«4-13 ناۋرىز ارالىعىندا قىتايدا وتكەن XIII قىسقى پاراليمپيا ويىندارىندا قازاقستان قۇراماسى ءبىر قولا مەدالعا يە بولىپ, 53 مەملەكەتتىڭ ىشىندە جالپىكوماندالىق ەسەپتە 17-ورىنعا تۇراقتادى. پاراليمپيادادا 700-دەن استام سپورتشى سپورتتىڭ 6 تۇرىنەن 78 مەدال جيىنتىعىن ساراپقا سالدى. ونىڭ ىشىندە ءبىزدىڭ سپورتشىلار 12 مەدال جيىنتىعى بويىنشا جارىس جولىنا شىقتى. پاراليمپيادادا ەل نامىسىن 5 سپورتشىمىز قورعادى», دەپ ەسكە سالدى سامات ەرعاليەۆ.
ونىڭ ايتۋىنشا, مينيسترلىك پاراليمپيادالىق قوزعالىستى قولداۋ بويىنشا جۇيەلى جۇمىس جۇرگىزۋدە. اتاپ ايتقاندا, سپورت تۇرلەرىن سارالاۋ ەرەجەلەرىنە سايكەس بارلىق پاراليمپيادالىق سپورت تۇرلەرى «ا» توبىنا جانە «باسىم» سپورت تۇرلەرىنىڭ قاتارىنا جاتقىزىلىپ, ءبىرىنشى كەزەكتە قارجىلاندىرىلاتىن بولدى. بۇدان باسقا, سپورتتىق ناتيجەلەردى ەسكەرە وتىرىپ, جاقىن ارادا ۇلتتىق قۇرامانىڭ جاتتىقتىرۋشىلارى مەن سپورتشىلارىنىڭ جالاقىسىن ارتتىرۋ ماسەلەسى قارالادى.
«2016 جىلعى ريو پاراليمياداسىنان باستاپ پاراليمپيادا جانە سۋردوليمپيادا ويىندارىنىڭ جەڭىمپازدارى مەن جۇلدەگەرلەرىنىڭ قارجىلاي سىياقىلارى ءوسىپ, وليمپيادالىق سپورت تۇرلەرىمەن تەڭەستى. سونىمەن قاتار الداعى تاڭدا سپورتتىق ناتيجەلەردى ەسكەرە وتىرىپ ۇلتتىق قۇراما جاتتىقتىرۋشىلارى مەن سپورتشىلارىنىڭ جالاقىلارىن كوتەرۋ ماسەلەسى قاراستىرىلادى», دەدى كوميتەت باسشىسى.
سونداي-اق ول بەيجىڭدەگى پاراليمپيادا ويىندارىندا 10 شاقىرىمدىق جارىستا قولا جۇلدە العان بياتلونشى الەكساندر گەرليتسكە پاتەر بەرىلەتىنىن ايتتى. «بەيجىڭدەگى پاراليمپيادانىڭ قورىتىندىسى بويىنشا سپورتشىلار مەن جاتتىقتىرۋشىلار مەملەكەتتەن 131 ملن تەڭگە الادى جانە «دەنە شىنىقتىرۋ جانە سپورت سالاسى تۋرالى» زاڭعا سايكەس سولتۇستىك قازاقستان وبلىسىنىڭ اكىمدىگى تاراپىنان الەكساندر گەرليتسكە ءبىر بولمەلى پاتەر بەرىلەدى», دەدى سامات ەرعاليەۆ.
ءوز كەزەگىندە الەكساندر گەرليتس قازاقستاندىقتارعا قولداۋ كورسەتكەنى ءۇشىن العىس ايتىپ, قۇرامانىڭ بارلىق جاتتىقتىرۋشىلار شتابىنىڭ ۇيلەسىمدى جانە كاسىبي جۇمىسىن اتاپ ءوتتى.
بۇگىندە پاراليمپيالىق سپورت تۇرلەرى بويىنشا ەلىمىزدە 15 سپورت ءتۇرى كەڭىنەن دامىتىلۋدا. بۇگىندە ۇلتتىق قۇراما قاتارىندا 484 سپورتشى بار. ولارمەن 34 باس جانە اعا جاتتىقتىرۋشى جۇمىس ىستەيدى. ال شتاتتاعى سپورتشىلاردىڭ سانى – 112. ەلىمىزدە مۇمكىندىگى شەكتەۋلى تۇلعالار اراسىندا 15 پاراليمپيادالىق, 21 سۋردوليمپيادالىق جانە پاراليمپيادا باعدارلاماسىنا ەنبەگەن سەگىز سپورت ءتۇرى دامىتىلعان. 2021 جىلدىڭ قورىتىندىسى بويىنشا ەلىمىزدە مۇمكىندىگى شەكتەۋلى ادامداردىڭ سانى – 696 825. ونىڭ 48 565 مىڭى سپورتپەن ۇدايى شۇعىلدانادى. رەسپۋبليكا بويىنشا, ءار وڭىردە مۇمكىندىگى شەكتەۋلى تۇلعالارعا ارنالعان ارنايى 17 سپورتتىق مەكەمە جۇمىس ىستەيدى.
ايتا كەتۋ كەرەك, الەكساندر گەرليتس پارا بياتلوندا 10 شاقىرىم قاشىقتىقتا قولا جۇلدە جەڭىپ العان بولاتىن. 2022 جىلعى پاراليمپيادا قورىتىندىسى بويىنشا الەكساندر گەرليتسكە «قازاقستان رەسپۋبليكاسىنىڭ ەڭبەك سىڭىرگەن سپورت شەبەرى» اتاعى بەرىلدى.
