«قازاقستاننىڭ پاراليمپيادا قۇراماسىنا وسىنداي جەتىستىگى ءۇشىن ەرەكشە العىس ايتقىم كەلەدى. سىزدەر كەرەمەت ناتيجە كورسەتتىڭىزدەر. قايسارلىق پەن تاباندىلىقتىڭ ارقاسىندا ءبىزدىڭ ەلىمىز وسى ويىنداردا لايىقتى ونەر كورسەتتى. بۇل ناتيجەنىڭ سوڭىندا سپورتشىلاردىڭ وزدەرىنە جانە ولاردىڭ جاتتىقتىرۋشىلارىنا عانا بەلگىلى وراسان زور ەڭبەك جاتىر», دەدى ەرالى توعجانوۆ.
پرەمەر-ءمينيستردىڭ ورىنباسارى بۇقارالىق سپورتتى دامىتۋ جانە ينكليۋزيۆتى ورتانى قۇرۋ ماسەلەلەرىنە ەرەكشە نازار اۋدارۋ كەرەك ەكەنىن ايتىپ, بۇل ماسەلەلەر مەملەكەت باسشىسىنىڭ جەكە باقىلاۋىندا ەكەنىن جەتكىزدى. ەرالى توعجانوۆ مەملەكەت تاراپىنان سپورتتى دارىپتەۋ ءۇشىن بارلىق قاجەتتى جاعدايلاردى جاساۋ الداعى ۋاقىتتا دا جالعاساتىنىن مالىمدەدى.
«الەكساندر وزىنە جۇكتەلگەن سەنىمدى تولىعىمەن اقتادى. ءسىزدىڭ جەتىستىكتەرىڭىز رۋحاني جىگەردىڭ جارقىن ۇلگىسى. ءبىزدى الداعى ۋاقىتتا ۇلكەن جۇمىس كۇتىپ تۇرعانىن اتاپ وتكىم كەلەدى. ءبىز وسى پاراليمپيادادا جوعارى ناتيجەلەر كورسەتكەن قحر مەن ۋكراينانىڭ تاجىريبەسىن مۇقيات زەردەلەيتىن بولامىز», دەدى داۋرەن اباەۆ.
الەكساندر گەرليتس قازاقستاندىقتارعا قولداۋ كورسەتكەنى ءۇشىن العىس ءبىلدىرىپ, قۇرامانىڭ بارلىق جاتتىقتىرۋشىلار شتابىنىڭ ۇيلەسىمدى جانە كاسىبي جۇمىسىن اتاپ ءوتتى.
XIII قىسقى پاراليمپيادا 4-13 ناۋرىز ارالىعىندا بەيجىڭدە ءوتىپ, وعان الەمنىڭ 50 ەلىنەن 700-دەن استام سپورتشى قاتىستى. قازاقستان قۇراماسى ءبىر قولا مەدالمەن جالپىكوماندالىق ەسەپتە 17-ورىنعا تابان تىرەدى.
