ءبىرىنشى تۋردا ەلوردادا «استانامەن» تەڭ ويناعان قاراعاندىنىڭ «شاحتەرى» بۇل تۋردا سىرت الاڭدا «قىزىلجاردان» 1:0 ەسەبىمەن باسىم ءتۇستى. العاشقى تۋردا ەلوردالىق كوماندا الاڭعا قازاقستان فۋتبول مەكتەبىنىڭ تۇلەگى بولىپ سانالمايتىن جەتى فۋتبولشىنى شىعارعانى ءۇشىن باقىلاۋ-تارتىپتىك كوميتەتى «استاناعا» 0:3 ەسەبىمەن تەحنيكالىق جەڭىلىس جازىپ, «شاحتەرگە» ءۇش ۇپاي بەردى. وسىلايشا «شاحتەر» تۋرنير كەستەسىندە التى ۇپايمەن كوش باستادى. ال «استانا» ەكىنشى تۋردا كۇتپەگەن جەردە چەمپيوناتتىڭ دەبيۋتانتى «اقسۋدان» 1:0 ەسەبىمەن جەڭىلىپ, تۋرنير كەستەسىندە سوڭعى ورىنعا ءتۇسىپ قالدى.
وتكەن تۋردا ءوز الاڭىندا «اقتوبەنى» 2:0 ەسەبىمەن تىزە بۇكتىرگەن الماتىنىڭ «قايراتى» بۇل تۋردا دا جەڭىسكە جەتتى. تۇركىستاندا «ماقتاارالمەن» كەزدەسكەن الماتىلىقتار حوسە كانتەنىڭ پەنالتيدەن سوققان جالعىز گولىنىڭ ارقاسىندا ءۇش ۇپاي ولجالادى. بىلتىرعى ەل چەمپيوندارى «توبىل» ەكىنشى تۋردا «كاسپيمەن» ۇپاي بولىسۋگە ءماجبۇر بولدى. اقتاۋداعى ماتچ 0:0 ەسەبىمەن اياقتالدى.
سونىمەن قاتار ەكىنشى تۋردا «اقتوبە» ءوز الاڭىندا «اتىراۋدى» (2:1) جەڭسە, «تاراز» «ورداباسى» كلۋبىن 1:0 ەسەبىمەن ۇتتى. ورالداعى اۋا رايىنىڭ قولايسىزدىعىنا بايلانىستى «اقجايىق» – «تۇران» كەزدەسۋى كەيىنگە شەگەرىلدى. ءۇشىنشى تۋر ماتچتارى 16 جانە 17 ناۋرىز كۇندەرىنە جوسپارلانعان.
