قوعام • 14 ناۋرىز، 2022

ءاسانالى ءاشىموۆ باستاعان اقساقالدار توبى ۇندەۋ جاسادى

772 رەت كورسەتىلدى

الماتىلىق اقساقالدار پرەزيدەنتكە ۇندەۋ جاسادى، دەپ حابارلايدى Egemen.kz.

- قۇرمەتتى جەرلەستەر! الماتىلىق جاستار!

ءبىز، الماتى قالاسىنىڭ اقساقالدار قاۋىمى قازىر قوعامدا بوپ جاتقان كەيبىر جاعدايلارعا قاتىستى اسا الاڭداۋلىمىز. راسىن ايتۋ كەرەك، كۇتپەگەن جەردەن  باستالعان «قايعىلى قاڭتار» وقيعاسى بارشامىزدى ەسەڭگىرەتىپ كەتتى. «ەگەمەندىك الىپ، ەڭسە تىكتەۋ استە-استە، ەلدىكتەن ايىرىلىپ قالۋ ءبىر ساتتە» ەكەندىگىن كوردىك. سىرتتان سىنالاپ كىرىپ، قوعامدى ىشتەن ىرىتكىسى كەلگەن قاسكۇنەمدەر مەن قىلمىسكەرلەر تاۋەلسىزدىگىمىزدىڭ تۇعىرىن شايقاپ، توڭكەرىپ تاستاي جازدادى. پرەزيدەنتىمىزدىڭ دەر كەزىندە قابىلداعان شۇعىل شەشىمدەرى ارقاسىندا، باتىل تاۋەكەلگە بارىپ، شيراق قيمىلداعانىنىڭ ناتيجەسىندە عانا كيەلى ازاتتىعىمىزدى ساقتاپ قالا الدىق. قوعام ىشىندە ءجۇرىپ، قاراپايىم تۇرعىندارمەن كۇندەلىكتى كەزدەسىپ ءجۇرمىز. سول ازاماتتار قازىر كوشەدە توپتاسقان ادامدار توبى كورىنسە، ۇرەيلەنىپ، شوشيتىندارىن ايتادى. بەيبىت حالىق قاتتى قورقىپ قالعان. اسىرەسە، الماتى قالاسى سودىرلاردىڭ سويقانىنان كوپ زارداپ شەكتى. قانشاما عيمارات ورتكە ورانىپ، ساۋدا ورىندارى تونالىپ، ادام شىعىنى ورىن الدى. بۇگىنگى تاڭدا قالا اكىمدىگى سول وقيعالاردىڭ سالدارىن جويۋعا بارىن سالىپ جاتىر. قيراعان، ورتەنگەن عيماراتتار مەن ساۋدا ورىندارىن قالپىنا كەلتىرىپ، شىعىنعا باتقان كاسىپكەرلەردى قولداپ، جاستارعا جاڭا جۇمىس ورىندارىن اشۋعا ارەكەتتەنۋدە.

بىزگە قازىر وسى وتكەن وقيعالاردى دۇرىستاپ سارالاپ، سالقىن اقىلمەن، ساليقالى سابىرمەن كەتكەن قاتەلىكتەرمەن جۇمىس جاساۋ قاجەت. ول ءۇشىن قوعامنىڭ تىنىشتىعى مەن تۇراقتىلىعى اسا ماڭىزدى.

وكىنىشكە قاراي، كەيىنگى كەزدە، الماتىمىزدا شەرۋلەتكەن ميتينگىلەر مەن ايقايعا اتتان قوسقان جيىندار قايتادان كوبەيىپ كەتتى. ونىڭ ءوزى بايىرقالى جيىن، باسالقى كەڭەس قۇرۋ بولسا قۇبا-قۇپ. قالىڭ توپتىڭ ورتاسىنا كىرىپ الىپ، كەيبىر تەرىس پيعىلدى، ارام ويلى ارانداتۋشىلار ەل اراسىنا ىرىتكى سالاتىن ۇراندار كوتەرىپ، قوعام شاڭىراعىن شايقاپ، بىرلىگىمىزدى ءىرىتۋدى كوزدەگەندەي.

