قىستىڭ قىزىعى تارقادى. بىراق اپپاق قارعا ورانعان نۇر-سۇلتاننىڭ كەرەمەت كەشتەرى مەن مامىق ۇلپانى ماپەلەگەن جۇلدىزدى تۇندەرى ۇمىتىلا قويا ما ەكەن!؟ اسىرەسە بوزبالا مەن بويجەتكەننىڭ ساناسىنان وشپەسى انىق قوي. ايدىڭ جارىعىنا شومىلعان قالا تۇرعىندارى دالادا قانشا اياز بولسا دا ەلوردانى ەرەكشە جاقسى كورەدى. كوڭىلدە مەكەندەگەن ساۋلەلى كۇندەردىڭ كۋاگەرى وسى ءشارى, ىزعارلى بولسا دا جانعا ىستىق, جۇرەككە جاقىن. مۇنى بەلگىلى سۋرەتشى, پەيزاجدىڭ حاس شەبەرى تولەۋعازى بايعاليەۆ «قىسقى استانا» كارتيناسىندا بەكزادا بوياۋمەن جەتكىزەدى. كومپوزيتسياعا قاراپ استانانى سۇيسەڭىز, وسىلاي ءسۇيىڭىز دەگىڭىز كەلەدى!
قىلقالام شەبەرى ءوزىنىڭ اتالعان تۋىندىسىن قالا پەيزاجى جانرىنا ارنايدى. قالا پەيزاجى – بۇل زامان تىنىسىن جەتكىزۋشى, ۋاقىتتىڭ بوياۋىن انىقتايتىن سىرلى كارتينا. اۆتور مەرەيلى مەزگىلدىڭ ءبىر ءساتىن نەمەسە قۇرىلىس, كوشە, ساياباق پەن قالا كورىنىستەرىن سۋرەتشىنىڭ كوزىمەن بەينەلەپ ءارى وقىرماننىڭ جۇرەگىنەن وتكىزۋگە تىرىسقان.
بايقاساڭىز سۋرەتشى «قىسقى استانا» كارتيناسىندا ەسكى استانانىڭ كىشكەنتاي عانا كورىنىسىن بەرەدى. قالانىڭ بايىرعى تۇرعىندارى تسەلينوگرادتىڭ ەسكى ورتالىعى سانالاتىن تسۋم-نان كونگرەسس-حولعا وتەتىن جەراستى جولىنىڭ الدىن بىردەن تاني قويادى. كىشكەنتاي ساياباقتا ۇيەڭكى بۇتاقتارى مەن جاس شىرشالار سوزىلىپ جاتىر, ولاردىڭ اراسىنان ەسكى ءۇش قاباتتى ۇيلەر كورىنەدى. اسپان بۇلتتى, جولداردى مۇز باسقان, اعاش بۇتاقتارى مەن گۇلزارلاردى قالىڭ قار جاپقان.
مىنە, مۇنىڭ ءبارى سۋرەتشى تۇستەردى ۇيلەستىرىپ جەتكىزگەن قىستىڭ ۇيرەنشىكتى بەلگىلەرى. تىنىق, كومەسكى, رەڭك جاعىنان ءبىر-بىرىنە جاقىن تۇستەر تابيعاتتىڭ كۇيى مەن سول جەردىڭ اتموسفەراسىن جەتكىزىپ تۇر. سۋرەتشى ءالى دە قاراڭعىلىق تۇسپەگەنىن ايتىپ, ىمىرت ۇيالار شاقتىڭ كەسكىنىن سىزعان. قىسقى استانانى ساعىنعان جانعا اڭسارىن باسار ادەمى سۋرەت ءارتۇرلى ويعا جەتەلەيدى.
