«پرەزيدەنتىمىز جولداۋدا ەلىمىزدىڭ ساياسي جۇيەسىن كەشەندى جاڭعىرتۋ باعدارلاماسىن ۇسىندى. سوعان سايكەس كوپتەگەن ماڭىزدى ساياسي رەفورمالار مەن تىڭ باستامالار تۋرالى ءسوز بولدى. سونىڭ ىشىندە پارلامەنتتىڭ ءرولىن كۇشەيتۋ كەرەكتىگى دە ايتىلدى. مۇنداي قادام جاڭارۋ مەن جاڭعىرۋ جولىندا پارلامەنتكە ۇلكەن مىندەت پەن جاۋاپكەرشىلىك جۇكتەيدى. سوعان بايلانىستى مەملەكەت باسشىسى سەنات پەن ءماجىلىستىڭ جۇمىسى مەن قۇرىلىمىنا قاتىستى رەفورمالارعا توقتالدى. ەندى سەناتتاعى پرەزيدەنتتىك كۆوتانىڭ سانى 15-تەن 10-عا دەيىن قىسقارادى», دەدى ماۋلەن اشىمباەۆ سەناتتىڭ جالپى وتىرىسىندا.
وسى ورايدا ول وڭىرلەردىڭ مۇددەسى ەڭ باستى باسىمدىقتاردىڭ ءبىرى بولىپ قالا بەرەتىنىن ايتتى.
«پرەزيدەنتىمىزدىڭ شەشىمىمەن وڭىرلەردىڭ سانى كوبەيەتىن بولدى. ياعني, ءبىزدىڭ جۇمىسىمىزدىڭ اياسى كەڭەيەدى. سوندىقتان الداعى ۋاقىتتا وسى باعىتتاعى ماقسات-مىندەتىمىز بۇرىنعىدان دا ارتا تۇسەدى. شىن مانىندە, اباي, ۇلىتاۋ, جەتىسۋ وبلىستارىنىڭ قۇرىلۋى ءبىزدىڭ ۇلت رەتىندە ءوسۋىمىزدىڭ جارقىن كورىنىسى. سونىمەن بىرگە قازاقستان حالقى اسسامبلەياسىنىڭ كۆوتاسى ماجىلىستەن سەناتقا بەرىلەدى. بۇل شەشىم قوعامدىق كەلىسىم مەن ىنتىماقتاستىقتى نىعايتۋ تۇرعىسىنان ءبىزدىڭ الەۋەتىمىزدى ارتتىراتىنى ءسوزسىز», دەدى سەنات توراعاسى.
