ماسەلەن, كۇنى كەشە اكادەميك ن.باتپەنوۆ اتىنداعى تراۆماتولوگيا جانە ورتوپەديا ۇلتتىق عىلىمي ورتالىعىندا فيبرين گيدروگەلىن قولدانۋ ارقىلى تىزە بۋىنىنىڭ شەمىرشەگىن حيرۋرگيالىق قالپىنا كەلتىرۋدىڭ جاڭا ادىستەمەسىن كلينيكالىق زەرتتەۋ باستالدى. بۇل ادىستەمە ءبىلىم جانە عىلىم مينيسترلىگىنىڭ 2021-2022 جىلدارعا ارنالعان عىلىمدى باعدارلامالىق-نىسانالى قارجىلاندىرۋ باعدارلاماسى اياسىندا ازىرلەندى.
– بۇل – مەملەكەت باسشىسىنىڭ مەديتسينالىق-بيولوگيالىق زەرتتەۋلەردىڭ باسىمدىعى جانە ەلدىڭ دامۋىنا عىلىمنىڭ ۇلەسىن ارتتىرۋ تۋرالى تاپسىرمالارىن ىسكە اسىرۋدىڭ العاشقى پراكتيكالىق ناتيجەلەرىنىڭ ءبىرى. عىلىمدى قارجىلاندىرۋدىڭ ەكى ەسەگە جۋىق ۇلعايۋىنىڭ ناتيجەسىندە وتانداستارىمىزدىڭ ءومىر ءسۇرۋ ساپاسىن جاقسارتۋعا باعىتتالعان كوپتەگەن عىلىمي يدەيا مەن ازىرلەمەنى قولداۋ مۇمكىندىگى ارتتى. قازاقستاندىق عالىمدار QazVac ۆاكتسيناسىن جاساپ شىعاردى. ايتحوجين اتىنداعى مولەكۋليارلىق بيولوگيا جانە بيوحيميا ينستيتۋتى قانت ديابەتىن ەمدەۋگە ارنالعان جوبانى ەنگىزىپ جاتىر. بۇگىن باستالعان بۋىنداردى قالپىنا كەلتىرۋگە ارنالعان گيدروگەلدىڭ كلينيكالىق زەرتتەۋلەرى – ۇلتتىق بيوتەحنولوگيا ورتالىعى ن.باتپەنوۆ اتىنداعى تراۆماتولوگيا جانە ورتوپەديا ۇلتتىق عىلىمي ورتالىعىمەن بىرلەسىپ جۇزەگە اسىراتىن عىلىمي باعدارلامانىڭ ءبىر بولىگى. بۇل قازىرگى تاڭدا ءبىلىم جانە عىلىم مينيسترلىگى قارجىلاندىراتىن 59 عىلىمي-تەحنيكالىق باعدارلامانىڭ ءبىرى ەكەنىن دە ايتا كەتكەن ءجون. ونىڭ بارلىعى ناقتى ومىرلىك ماسەلەلەردى شەشۋگە باعىتتالعان, – دەدى عىلىم كوميتەتىنىڭ توراعاسى جاننا قۇرمانعاليەۆا.
جاڭا ادىستەمەنىڭ نەگىزگى ازىرلەۋشىسى – ۇلتتىق بيوتەحنولوگيا ورتالىعىنىڭ ءدىڭ جاسۋشالارى زەرتحاناسىنىڭ مەڭگەرۋشىسى ۆياچەسلاۆ وگاي.
– موديفيكاتسيالانعان فيبرين گيدروگەلىنەن, پاتسيەنتتىڭ ءوز ءدىڭ جاسۋشالارىنان تۇرۋى گيدروگەلدىڭ بىرەگەيلىگى سانالادى. سونىڭ ناتيجەسىندە, زاقىمدالعان شەمىرشەكتى قالپىنا كەلتىرۋ كۇشەيىپ, جەدەلدەتىلەدى. جاڭا تەحنيكا پاتسيەنتتەردىڭ ءومىر ءسۇرۋ ساپاسىنا جاقسى اسەر ەتىپ, مۇگەدەكتىكتى ازايتادى دەپ جوسپارلانىپ وتىر. ناتيجەسىندە, تىزە بۋىنىن ەندوپروتەزدەۋگە مۇقتاج ادامدار سانى ازايادى, – دەدى ۆ.وگاي.
