كوللاجدى جاساعان قونىسباي شەجىمباي, «EQ»
ىرگەلى جانە قولدانبالى زەرتتەۋلەرمەن قاتار جەردى قاشىقتىقتان بارلاۋ, عارىشتىق مونيتورينگ, گەواقپاراتتىق مودەلدەۋ, عارىشتىق ماتەريالتانۋ سالالارىنا قاتىستى كوپتەگەن ماڭىزدى جوبانى جۇزەگە اسىرىپ وتىرعان «ۇلتتىق عارىشتىق زەرتتەۋلەر مەن تەحنولوگيالار ورتالىعى» اق, سونداي-اق «Eurasian Spase Ventures» جشس جانە «قازاقستاندىق جوبالاردى باسقارۋ ينستيتۋتى» عارىشتىق تەحنيكا جانە تەحنولوگيالار سالاسىندا Kazakhstan Smart Space حالىقارالىق بايقاۋىن جاريالادى. ەل تاۋەلسىزدىگىنىڭ 30 جىلدىعى مەن ادامزاتتىڭ عارىشقا ۇشقانىنا 60 جىل تولۋىنا ورايلاستىرىلعان بايقاۋ عارىشتىق تەحنيكا جانە تەحنولوگيالار سالاسىندا عىلىمي شىعارماشىلىقتى دامىتۋدى ماقسات ەتەدى.
«ۇلتتىق عارىشتىق زەرتتەۋلەر مەن تەحنولوگيالار ورتالىعى» اق باسقارما توراعاسى – تەحنيكا عىلىمدارىنىڭ دوكتورى, پروفەسسور مارات نۇرعوجين بايقاۋ شارتىمەن تانىستىرا كەلىپ, «ماماندارسىز ەكونوميكا دا, عىلىم مەن ءبىلىم دە دامىمايدى. سوندىقتان دا بالالار مەن جاستاردىڭ بىلىمگە, كاسىپكە دەگەن قىزىعۋشىلىعىن ارتتىرا وتىرىپ, ءوز سالاسىندا جىلدام ماماندانۋعا مۇمكىندىك بەرە الامىز. شىعارماشىلىق ىزدەنىسكە, جاڭالىق اشۋعا دەگەن ۇمتىلىسىن قولداۋ, تالپىنىسى مەن تالانتتارىن جۇزەگە اسىرۋعا ىقپال ەتۋ دە اسا ماڭىزدى. ال جاستاردىڭ بىلىمگە, عىلىمدا, زاماناۋي ۇدەسرىستەر مەن يننوۆاتسيادا تابىسقا جەتۋگە تولىق مۇمكىندىگى بار», دەپ اتاپ ءوتتى.
سونىمەن قاتار ەلىمىزدىڭ عارىشتى زەرتتەۋدەگى جوبالارىنا توقتالىپ ءوتىپ, ادامزات ءۇشىن شەكسىز كەڭىستىكتى زەرتتەۋدىڭ ەكونوميكانى دامىتۋ, ەكولوگيانى جاقسارتۋ باعىتىنداعى مۇمكىنشىلىكتەرىنە توقتالدى. ال وعان ەلىمىزدىڭ عارىش سالاسىندا جۇزەگە اسقان باعدارلامالار دالەل بولا الادى. ال ت.اۋباكىروۆ, ت.مۇساباەۆ, ا.ايىمبەتوۆ سىندى عارىشكەرلەرىمىزدىڭ عارىشتى زەرتتەۋ باعدارلامالارىنا قاتىسۋى بۇگىندە ءوز ناتيجەسىن بەرىپ كەلەدى.
«Eurasian SpaseVentures» كومپانياسىنىڭ باس ديرەكتورى, ەۋرازيالىق بانك ديرەكتورلار كەڭەسىنىڭ مۇشەسى شۋحرات يبراگيموۆ كەز كەلگەن سالانىڭ دامۋى بىلىكتى ماماندارعا بايلانىستى ەكەنىن اتاپ ءوتتى. ونىڭ ايتۋىنشا, كاسىبي ماماندارمەن عانا بيزنەستىڭ بولاشاعىن بولجاۋعا بولادى. تەحنولوگيالىق ۇدەرىس, عارىش يندۋسترياسى قارقىن العان كەزەڭدە بىلىكتى ماماندارعا سۇرانىس ارتا تۇسۋدە. بۇگىندە عارىشتى زەرتتەۋ جوبالارى كوپتەگەن كومپانيا ءۇشىن ەكونوميكالىق تۇرعىدا ءتيىمدى. ال قازاقستان جەرىنىڭ عارىشتى زەرتتەۋدەگى ءرولى ايرىقشا.
«اەروعارىشتىق تەحنولوگيالاردى دامىتۋ ماقساتىندا ESV عارىشتىق حاب-ينكۋباتورىنا حالىقارالىق ستارتاپتار شاقىرىلۋدا. بۇگىندە تسيفرلاندىرۋ قارقىن الىپ, عارىش يندۋسترياسى جىلدام دامىپ كەلەدى. Kazakhstan Smart Space بايقاۋى عارىشتى زەرتتەۋگە باعىتتالعان تىڭ جوبالارعا جول اشىپ, قازاقستاننىڭ مۇمكىندىكتەرىن الەمگە پاش ەتەتىن بولادى», دەدى ش.يبراگيموۆ.
قازاقستان جوبالاردى باسقارۋ ينستيتۋتىنىڭ پرەزيدەنتى جانە Elite كادرلىق حولدينگىنىڭ باس ديرەكتورى ولەگ پاراحين كوپ جىلعى ارىپتەستىك جانە قازاقستاندىق ستۋدەنتتەردى قولداۋعا باعىتتالعان جوبالاردى ىسكە اسىرۋ, ونىڭ ىشىندە مەكتەپتەگى جانە جوعارى وقۋ ورنىنداعى تەحنولوگيالىق كاسىپكەرلىك بارىسىنا توقتالدى. ونىڭ ايتۋىنشا, ەلىمىزدىڭ جارقىن بولاشاعى جاستاردىڭ كەلەشەگىمەن بايلانىستى, سوندىقتان ولاردىڭ ومىردەگى ماقساتىن ەرتە جاستان انىقتاۋعا, تالپىنىسىن قولداپ, شىعارماشىلىق مۇمكىندىكتەرگە جول اشۋعا قولداۋ كورسەتۋ كەرەك.
بايقاۋعا 7-22 جاس ارالىعىنداعى مەكتەپ, كوللەدج, جوعارى وقۋ ورىندارىنىڭ وقۋشىلارى مەن ستۋدەنتتەرى, وقىتۋشىلار, سونداي-اق اتا-انالار قاتىسا الادى. قازىرگى كەزدە 50 وقۋ ورنىنان وتىنىمدەر قابىلدانعان. ولاردىڭ ىشىندە قازاقستاندىق كوماندالارمەن قاتار قىرعىزستان جانە رەسەي ەلدەرىنىڭ وكىلدەرى بار. وتىنىمدەر 15 ناۋرىزعا دەيىن قابىلدانادى. ال بايقاۋدىڭ اقتىق كەزەڭى وسى جىلدىڭ 8-10 ءساۋىرى ارالىعىندا وتەدى. قاتىسۋشىلار تاقىرىپتىق اتالىمدار ءتىزىمى جانە بايقاۋ شارتتارىمەن www.kzsmart.space سايتىنان تانىسا الادى. بايقاۋدىڭ جەڭىمپازدارىنا ديپلومدار, اقشالاي سىيلىقتار مەن سەرتيفيكاتتار بەرىلەدى.
الماتى
