تالقىلاۋدىڭ نەگىزگى تاقىرىبى ترانسكاسپي حالىقارالىق كولىك باعىتىن دامىتۋ بويىنشا بىرلەسكەن كاسىپورىن قۇرۋ جوباسىنا ارنالدى. جاڭا بىرلەسكەن كاسىپورىن تاريفتەردى بەلگىلەۋ جانە جۇكتەردى دەكلاراتسيالاۋدا تۋىنداعان ماسەلەلەردى رەتتەۋگە, بىرىڭعاي اقپاراتتىق تەحنولوگيالار شەشىمدەرىن قولدانۋعا جانە وسى باعىتتا ترانزيتتىك جۇكتەردى بىرىكتىرۋگە مۇمكىندىك بەرەدى.
ازەربايجاننىڭ ەكونوميكا ءمينيسترى ميكايل دجابباروۆ, ازەربايجان ينۆەستيتسيالىق حولدينگىنىڭ باس اتقارۋشى ديرەكتورى رۋسلان اليحانوۆ جانە, SOCAR پرەزيدەنتى م.ا. – ءبىرىنشى ۆيتسە-پرەزيدەنتى روۆشان نادجاف جانە باسقا دا رەسمي لاۋازىم وكىلدەرىمەن اڭگىمەلەسۋ بارىسىندا قازاقستاندىق دەلەگاتسيا ەلىمىزدىڭ ەۋروپاعا ەكسپورتتىق جۇك اعىندارىن ترانسكاسپي باعىتى بويىنشا قايتا باعدارلاۋدىڭ وزەكتىلىگى كۇن تارتىبىنە شىققانىن ايتتى.
تاراپتار ازەربايجان ارقىلى مۇناي تاسىمالداۋعا قاتىستى ىنتىماقتاستىقتىڭ ماڭىزدىلىعىنا توقتالىپ, بۇل قازىرگى قولدانىستاعى باعىتتارعا بالاما باعىت ەكەنىن اتاپ ءوتتى. قازاقستاندىق دەلەگاتسيا ازەربايجان رەسپۋبليكاسىنىڭ تسيفرلىق دامۋ جانە كولىك ءمينيسترى راشاد نابيەۆپەن دە كەزدەستى.
كەزدەسۋ بارىسىندا ءدالىز بويىنشا كولىك تاريفتەرىن بىرىزدەندىرۋ, ەكى ەل ارقىلى وتەتىن حالىقارالىق كولىك دالىزدەرىندە جۇك تاسىمالداۋ كولەمىن ۇلعايتۋ ءۇشىن كەدەندىك راسىمدەردى رەتتەستىرۋ ماسەلەلەرى تالقىلاندى.
ايماقتا بولىپ جاتقان قاقتىعىس وقيعالارى مەن گەوساياسي جاعدايدىڭ كۇردەلەنۋى جاڭا اقيقاتتى الدىمىزعا شىعاردى. قازىردىڭ وزىندە سۇرانىس ۇسىنىستان اسىپ كەتۋ قاۋپى تۋىندادى. اتالعان فاكتورلار نەگىزىندە جەتكىزۋ قۇنى دا, كۇتۋ ۋاقىتى دا ارتىپ, ونىڭ تۇتىنۋشىعا كەرى اسەرىن تيگىزەرى انىق. بۇل شىندىق ىنتىماقتاستىقتىڭ جاڭا شەڭبەرىن قاراستىرۋدى جانە ترانزيتتىك جانە كولىكتىك كوممۋنيكاتسيالاردى جاڭاشا قۇرۋدى تالاپ ەتەدى.
كەزدەسۋدە ازەربايجان مەن قازاقستاننىڭ گەوگرافيالىق ەرەكشەلىكتەرى - ولاردىڭ ەۋروپا مەن ازيانىڭ ءىرى ەكونوميكالىق ورتالىقتارىنىڭ اراسىندا ورنالاسۋى ەلدەر اراسىنداعى ءتيىمدى جانە جاقسى جولعا قويىلعان كولىك جەلىسىن قامتاماسىز ەتۋ ءۇشىن ناقتى العىشارتتار جاساعانى باسا ايتىلدى.
باكۋ-تبيليسي-كارس تەمىرجول جەلىسى قۇرىلىسىنىڭ اياقتالۋى, بۇل مارشرۋتتى دامىتۋعا قوسىمشا سەرپىن بەرمەك. ءبىر ناقتى ەسەپ, قىتايدان قازاقستان ارقىلى تۇركياعا تاۋار جەتكىزۋ مەرزىمىن 12 كۇنگە دەيىن قىسقارعانى سوعان دايەك.
ەكى جاقتى كەزدەسۋ ناتيجەسىندە «سامۇرىق-قازىنا» اق مەن ازەربايجان رەسپۋبليكاسىنىڭ تسيفرلىق دامۋ جانە كولىك مينيسترلىگى اراسىندا بىرلەسكەن كاسىپورىن قۇرۋ جانە كولىك-لوگيستيكالىق قىزمەتتى جۇزەگە اسىرۋ تۋرالى حاتتاماعا قول قويىلدى.
