رۋحانيات • 09 ناۋرىز، 2022

جەلتوقسان جەلى

قالا تىرشىلىگىنىڭ قىم-قۋىت سۇرگىنىندە ادامدارى ىعى-جىعى الىپ شاھاردىڭ قاي جۇرگىنشىسىنە نازار اۋدارعاندايسىڭ. ساپىرىلىسقان قالىڭ ءنوپىردىڭ اراسىمەن جىلعا-جىلعانى قۋالاپ جۇمىسقا كەلەسىڭ. كەشقۇرىم سول سوقپاقتى سولقىلداتىپ ۇيگە قايتاسىڭ.

ميراس اسان

بىراق ءبىر ىرعاق، ءبىر ۋاقىت، جاقىن-جاقىن ورنالاسقان جۇمىس ورىندارى، ۇقساس باعىتتار الگى قاراقۇرىم حالىقتى ءبىر-بىرىمەن جايلاپ جاقىنداستىرا باستايدى. ءتىپتى كەي ادامداردى ۋاقىت وتە كەلە، ودان سايىن تەرەڭدەپ تاني تۇسەسىڭ.

ءيا، ول جاندى مەن عانا ەمەس، تۇتاس شاھار بىلەتىن. بىلسە دە بىلمەگەندەي بولاتىن. ونىڭ كونەتوز قارا سۇر پالتوسىن، جالبىراعان شاشىن، قولىنان تاستامايتىن قىزىل ورامالىن، ەكىنشى قولىنداعى اۋىر سومكەسىن، اششى داۋىسىن ول قالا ەشقاشان جادىنان وشىرە الماس ەدى.

ول ءتىپتى شىلىڭگىر شىلدەنىڭ وزىندە سول قارا سۇر پالتوسىمەن جۇرەدى. اياعىندا وكشەسى الدەقاشان وپىرىلىپ قالعان جىرتىق قارا ەتىك. «مەن – جەلتوقسانشىمىن!» دەيدى انە ءبىر ادامدى توقتاتىپ! «سوندا كورگەن سۇمدىقتارىمدى ايتايىن با؟» دەيدى ەكىنشىسىن جۇلقىلاپ...

بىراق ونى تىڭداۋعا ەشكىمنىڭ زاۋقى دا، ق ۇلىعى دا، ۋاقىتى دا جوق. ول ءوز الەمىندە ءالى جەلتوقسان كوشەلەرىمەن كەتىپ بارا جاتقانداي بولاتىن. ونىڭ ءتىپتى شىجىعان جازدا دا قالىڭ پالتو كيىپ ءجۇرۋى جەلتوقسانداعى اياز قارىعان اق تۇتەك، قىزىل قاساپتى ەلەستەتەر ەدى. ول ادام ءۇشىن ۋاقىت سول 17-ءشى جەلتوقساندا الدەقاشان توقتاپ قالعان سياقتى. 1986 جىلعى 17-ءشى جەلتوقساندا...

ول ءتىپتى ءبىزدىڭ وتىز جىل بۇرىن تاۋەلسىزدىك الىپ، ەگەمەن ەل اتانعانىمىزدى دا بىلمەۋى مۇمكىن. ول سول ازات مەرەكەنى ءوزى الىپ بەرگەنىنەن دە بەيحابار بولۋى عاجاپ ەمەس.

قوعام تاريحتى تەلەديداردان بەرىلگەن، گازەت-جۋرنالدارعا شىققان، رەسمي تۇلعالار مالىمدەگەن اق-قاراسى تولىق انىقتالماعان اقيقات ارقىلى عانا تاني سالعىسى كەلىپ تۇرادى. قوعام قارا سۇر پالتولى ايەلدى ەشقاشان تانىعىسى كەلمەس ەدى. سەبەبى ول بار شىندىقتى ايتا سالۋى مۇمكىن. ءبىز بالكىم تولىق اقيقاتتى بىلۋگە قورقامىز. كىم بىلەدى، مۇمكىن ءالى دە دايىن ەمەسپىز. ول ايەلدى سوندىقتان دا ەلەمەي وتە سالعاندى جەڭىل كورەمىز.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز