قاراشادا قىلامىقتاپ جاۋعان قار قۇرعاق جەرگە تۇسكەن. كونەكوز قاريالاردىڭ ايتۋىنا قاراعاندا, ەرىگەن قار سۋىنىڭ توپىراققا تەز سىڭۋىنە بارىنشا قولايلى. ايتسە دە, تاسقىن سۋدىڭ تاقسىرەتىن كوپ تارتقان وڭىرگە كۇنى بۇرىن قاپىسىز قامدانعان ارتىق بولمايدى. سوڭعى بەس جىلدا اشەيىندە موماقان بولىپ كورىنەتىن وزەندەر تاسىپ, قانشاما ماتەريالدىق شىعىن كەلتىرىلدى. بيىل دا قار كۇرت ەرىسە, قاۋىپ تونگەلى تۇر. رەسپۋبليكالىق ماڭىزداعى جولداردى بىلاي قويعاندا, وبلىستىق ماڭىزداعى جولدىڭ 28, جەرگىلىكتى جولدىڭ 40 تەلىمىن ەرىگەن قار سۋى باسىپ قالا ما دەگەن قاۋىپ بار.
كوكتەمگى قىزىل سۋ جۇرەتىن قاۋىپتى كەزەڭگە دايىندىق وتكەن جىلدىڭ جازىنان باستالعان. كۇنى بۇرىن مۇقيات جوسپار جاسالدى. 53 ەلدى مەكەندە قىزىل سۋدىڭ الدىن الۋ باعىتىندا قىرۋار شارۋا اتقارىلدى. تاراتىپ ايتار بولساق, الدىمەن لىقسىپ كەلگەن قار سۋىنىڭ ىركىلىپ قالماي ءوتۋى ەسكەرىلدى. وسى ورايدا 35 شاقىرىمدىق كانال قوقىستان تازارتىلىپ, سۋ ەركىن وتەتىندەي جاعداي جاسالدى. مۇنداي جۇمىس بۇرىننان بار. ماسەلەن, 2020 جىلى 24,4 شاقىرىم وزەن تابانى تازارتىلعان بولاتىن. سونداي-اق وزەن اڭعارلارىنىڭ تومەندەۋ تۇسىن كوتەرىپ, بەكىتۋ دە ماڭىزدى. 10 شاقىرىمنان استام جەرگە بوگەت تۇرعىزىلدى. اتباسار قالاسىنداعى №1 ورتا مەكتەپتىڭ جانىنا 0,47 شاقىرىمدىق بەتون بوگەت سالىندى. وسىنداي جۇمىستارعا وبلىستىق بيۋدجەتتەن 1,6 ملرد تەڭگە قاراجات ءبولىنىپ وتىر. بولىنگەن قاراجاتتىڭ كولەمى دە از ەمەس. توتەنشە جاعدايلار ورىن الا قالسا, وقىس وقيعالاردىڭ زاردابىن جويۋعا دا قاراجات قاراستىرىلعان. قازىر وبلىس اۋداندارىندا جانار-جاعارمايدىڭ مول قورى بار, 12,7 مىڭ توننا ينەرتتىك ماتەريالدار دايىندالعان. بۇل ورايداعى دايىندىق وتكەن جىلدارمەن سالىستىرعاندا الدەقايدا تىڭعىلىقتى.
ەلدى مەكەندەردەگى تاۋ-تاۋ قاسات قاردى ۋاقتىلى شىعارۋ دا ەسكەرىلگەن. كۇنى بۇگىنگە دەيىن 424,3 مىڭ شارشى مەتر قار شىعارىلدى. بۇل ورايداعى جۇمىس ءالى جالعاسۋدا.
كۇن بىرەسە جادىراپ, بىرەسە قاباعىن تۇكسيتىپ تۇرعان بۇگىنگى كەزەڭدە وڭىردەگى احۋالدى كىرپىك ىلمەي كۇزەتكەن ءجون. قازىر 92 قوسىمشا باقىلاۋ پۋنكتى تاۋلىك بويى جۇمىس ىستەيدى. جاباي, سىلەتى وزەندەرىندەگى احۋال تارازى باسىنا تارتىلدى. ماسەلەن, جاباي وزەنىنىڭ ۇستىندەگى قاردىڭ قالىڭدىعى 32 سانتيمەتر شاماسىندا. ال سىلەتى وزەنىندە 18 سانتيمەتر قالىڭدىقتا قار بار. ەگەر ەڭىس جەرلەردەن قۇلدىراي اعىپ كەلەتىن كوپ سۋدىڭ مولشەرىن جوبالاپ ەسەپتەيتىن بولساق, قار از ءتۇستى دەلىنگەن بيىلدىڭ وزىندە قاۋىپ قالىڭداي تۇسپەك. مامانداردىڭ ايتۋىنا قاراعاندا, بۇل ءبىر-اق جاعدايعا – قاسات قاردىڭ ەرۋ جىلدامدىعىنا تىكەلەي بايلانىستى. كۇرت ەريتىن بولسا, لىقسىعان مول سۋ جول بويىنداعىسىن شايىپ, مۇزعا كەپتەلگەن وزەن اڭعارىنان وتە الماي, جاعالاۋدى بۇزىپ كەتپەك. سوندىقتان توتەنشە جاعدايلار قىزمەتى 10 اۋداندا جالپى كولەمى 20,75 مىڭ شارشى مەتر جەردىڭ مۇزىن جارماق. بۇل جۇمىسقا 60,340 ملن تەڭگە قاراجات قاراستىرىلىپ وتىر.
وبلىستا تۇرعىنداردى ەسكەرتۋ جۇمىسى دا ءبىرشاما وڭ جولعا قويىلعان. ارنايى ايلىق جاريالانىپ, تۇسىنىك جۇمىستارى, قاۋىپ-قاتەردەن قۇتىلۋدىڭ جولدارى كۇن سايىن ايتىلۋدا, 104 مارتە 140 ەلدى مەكەندى قامتىعان رەيد جۇرگىزىلدى, 3,7 مىڭ وتباسىنا 8,2 ەسكەرتپە تابىس ەتىلدى, 122 مارتە تۇرعىندارمەن كەزدەسۋ وتكىزىلدى. ەندىگىسى تابيعاتتىڭ تارتۋىنا بايلانىستى.
اقمولا وبلىسى
