وسىدان ءتورت جىل بۇرىنعى پحەنچحان پاراليمپياداسىندا وتانداستارىمىز ءبىر التىن مەدال ولجالاپ, جالپىكوماندالىق ەسەپتە قىتاي قۇراماسىمەن بىرگە 20-ورىندى ءوزارا بولىسكەن ەدى. ال بيىل جارىس قوجايىندارى 18 التىن مەدالمەن تۋرنير كەستەسىندە جەكە دارا كوش باستادى. سولى جىلى شاڭعى باسەكەسىندە جارىس جولىنا شىققان قازاقستاندىق الەكساندر كوليادين 1,5 شاقىرىمدىق سپرينتتە الدىنا جان سالماي, قازاقستان پاراليمپيادا تاريحىنداعى العاشقى التىن جۇلدەنى جەڭىپ العان-دى. وكىنىشكە قاراي, ول بىلتىردان باستاپ ءۇش جىلعا جارىستاردان شەتتەتىلگەنىنە بايلانىستى بيىلعى پاراليمپيا ويىندارىنا قاتىسا المادى.
بەيجىڭدەگى اق ويىنداردا قازاقستان قۇراماسىنىڭ قورجىنىنا جالعىز جۇلدەنى پارابياتلوننان 10 شاقىرىم قاشىقتىقتا باق سىناعان الەكساندر گەرليتس سالدى. التىن جۇلدەنى كانادالىق مارك ارەندتس جەڭىپ السا, ۋكراينالىق گريگوري ۆوۆچينسكي كۇمىسكە قول جەتكىزدى. پاراليمپيا ويىندارىنىڭ الدىندا بىرقاتار سپورت ماماندارى ءدال وسى پەتروپاۆلدىق شاڭعىشى بەيجىڭدەگى ويىنداردا ەل قورجىنىنا جۇلدە سالۋى مۇمكىن ەكەنىن بولجاعان ەدى. اۋزى دۋالى ساراپشىلاردىڭ ايتقانى ايداي كەلىپ, 32 جاستاعى ا.گەرليتس ەل مەرەيىن اسىرىپ, قىتايدا كوك تۋىمىزدى بيىكتە جەلبىرەتتى. الەمدىك رەيتينگتە توپ-5 سپورتشىنىڭ قاتارىندا تۇرعان الەكساندر وسىدان ءتورت جىل بۇرىنعى پحەنچحان پاراليمپياداسىندا دا شاڭعى جانە بياتلون باسەكەسىندە ونەر كورسەتىپ, ءتورت مارتە ۇزدىك جەتى سپورتشىنىڭ قاتارىنان كورىنگەن بولاتىن.
سونىمەن قاتار الەكساندر گەرليتس بيىلعى اق ويىنداردا ءتورت مارتە فينالدىق كەزەڭگە جولداما الىپ, بارلىعىندا دا جارىستى بەسىنشى ورىنمەن تۇيىندەدى. العاش پاراشاڭعى جارىسىنىڭ سپرينت باسەكەسىندە مارەگە بەسىنشى بولىپ جەتكەن ول ءبىرىنشى ورىنعا يە بولعان قىتايلىق سپورتشىدان ەكى مينۋتقا قالىپ قويسا دا, مۇنىڭ الدىندا پارابياتلوننان پاراليمپيادا چەمپيونى اتانعان كانادالىق مارك ارەندتستى باسىپ وزدى. كەيىننەن پارابياتلوننان جەكەلەي جارىستا دا ءدال وسىنداي ناتيجە كورسەتتى. باس جۇلدە فرانتسيالىق بەندجامين داۆەگە بۇيىردى. پاراشاڭعىدان ورتا قاشىقتىقتا دا ا.گەرليتس فينالدا ونەر كورسەتكەنىمەن, بۇل جولى دا بەسىنشى ورىنمەن تۇيىندەدى. ال پاراشاڭعى ەستافەتاسىندا ەربول حاميتوۆپەن بىرگە باق سىناعان ءبىزدىڭ جىگىتتەر تاعى دا سول مەجەدەن كورىندى.
وسىلايشا, الەكساندر گەرليتس پاراليمپيادادا ءبىر قولا جانە بەس مارتە بەسىنشى ورىندى ولجالاپ قانا قويماي, مەملەكەت تاراپىنان بەرىلەتىن 115 مىڭ اقش دوللارى كولەمىندەگى سىياقىعا دا يە بولدى. ال ەستافەتادا بەسىنشى ورىن العان ەربول حاميتوۆكە 10 مىڭ اقش دوللارى بەرىلەدى. ايتا كەتەيىك, بيىلعى پاراليمپيا ويىندارىندا ەل نامىسىن ەربول حاميتوۆ, الەكساندر گەرليتس, سەرگەي ۋسولتسەۆ, يۋري بەرەزين جانە دەنيس پەترەنكو قورعاعان بولاتىن. پاراليمپيادانىڭ اشىلۋ سالتاناتىندا قازاقستاننىڭ كوك تۋىن الەم كۋبوگىنىڭ قولا جۇلدەگەرى ەربول حاميتوۆ ۇستاپ شىقتى.
مەدال جيىنتىعى بويىنشا جالپىكوماندالىق ەسەپتە العاشقى ءۇش ورىندى قىتاي (18 التىن, 20 كۇمىس, 23 قولا), ۋكراينا (11+10+8) جانە كانادا (8+6+11) قۇرامالارى يەلەندى. ەندى ءتورت جىلدان كەيىن وتكىزىلەتىن كەزەكتى قىسقى پاراليمپيا ويىندارىنىڭ جالاۋى يتاليانىڭ ميلان جانە كورتينا-د’امپەتستسو قالالارىندا جەلبىرەيدى.
