بىرەۋگە قۇرمەت كورسەتكىڭىز كەلسە, الدىمەن اناڭىزدان باستاڭىز. بالا – انانىڭ باۋىر ەتى. ول ءۇشىن وتقا دا, سۋعا دا تۇسۋگە بار. وزەگىنەن ءۇزىلىپ تۇسكەن ءسابي ءۇشىن قان كەشۋدەن قورىقپايدى. ازاپتى جولدا دا اقىرىنا دەيىن بارۋعا بەكىنگەن. ء«بىر قولىمەن الەمدى, ءبىر قولىمەن بەسىكتى تەربەتكەن» جان ءۇشىن الىپ تاۋدىڭ ءوزى الاسا كورىنەدى. بايقايسىز با, قازاقستان بەينەلەۋ ونەرىندە كەسكىندەمە شىعارمالارىمەن تانىلعان سۋرەتشى نۇرلان قيلىباەۆ «بەسىك جىرى» كارتيناسىندا مەيىرىمنىڭ انادان جاراتىلعانىن ايتىپ تۇرعانداي. كىشكەنتاي تۋىندىدان ۇلكەن جىلىلىقتىڭ لەبى ەسەدى.
جالپى, قىلقالام شەبەرى كەز كەلگەن شىعارماسىندا كورەرمەننىڭ سەزىمىنە, ويىنا اسەر ەتۋ ارقىلى ەستەتيكالىق ءلاززات بەرەدى. كەسكىندەمە تۋىندىلارى جەكە ءبىر تۇلعانى, دارا كورىنىستى بەينەلەپ قانا قويماي, كۇردەلى سيۋجەتكە, ەرەكشە وقيعالارعا قۇرىلعان جانە ونىڭ ءمانىن اشۋعا بەيىم. اتالعان تۋىن-
دىدان سونى بايقاۋعا بولادى. اي مەن كۇننىڭ اراسىندا ءسابيىن الديلەگەن انا بار پەيىلىن بەسىكتەگى بالاسىنا ارناپ, دۇنيەدەگى ەڭ باقىتتى جاننىڭ وبرازىن سومداپ تۇر.
نەگىزىندە نۇرلان قيلىباەۆتىڭ شىعارمالارىنىڭ باسىم كوپشىلىگى ايەل وبرازىنا ارنالعان. قاي كارتيناسىن الىپ قاراساڭىز دا ايەل بەينەسىنىڭ كوركەمدىگىمەن قاتار, قازاقتىڭ مادەنيەتىن, تۇرمىس-تىرشىلىگىن, سالت-ءداستۇرى ءارى كيىم ۇلگىسىن كوركەمدەپ جەتكىزۋگە قۇشتار. قىز بالانىڭ اشەكەي بۇيىمدارىنىڭ ەلەمەنتتەرىنە اسا ءمان بەرىپ, ونى بەينەلەۋ ارقىلى ءوزىن زەرگەر سەزىنەدى. اۆتوردىڭ شىعارمالارىنان رۋحانياتقا اۋاداي قاجەت ۇلتتىق دارۋمەندەردى تابۋعا بولادى.
ەڭ عاجابى, ول ءاربىر ويۋدىڭ ءمان-ماعىناسىنا تەرەڭ ءۇڭىلىپ, وقىرمانعا سول زاتتىڭ قاسيەتىن سەزىندىرەدى. تۋىندىلارىنىڭ باسىم بولىگىن, سونىڭ ىشىندە ايەل بەينەسىن شەتەلدەن كەلگەن قوناقتار ساتىپ الاتىن كورىنەدى. سەبەبى ەۋروپادا شىعىس ايەلدەرى جوعارعى دەڭگەيدە باعالانادى ەكەن. بۇل بىزدىڭشە سۋرەتكەردىڭ وزىندىك قولتاڭباسى بار ەكەنىن ايعاقتايدى. قازاق ايەلىنىڭ وبرازىن سومداۋ ارقىلى الەمدى قىزىقتىرعان قىلقالام شەبەرىنىڭ ەڭبەگى زور.
