جۇلدە قورى 8,5 ملن اقش دوللارىنان اساتىن جارىستىڭ 31-راكەتكاسى رەتىندە تىركەلگەن ا.بۋبليك دودانى ەكىنشى اينالىمنان باستادى. جەرلەسىمىز بۇل كەزەڭدە كەزىندە الەمدىك رەيتينگتە ءبىراز ۋاقىت كوش باستاعان, «ۇلكەن دۋلىعا» تۋرنيرلەرىنىڭ ءۇش دۇركىن جەڭىمپازى (2012, 2013, 2016), ەكى مارتە وليمپيادا چەمپيونى (2012, 2016) ۇلىبريتانيالىق ەندي ماررەيمەن شەبەرلىك بايقاستى. ەكى ساعاتقا جۋىق سوزىلعان تارتىستى باسەكەدە قازاقستاندىق تەننيسشى قازىرگى كەزدە دۇنيەجۇزىلىك رەيتينگتە 88-ورىندا تۇرعان اتاقتى قارسىلاسىن 7:6 (11:9), 6:3 ەسەبىمەن تىزە بۇكتىردى. الەكساندر ماتچ بارىسىندا 11 ەيس جاساپ, 5 برەيك-پوينتتىڭ بىرەۋىن پايدالاندى. ە.ماررەي 4 ەيسپەن شەكتەلدى.
بۇعان دەيىن ەكى تەننيسشى كورتتا ەكى مارتە كەزدەسىپ, ەكەۋىندە دە ەندي ماررەيدىڭ مەرەيى ۇستەم بولعان ەدى. ال ءۇشىنشى ماتچتا وتانداسىمىز مىقتىلىق تانىتتى. بۋبليك ءۇشىنشى اينالىمدا الەمنىڭ 35-راكەتكاسى بولگاريالىق گريگور ديميتروۆپەن كەزدەسەدى.