ءسوز جوق، قازاق حالقىنىڭ تاريحىندا «كۇلتوبەنىڭ باسىندا كۇندە جيىن جاسايتىن» زامان بولدى. ەل اعالارى باس قوسىپ، القا قۇرىپ اقىل-كەڭەستەرىمەن ءبولىستى. بىراق، ونىڭ باستى ەرەكشەلىگى – ءجون سوزگە توقتايتىن حالىق بولدى. اتالى سوزگە قۇلاق اسىپ، پارىقتى پىكىرگە باس يەتىن مىنەز بار ەدى. بۇگىنگى باس قوسۋلار كەرىسىنشە داڭعازا دابىر مەن بەيپىل سوزدەرگە ۇلاسىپ، قيسىق-قىڭىر، قىسىر قيقۋلارعا تولىپ كەتتى. ويعا الۋدىڭ ءوزى ۇيات سانالاتىن انايى سوزدەردى قاعازعا جازىپ، ۇران قىلىپ ۇيالماي كوككە كوتەرۋدى ءسان كورەتىن سيىقسىز سالت پايدا بولدى.

بۇگىنگى ۋاقىت اۋمالى-توكپەلى زامان بولىپ تۇر. اينالىمىزداعى مەملەكەتتەردىڭ تىنىشتىعى ءبىر ساتتە بۇزىلىپ، بەيبىت تۇرعىندارى شۇبىرىپ، مەملەكەتى سوعىس وتىنا ورانىپ جاتقانىن كورىپ جاتىرمىز. بىزگە قازىر ىشكى تىنىشتىق پەن مىزعىماس تۇراقتىلىق اۋاداي قاجەت. جاستاردى، جالپى قوعامدى سابىرعا شاقىرامىز! ەتەك-جەڭىمىزدى جيىپ، قازىرگى وتپەلى كەزەڭدە جۇدىرىقتاي جۇمىلىپ، ۇيىمشىلدىق تانىتايىق. اينالامىزدا، ەل ىشىندە ورىن الىپ جاتقان كەيبىر قيىنشىلىقتاردىڭ بارلىعى ۋاقىتشا.  ەل تاۋەلسىزدىگىنىڭ كەپىلى – تاتۋلىق پەن بىرلىكتە. ەلىمىزدىڭ تىنىشتىعى بۇزىلماسىن دەيمىز. ءبىزدىڭ اتالىق تىلەگىمىز، اقساقالدىق نيەتىمىز وسى. ەل ىشىنە كىرىپ، ىلاڭ سالۋى كوزدەيتىن ارانداتۋشىلاردان ساق بولايىق. قوعام بولىپ جۇمىلىپ، ءبىرتۇتاس حالىق  بولىپ بىرىگىپ، پرەزيدەنتىمىزدىڭ اينالاسىنا توپتاسا الساق ۋاقىتشا سىناقتاردىڭ بارلىعىن ەركىن ەڭسەرەمىز. ەلىمىز امان، جۇرتىمىز تىنىش، زامانىمىز بەيبىت بولسىن!، - دەلىنگەن ۇندەۋدە. 

قول قويعاندار

  1. ءاسانالى ءاشىموۆ
  2. مۇرات اۋەزوۆ
  3. دۋلات يسابەكوۆ
  4. كادىربەك سەگىزباەۆ
  5. سماعۇل ەلۋباەۆ
  6. بەكسۇلتان نۇرجەكەەۆ
  7. ساۋلە دوسجان
  8. ءسات توقپاقباەۆ
  9. ءجۇرسىن ەرمان
  10. تەمىرحان مەدەتبەك
  11. زەينەپ احمەتوۆا
  12. مارفۋعا ايتحوجينا
  13. اياگۇل ميرازوۆا
  14. اقان بيجانوۆ
  15. ناعاشىبەك قاپالبەك ۇلى

كەلىسىپ، قولداعاندار

  1. تورەگەلدى شارمانوۆ
  2. مەكەمتاس مىرزاحمەتوۆ
  3. ءسابيت ورازباەۆ
  4. التىنبەك قورازباەۆ
  5. بيبىگۇل تولەگەنوۆا
  6. سەيىت قاسقاباسوۆ
سوڭعى جاڭالىقتار

جەتى وڭىردە 2 گرادۋس ۇسىك جۇرەدى

اۋا رايى • بۇگىن، 18:48

دوللار ارزاندادى

ەكونوميكا • بۇگىن، 15:50

ۇقساس جاڭالىقتار