دارىگەرلەر وڭ جاق تىزە بۋىنىنىڭ ارتروزى بار 28 جاستاعى ناۋقاسقا وتا جاسادى. ال كلينيكالىق سىناقتارعا بارلىعى 25 پەن 60 جاس ارالىعىنداعى 80 ەرىكتى قاتىسادى. ولاردىڭ اراسىندا بۋىندارىندا جاسىنا بايلانىستى وزگەرىستەر پايدا بولعان ەگدە جاستاعى ادامدار, سونداي-اق كاسىبي جاراقات العان جاس سپورتشىلار بار. كلينيكالىق زەرتتەۋلەر حالىقارالىق كلينيكالىق زەرتتەۋلەر ستاندارتىنا (GCP) سايكەس جۇرگىزىلەدى. پاتسيەنتتەردىڭ قۇقىقتارىن, قاۋىپسىزدىگىن جانە ءال-اۋقاتىن قورعاۋدى قامتاماسىز ەتۋ ماقساتىندا ولاردىڭ جەكە دەرەكتەرى جارياعا جاتپايدى.
– ءبىز وپەراتسيالىق ارالاسۋدىڭ ەكىنشى كەزەڭىن وتكىزىپ وتىرمىز. ءبىرىنشى كەزەڭى وسىدان ءبىر اي بۇرىن وتكەن بولاتىن. سول كەزدە ناۋقاستىڭ شەمىرشەگىندە اقاۋ بارىن بايقادىق. نەگىزى, اقاۋدىڭ ورنىن تولتىرۋ قيىن. قازاقستاندا تىزە-بۋىن اۋرۋلارىنا شالدىققان ادام سانى كوبەيىپ كەلەدى. سول سەبەپتى ناۋقاستارعا كومەگىمىز ءتيسىن دەدىك. ۇلتتىق بيوتەحنولوگيا ورتالىعىمەن بۇل ماسەلەنى تالقىلاي كەلە, ناۋقاستان الىنعان ميكروماتەريالدى جىبەردىك. ءوز كەزەگىندە ولار بىزگە تەراپيا جاساۋ ءۇشىن دايىن ءدىڭ جاسۋشالارىن ءوسىرىپ بەردى. بۇعان 4 اپتا ۋاقىت كەتتى. بۇل شامامەن 10 ملن جاسۋشاعا تەڭ. مۇنى ءبىز يمپلانت رەتىندە قولدانىپ وتىرمىز, – دەدى ارتروسكوپيا جانە سپورتتىق جاراقاتتار رەسپۋبليكالىق ورتالىعىنىڭ جەتەكشىسى ەرىك رايماعامبەتوۆ.
مامانداردىڭ ايتۋىنشا, قازاقستاندا بۋىن اۋرۋلارىنا شالدىققاندار سانى ۇدايى ارتىپ كەلەدى. ماسەلەن, ستاتيستيكالىق مالىمەتتەرگە سايكەس, كەيىنگى 5 جىلدا بۋىن اۋرۋلارىنا شالدىققانداردىڭ سانى 100 مىڭ حالىققا شاققاندا 4 223,7-دەن
5 283,2 ادامعا دەيىن ءوستى. بۋىن پاتولوگيياسى ەگدە نەمەسە قارت ادامدارعا عانا اسەر ەتپەيدى. ياعني 19 جاسقا دەيىنگى 0,1%, 29 جاسقا دەيىنگى 0,2% بولسا, 39 جاسقا دەيىن 3,5%. ال 50 جاستان اسقان ناۋقاستاردا مۇنداي اۋرۋدىڭ ۇلەسى كۇرت ارتادى. بۋىن اۋرۋلارىنىڭ دامۋى بىرنەشە جىلعا جالعاسسا, مۇگەدەكتىككە اكەلۋى مۇمكىن.
وسىلايشا. ەلىمىزدە بىرەگەي زەرتتەۋدىڭ 1-2-كەزەڭى باستالدى. زەرتتەۋ جۇمىسى جىل سوڭىنا دەيىن جالعاسادى. ودان كەيىن بىرنەشە ورتالىقتا كلينيكالىق زەرتتەۋلەر جۇرگىزىلەدى. سونىڭ ناتيجەسى بيومەديتسينالىق ءونىمدى تىركەۋ, ونى جاپپاي ءوندىرۋ جانە وسى پروتسەدۋرانى قاجەت ەتەتىن بارلىق قازاقستاندىق ءۇشىن كەڭىنەن قولدانىلۋعا ءتيىس.
