قر پارلامەنتى ماجىلىسىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي ساياساتىن رەفورمالاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تانىستىرعان قر يندۋستريا جانە ينفراقۇرىلىمدىق دامۋ ۆيتسە-ءمينيسترى ەركەبۇلان داۋىلباەۆ وسىنداي مالىمەت ايتتى.
«زاڭ جوباسى شەڭبەرىندە «وتباسى بانكى» ۇلتتىق دامۋ ينستيتۋتى بولىپ قايتا قۇرىلۋدا, ونىڭ نەگىزگى مىندەتى – رەسپۋبليكا بويىنشا ازاماتتاردى تۇرعىن ۇيمەن قامتاماسىز ەتۋ بويىنشا تۇرعىن ءۇي قاتىناستارىن دامىتۋ. وسىعان بايلانىستى وتباسى بانكىن ەكىنشى دەڭگەيلى بانكتەر جۇيەسىنەن شىعارۋ جانە وعان تۇرعىن ۇيگە ەسەپكە الۋدى, قويۋدى جانە ونى ءبولۋدى ورتالىقتاندىرىپ جۇزەگە اسىراتىن ۇلتتىق دامۋ ينستيتۋتى مارتەبەسىن بەرۋ كوزدەلگەن.
وتباسى بانكىنىڭ قۇقىقتىق مارتەبەسى قازاقستان رەسپۋبليكاسىنىڭ زاڭنامالىق اكتىلەرىمەن ايقىندالاتىن بولادى. وتباسى بانكى قارجى نارىعىن رەتتەۋ جانە دامىتۋ اگەنتتىگىنىڭ قاداعالاۋىنداعى سۋبەكتىلەر قاتارىنان شىعارىلاتىن بولادى», دەدى ۆيتسە-مينيستر.
ونىڭ ايتۋىنا قاراعاندا, قارجى نارىعىن رەتتەۋ جانە دامىتۋ اگەنتتىگى مەن ۇلتتىق بانك قارجىلىق قىزمەتتەردى تۇتىنۋشىلاردىڭ قۇقىقتارىن قورعاۋ ماسەلەلەرى بويىنشا باقىلاۋ مەن قاداعالاۋدى ساقتايدى.
«سونىمەن قاتار, وتباسى بانكى دەپوزيتتەردى قابىلداۋ, زاڭدى جانە جەكە تۇلعالاردىڭ بانكتىك شوتتارىن اشۋ جانە جۇرگىزۋ, كاسسالىق وپەراتسيالار, بانكتىك قارىز وپەراتسيالارى, سالىمشىلارعا تۇرعىن ءۇي, ارالىق جانە الدىن الا تۇرعىن ءۇي قارىزدارىن بەرۋ سياقتى قازاقستان رەسپۋبليكاسىنىڭ زاڭناماسىندا ايقىندالعان شەڭبەردە بانكتىك جانە باسقا دا وپەراتسيالاردى اگەنتتىكتىڭ ليتسەنزياسىنسىز جۇزەگە اسىراتىن بولادى. بۇل رەتتە ۋاكىلەتتى ورگاننىڭ ەكىنشى دەڭگەيدەگى بانكتى بانك وپەراتسيالارىن جۇرگىزۋگە ارنالعان ليتسەنزيادان ايىرۋ تۋرالى شەشىمى كەپىلدىك بەرىلگەن وتەمدى تولەۋ ءۇشىن نەگىز بولىپ تابىلاتىندىعىن ەسكەرە وتىرىپ, وتباسى بانكىنىڭ دەپوزيتتەرگە مىندەتتى كەپىلدىك بەرۋ جۇيەسىنە قاتىسۋى مۇمكىن ەمەس. وسىعان بايلانىستى, «وتباسى بانكىندە» ورنالاستىرىلعان تۇرعىن ءۇي قۇرىلىس جيناق اقشاسىنا سالىمداردىڭ ساقتالۋىنا قر ۇكىمەتى ايقىندايتىن مولشەردە جانە تارتىپتە مەملەكەتپەن كەپىلدىك بەرۋ ۇسىنىلادى», دەدى ەركەبۇلان داۋىلباەۆ.
ۆەدومستۆو وكىلى ۇسىنىلىپ وتىرعان جاڭا تەتىك بويىنشا جەرگىلىكتى اتقارۋشى ورگانداردا كەزەكتە تۇرعانداردىڭ اعىمداعى بازاسى «وتباسى بانكىنە» بەرىلىپ, جەرگىلىكتى دەڭگەيدە ەسەپكە قويۋ توقتاتىلاتىنىن ايتتى.
