بىلتىرعى ماۋسىمدا «س» ليگاسىنىڭ ءتورتىنشى توبىندا باق سىناعان قازاقستان ۇلتتىق قۇراماسى البانيا, بەلارۋس جانە ليتۆا فۋتبولشىلارىمەن جاسىل الاڭدا كەزدەستى. التى ويىندا ءتورت ۇپاي جيناعان تالعات بايسۋفينوۆ شاكىرتتەرى توپتا سوڭعى ورىنعا قالىپ, وسى ليگاداعى ورنىن ساقتاپ قالۋ ءۇشىن پلەي-وفف ماتچىن وتكىزەتىن بولدى.
جەرەبەگە سايكەس, قازاقستان توپتاعى العاشقى ويىنىن سىرت الاڭدا ليتۆا قۇراماسىمەن وتكىزدى. 3-مينۋتتا باقتيەر زاينۋتدينوۆ پەن 86-مينۋتتا يسلامبەك قۋاتتىڭ سوققان گولدارىنىڭ ارقاسىندا جەرلەستەرىمىز 2:0 ەسەبىمەن جەڭىسكە جەتتى. ال الماتىداعى ورتالىق ستاديوندا وتكەن قارىمتا كەزدەسۋدە ليتۆا فۋتبولشىلارى ەسە قايتاردى – 2:1. ابات ايىمبەتوۆتىڭ جالعىز گولىنا قوناقتار ەكى دوپپەن جاۋاپ قايتاردى. گول اۆتورلارى – مودەستاس ۆوروبيوۆاس جانە ارۆيداس نوۆيكوۆاس.
كەيىنگى تۋردا جەرلەستەرىمىز الماتىدا بەلارۋس قۇراماسىمەن كەزدەسىپ, 1:2 ەسەبىمەن جول بەردى. قوناقتار ساپىنان ماكسيم بورداچەۆ پەن ۆيتالي ليساكوۆيچ مەرگەندىگىمەن كوزگە تۇسسە, قازاقستان قۇراماسىنان ابات ايىمبەتوۆ گول سوقتى. بەلارۋستەگى ەكىنشى ويىندا دا الاڭ يەلەرى ەش قيىندىقسىز جەڭىسكە جەتىپ (2:0), ءۇش ۇپايىن ولجالادى. ءۇشىنشى تۋردا ءبىزدىڭ فۋتبولشىلار الماتىدا البانيانى قابىلداپ, العاشقى ويىندا 0:0 ەسەبىمەن تەڭ تارقاستى. ال ءبىر ايدان كەيىنگى قارىمتا كەزدەسۋدە الاڭ يەلەرى 3:1 ەسەبىمەن باسىم ءتۇستى. وسىلايشا, ءبىزدىڭ جىگىتتەر التى ويىننىڭ بىرەۋىندە عانا جەڭىسكە جەتسە, تاعى ءبىر ماتچتا تەڭ وينادى. قالعان ءتورت كەزدەسۋدە جەڭىلىس تاپتى.
مولدوۆا قۇراماسىنا كەلەر بولساق, ولار دا ۇلتتار ليگاسىنىڭ بىلتىرعى ماۋسىمىندا «س» ليگاسىندا ونەر كورسەتىپ, ءوز توبىندا قازاقستان قۇراماسى سياقتى سوڭعى ورىن الدى. مولدوۆا «س» ليگاسىنىڭ ءۇشىنشى توبىندا سلوۆەنيا, گرەكيا جانە كوسوۆو قۇرامالارىمەن باق سىنادى. العاشقى ويىندا ءوز الاڭىندا كوسوۆومەن جولىعىپ, 0:0 ەسەبىمەن تەڭ تارقاستى. ال كەيىنگى بەس ويىننىڭ بارلىعىندا دا جەڭىلىپ, جالعىز ۇپايمەن كوش سوڭىندا قالىپ قويدى. بۇل توپتا 6 ويىندا 14 ۇپاي جيناعان سلوۆەنيا قۇراماسى جەكە-دارا كوش باستاپ, توپتىڭ جەڭىمپازى اتاندى. گرەكيا قۇراماسى 12 ۇپايمەن ەكىنشى ورىنعا يە بولسا, كوسوۆو 5 ۇپايمەن ءۇشىنشى ورىنعا تابان تىرەدى.
ەكى قۇرامانىڭ ويىندار تاريحىنا كوز جۇگىرتەر بولساق, قازاقستان مەن مولدوۆا قۇرامالارى بۇگىنگە دەيىن جاسىل الاڭدا بەس مارتە جولىققان ەكەن. ەكى ويىندا قازاقستان قۇراماسى جەڭىسكە جەتسە, ەكى ماتچتا مولدوۆالىقتاردىڭ مەرەيى ۇستەم بولعان. ال ءبىر كەزدەسۋدە كوماندالاردىڭ كۇشى تەڭ تۇسكەن. ءبىر قىزىعى, اتالعان بەس كەزدەسۋدىڭ بارلىعى دا جولداستىق كەزدەسۋلەر جانە ءبارى دە مولدوۆادا نەمەسە قازاقستاندا ەمەس, تۇركيا ستاديوندارىندا ۇيىمداستىرىلعان. الداعى ەكى كەزدەسۋ ەكى قۇراما اراسىنداعى العاشقى رەسمي ماتچتار بولماق.
