇدان ون جىل بۇرىن ساتىپ العان قۇرىلىس كومپانياسىنىڭ جاڭا تۇرعىن ءۇي سالۋىنا قارسىلىق بىلدىرگەن. ال قاراعاندى قالاسىنىڭ ورتالىعىنداعى ەسكى كوپپاتەرلى تۇرعىن ۇيلەردىڭ تۇرعىندارى شاھار شەتىندە بوس جەر جەتكىلىكتى ەكەنىنە قاراماستان, ءوز باسپانالارىنىڭ جانىنداعى شاعىن باقتاعى جۇزدەگەن اعاشتى تۇگەل وتاپ تاستاپ, جاڭا تۇرعىن ءۇي كەشەنىن سالۋعا نارازىلىق تانىتقان.
«قۋىرداقتىڭ كوكەسىن تۇيە سويعاندا كورەسىڭ» دەگەندەي, كەزىندە ءبىر پىسىقاي كاسىپكەردىڭ پەتروپاۆل قالاسىنىڭ ورتالىق ساياباعىنىڭ شەتىنە سۇعىنا ەنگىزىلە سالىنىپ جاتقان ءزاۋلىم تۇرعىن ءۇيىنىڭ قۇرىلىسىن كورگەن جەرگىلىكتى تۇرعىندار قانشا دابىل قاققانىمەن, وعان قۇلاق اسقان ەشكىم بولماعانى جادىمىزدا. ءتىپتى قۇقىق قورعاۋ ورگاندارى دا تەكسەرىس جۇرگىزگەنىمەن, ء«بارى زاڭدى» دەپ, دارمەنسىزدىك كورسەتكەن.
مۇنداي بەلدەن باسۋشىلىقتارعا قالالاردىڭ باس جوسپارلارىن ورەسكەل بۇرمالاۋدىڭ سالدارىنان جول بەرىلىپ كەلگەنى ءسوزسىز. ارينە, ونىڭ نەگىزگى سەبەبى – قۇرىلىس پەن جەر قاتىناستارى سالالارىنداعى سىبايلاس جەمقورلىقتىڭ تامىرىن تەرەڭگە جىبەرگەنىندە. سوندىقتان دا اتالعان سالالارعا قاتىستى قولدانىستاعى زاڭنامانى قايتا قاراپ, قاتايتا ءتۇسۋ قاجەتتىگى داۋسىز. اتاپ ايتقاندا, كەز كەلگەن ەلدى مەكەننىڭ باس جوسپارى – قالا قۇرىلىسىنىڭ بۇلجىماس زاڭىنا اينالۋعا ءتيىستى. ونى ازىرلەۋ جانە قابىلداۋ جەرگىلىكتى تۇرعىنداردىڭ كەڭىنەن قاتىسۋىمەن ءارى بارىنشا اشىق جۇرگىزىلگەنى ءجون. بۇل قۇجاتقا ۋاقىت وتە كەلە, زامان تالابىنا ساي ەنگىزىلەتىن ءىشىنارا وزگەرىستەر دە جۇرتشىلىقتىڭ جاريا تالقىسىنا سالىنىپ بارىپ قانا قابىلدانۋى كەرەك. بۇعان قوسا, كەز كەلگەن ەلدى مەكەننىڭ باس جوسپارىنىڭ قاتاڭ ساقتالۋى ءۇشىن ۋاكىلەتتى مەملەكەتتىك ورگاندار باسشىلارىنىڭ جاۋاپتىلىعىن كۇشەيتپەسە بولمايدى. ويتكەنى باس جوسپاردى بۇرمالاۋ دەرەگىنىڭ قايسىسىن الىپ قاراساڭىز دا, جەمقورلىقتىڭ جامان ءيىسى مۇڭكىپ تۇرادى.
