ونەر • 14 ناۋرىز، 2022

سۋرەتشى

59 رەت كورسەتىلدى

عاسىردىڭ تاڭداۋلى اڭگىمەلەرىنىڭ ءبىرى – «يۋدانىڭ كەسكىنى» اڭگىمەسى. شىعارمانىڭ قىسقاشا مازمۇنىن ش.قازەزدىڭ اۋدارماسى بويىنشا بايانداپ وتسەك، اتاقتى قىلقالام شەبەرى سيتسيلياداعى ۇلكەن شىركەۋدىڭ تۇتاس قابىرعاسىنا عايسا پايعامباردىڭ عۇمىرناماسىن سالۋعا تاپسىرىس الادى. سۋرەتشى جىگىتكە باسىندا جۇمىس جەڭىل جۇرگەندەي كورىنەدى. ەندىگى ساتتە عايسا مەن وپاسىز يۋدانىڭ بەينەسىن كەسكىندەۋ عانا قالعان-تىن.

ءبىر كۇنى كوشەدە كەتىپ بارا جا­تىپ، توپ بالانىڭ ىشىنەن ءجۇزى نۇر شاشىپ تۇرعان ۇلدى كورەدى. عايسانىڭ بەينەسى. سۋرەتشى بالانى ەرتىپ الىپ، پايعامبار وبرازىندا الگى نارەستەنىڭ ءجۇزىن قا­بىرعاعا كوشىردى. بىراق سۋرەتشى يۋداعا ۇلگى بولاتىن جاندى تاپپاي قينالادى. ول ءتىپتى ونداي وب­­رازدى «عۇمىرىمنىڭ سوڭىنا دەيىن كەزدەستىرمەيتىن شىعارمىن» دەپ ويلايدى. جىل ارتىنان جىل وتەدى. سۋرەتشى ابدەن قارتايادى. كوپ جىلدارىن شۋلى شاراپحانالاردا وتكىزەدى. سويتكەن كۇندەردىڭ بىرىندە ءوڭى جۇدەۋ، كيىمى قىرىق شوقپىت الدەكىم قيسالاڭداپ كەلىپ تابالدىرىقتان اتتار-اتتاماستان «شاراپ، شاراپ!» دەپ قۇلاي كەتەدى. سۋرەتشى ونى سۇيەپ تۇرعىزىپ، بە­تىنە قاراعاندا، جۇرەگى زۋ ەتە قا­لادى. مۇنىڭ جۇزىنەن ادامزات الە­مىندەگى وپاسىزدىق، وزبىرلىق، قىل­مىس اتاۋلىعا قىمسىنباي باراتىن قارا جۇرەك قانىپەزەرلىك مەن­مۇندالاپ تۇرعانداي ەدى. يۋ­دانىڭ بەينەسى.

قارت سۋرەتشى الگى جاندى دەرەۋ شەبەرحاناسىنا الىپ كەتىپ نەشە جىلدان بەرى توقتاپ تۇرعان سۋرەتىن اياقتاۋعا كىرىسەدى. ءبىر كۇنى الگى جىگىتتىڭ كەنەت سيقى قاشا ساس­قا­لاقتاپ، ءوڭ-ءتۇسى وزگەرىپ سالا بە­رەدى. قانتالاعان كوزدەرى ءوزىنىڭ سۋ­رەتىنە ۇرەيلەنە قادالىپ قالادى. قارت سۋرەتشى ونىڭ بۇلايشا الا­سۇرعانىنىڭ ءمانىن تۇسىنبەي: «سا­عان نە بولدى؟ ءبارى دۇرىس پا؟» دەيدى. الگى ادام باسىن سالبىراتىپ، ەكى الاقانىمەن بەتىن باسىپ، قىستىعىپ جىلاپ جىبەرەدى. ءبىراز ۋاقىتتان كەيىن ول باسىن كوتەرىپ، قارت سۋرەتشىگە قادالا قاراپ:

ء«سىز شىنىمەن-اق مەنى ۇمىتىپ قالدىڭىز با؟ تالاي جىلدىڭ الدىندا ءسىز مەنى قاسيەتتى نارەستە يسانىڭ دا سۋرەتىن سالعاندا وسىندا الىپ كەلگەن ەدىڭىز عوي» دەيدى.

كەيىپكەر تاعدىرىمەن قانشا­لىقتى ويناۋعا بولادى؟

ەسىمىزگە وسكار ۋايلدتىڭ «دو­ريان گرەي پورترەتى» تۇسەدى. جا­نىن ىبىلىسكە ساتقان كەيىپكەر ەش قارتايمايدى. ۋاقىتتىڭ ادام بە­تىنە تۇسىرەتىن شيماي-ءاجىمى جىلدار بويى كەيىپكەردىڭ مايلى بوياۋمەن سالىنعان پورترەتىنە تۇسەدى. ۋىزداي جاس دوريان عۇمىرىنىڭ سوڭىندا كۇناھار شالدىڭ بەينەسى كەسكىندەلگەن پورترەتتى پىشاقتاپ جاتادى...

جو-جوق. ولاي ەمەس. ءۇي جيناپ جۇرگەن كا­نيزاكتار جاپ-جاس دورياننىڭ بەينەسى سالىنعان كار­تينانىڭ قاسىندا وزىنە-ءوزى قول جۇم­ساعان، بەتى ءاجىم-ءاجىم قا­ريانى تاۋىپ الادى.

الگى سۋرەتشى عايسانىڭ سۋرەتىنە سول بالانى نىسان ەتپەگەندە، ونىڭ تاعدىرى مۇلدەم باسقاشا ورىلەر مە ەدى؟! ءيا، م.بۋلگاكوۆتىڭ «ماستەر ي مار­گاريتاسىنداعى» يۋدەيانىڭ بەسىنشى پروكۋرا­تورى پونتي پيلاتتى شەبەردىڭ، ياعني جازۋشىنىڭ ەكى مىڭ جىلدان كەيىن بوساتاتىنى سياقتى...

شىعارما دەسەك تە شىندىق، بالكىم عايسا بوپ تۋ – تاعدىر، يۋدا بوپ ءولۋ – تالكەك.

ءسىزدىڭ كەيىپكەرىڭىز كىم؟

ءسىز كىمنىڭ كەيىپكەرىسىز؟

سوڭعى جاڭالىقتار

دوللار ارزاندادى

قارجى • بۇگىن، 15:58

ۇقساس جاڭالىقتار