ەكى ەل اراسىنداعى ءبىرىنشى ويىن سوناۋ 2008 جىلى وتكەن بولاتىن. يگور بۋگاەۆتىڭ سالعان گولىنىڭ ارقاسىندا مولدوۆا قۇراماسى جەڭىمپاز اتانعان. ودان كەيىن 2010 جىلى كەزدەسىپ, بۇل كەزدەسۋدىڭ ناتيجەسى دە ءدال سونداي ەسەپپەن مولدوۆانىڭ پايداسىنا شەشىلدى. ال 2013 جىلى قازاقستان قۇراماسى مولدوۆانى العاش رەت جەڭدى. ەسەپ 3:1. بۇل ماتچتا باۋىرجان جولشيەۆ ءدۋبلدىڭ اۆتورى اتاندى. 2015 جىلعى جولداستىق كەزدەسۋدە قازاقستان قۇراماسى مولدوۆالىقتارمەن تەڭ ءتۇستى – 1:1. جالعىز گولدىڭ اۆتورى – الەكسەي ششەتكين. 2019 جىلعى, ازىرگە سوڭعى جولداستىق كەزدەسۋدە قازاقستان قۇراماسى 1:0 ەسەبىمەن جەڭىسكە جەتسە دە, ماتچتاعى جالعىز گولدى 61-مينۋتتا مولدوۆالىق دميتري چەليادنيك سوقتى. ەكى قۇرامانىڭ ويىندار تاريحى, ستاتيستيكا ناتيجەسى بويىنشا, ازىرگە كوماندالاردىڭ كۇشى تەڭ ءتۇسىپ تۇر.
جۋىردا قازاقستان فۋتبول فەدەراتسياسىنىڭ باسشىلىعى تالعات ءبايسۋفينوۆتىڭ ورنىنا قازاقستان قۇراماسى باس باپكەرىنىڭ مىندەتىن اتقارۋشى ەتىپ قازاقستاندىق مامان اندرەي كارپوۆيچتى تاعايىندادى. 41 جاستاعى جاتتىقتىرۋشىنىڭ ۇلتتىق قۇراماداعى تاعدىرى الداعى ەكى ويىنعا بايلانىستى بولىپ تۇر. كارپوۆيچتىڭ ءوزى دە الداعى ويىنداردا مولدوۆانى جەڭىپ, ۋەفا ۇلتتار ليگاسىنىڭ «س» ديۆيزيونىندا قالۋدى ماقسات تۇتىپ وتىر.
جوعارىدا ايتىپ وتكەنىمىزدەي, ەكى ويىندا جەڭىسكە جەتكەن قۇراما «س» ليگاسىنداعى ورنىن ساقتاپ قالادى. ەگەر ءبىزدىڭ قۇراما جەڭىسكە جەتىپ جاتسا, ءتورتىنشى توپتا سلوۆاكيا, بەلارۋس جانە ازەربايجان قۇرامالارىنا قارسىلاس اتانادى. ال ەگەر مولدوۆا فۋتبولشىلارى مىقتىلىق تانىتاتىن بولسا, وندا ءبىزدىڭ قۇراما «D» ليگاسىنا ويىسادى. بۇل ليگادا ليحتەنشتەين, لاتۆيا جانە اندوررا قۇرامالارىمەن قايتادان ءسال دە بولسا جوعارىلاۋ ءۇشىن بəسەكەگە تۇسەدى. قازاقستان قۇراماسى ۇلتتار ليگاسىنىڭ العاشقى ماۋسىمىندا «D» ليگاسىندا گرۋزيا, لاتۆيا جانە اندوررا قۇرامالارىمەن ءبىر توپتا ونەر كورسەتكەنى بەلگىلى. جەرلەستەرىمىز التى ويىندا التى ۇپاي جيناپ, توپتا ەكىنشى ورىن العان بولاتىن. ال توپ جەڭىمپازى اتانعان گرۋزيا قۇراماسى ناۋرىز ايىنىڭ سوڭىندا ەۋرو-2020 تۋرنيرىنە جولداما بەرەتىن جارىسقا قاتىسۋعا مۇمكىندىك العان-دى.
بيىلعى ەرەجە بويىنشا, ۇلتتار ليگاسىنىڭ فينالدىق ماتچى تەك «ا» ليگاسىنىڭ جەڭىمپازدارى اراسىندا عانا وينالادى. وتكەن جىلعى باسەكەلەردە فرانتسيا قۇراماسى جەڭىمپاز اتاندى. بەنزەما مەن مباپپە باستاعان جىگىتتەر فينالدا يسپانيا قۇراماسىمەن ويناپ, 1:0 ەسەبىمەن جەڭىسكە جەتكەن-ءدى. العاشقى ماۋسىمدا پورتۋگاليا قۇراماسى توپ جارعان بولاتىن.
ەسكە سالا كەتەيىك, 2014 جىلى ەلوردادا وتكەن ۋەفا-نىڭ XXXVIII كونگرەسىنەن كەيىن اتالعان ۇيىم فۋتبولدان ەۋروپا چەمپيوناتىنىڭ 60 جىلدىعىن تويلاۋ ماقساتىندا وسىنداي جاڭا تۋرنير ەنگىزگەن ەدى. ۇلتتار ليگاسىنىڭ ماقساتى – جولداستىق كەزدەسۋلەردى رەسمي ويىندارعا اۋىستىرۋ ارقىلى ۇلتتىق قۇرامالاردىڭ دەڭگەيىن كوتەرۋ. سونىمەن قاتار دەڭگەيى تەڭ ۇلتتىق قۇرامالارعا ءبىر-بىرىمەن ويناۋعا مۇمكىندىك بەرۋ.
