كوميسسيا اپاتتىڭ سەبەبىن وزبەكستاننىڭ ەنەرگيا جۇيەسىندە بولعان اجىراتىلۋدان تۋىنداعانىن انىقتادى. وسى كۇنى نۇر-سۇلتان ۋاقىتى بويىنشا ساعات 11:59-دا سىرداريا جەس-ءى مەن 500 كۆ «تاشكەنت» قس-نى (وزبەكستان) قوساتىن 500 كۆ جوعارى ءۆولتتى اۋە ەلەكتر جەتكىزۋ جەلىسىنىڭ جەلىلىك اجىراتقىشىندا قىسقا تۇيىقتالۋ ورىن الدى. 500 كۆ شينالاردىڭ 1-ءشى جانە 2-ءشى جۇيەلەرىنىڭ ديففەرەنتسيالدى قورعانىستارىنىڭ شامادان تىس جۇمىس ىستەۋى سىرداريا جەس-ىندە گەنەراتسيانىڭ ايتارلىقتاي تومەندەۋىنە, ەلەكتر ستانساسىنا ىرگەلەس ەلەكتر جەلىسىندەگى اجىراتىلۋلارعا جانە قازاقستاننىڭ ءبىرتۇتاس ەلەكتر ەنەرگەتيكالىق جۇيەسىنىڭ (بەج) 500 كۆ سولتۇستىك-شىعىس-وڭتۇستىك ترانزيتىنە 2 100 مۆت مولشەرىندەگى قۋات جۇكتەمەدەن تىس تۇسىرىلۋىنە (بەلگىلەنگەن نورمادان 7 ەسە جوعارى) اكەلدى.
جۇيەلى اپاتتار كەزىندە KEGOC اق ەلەكتر جەلىلەرى مەن قازاقستاننىڭ وڭتۇستىگىندەگى ەلەكتر ستانسالارىنىڭ اۆارياعا قارسى اۆتوماتيكاسى ەنەرگيا جۇيەسىن ءبولۋ جونىندەگى تالاپتاردى ەسكەرە وتىرىپ, شتاتتىق رەجىمدە ىسكە قوسىلدى. وسى ارقىلى ەلىمىزدىڭ وڭتۇستىك تۇتىنۋشىلارىنىڭ شامامەن 60%-ىن ەلەكترمەن جابدىقتاۋدى ساقتاي وتىرىپ, قازاقستاننىڭ وڭتۇستىك ايماعى تۇتىنۋشىلارىنىڭ تولىق اجىراتىلۋىنا جول بەرىلمەدى. بۇل رەتتە وزبەكستان مەن قىرعىزستاننىڭ ەنەرگيا جۇيەلەرى تولىعىمەن توقتان اجىراتىلدى.
KEGOC كومپانياسىنا اپاتتى جويۋعا جانە قازاقستانداعى بارلىق تۇتىنۋشىلارعا قويىلعان شەكتەۋلەردى الىپ تاستاۋعا 4 ساعات قاجەت بولعانىن, سونداي-اق بۇعان قازاقستان بەج-ءى جۇيەلىك وپەراتورى پەرسونالىنىڭ جوعارى كاسىبي شەبەرلىگىنىڭ ناتيجەسىندە قول جەتكىزگەنىن اتاپ وتكەن ءجون. ال قىرعىزستان ۇەت-تە سحەما مەن رەجىم ءبىر تاۋلىكتەن استام ۋاقىتتان كەيىن قالپىنا كەلتىرىلسە, وزبەكستان ۇەت-تە تۇتىنۋشىلاردى ەنەرگيامەن جابدىقتاۋدى قالپىنا كەلتىرۋ ءتورت كۇنگە سوزىلدى.
