قالالىق سوت ۇسىنعان مالىمەتكە قاراعاندا, 41 قىلمىستىق ءىس بويىنشا ۇكىم شىعارىلدى, تاعى 41-ءى قاراۋ ساتىسىندا.
«كەلىپ تۇسكەن قىلمىستىق ىستەردىڭ نەگىزگى بولىگى قر قك 188 - بابى 3-بولىگى «تۇرعىن ۇيگە, قىزمەتتىك نەمەسە وندىرىستىك ءۇي-جايعا, قويماعا نە كولىك قۇرالىنا زاڭسىز كىرۋ ارقىلى ۇرلىق جاساۋ» بويىنشا قارالادى», دەپ اتاپ ءوتتى الماتى قالالىق سوتىنىڭ ءباسپاسوز حاتشىسى اباي جارىلقاسىن.
ونىڭ ايتۋىنشا, ەڭ كوپ ءىس المالى جانە اۋەزوۆ قىلمىستىق سوتتارىنا تۇسكەن. ۇستالعاندار ءوز كىناسىن مويىنداپ, كەلتىرىلگەن ماتەريالدىق زالالدى ءوز ەركىمەن وتەيدى.
سونداي-اق, سوتتار كامەلەتكە تولماعان بالالاردىڭ نەمەسە قارت اتا-انالاردىڭ اسىراۋىنداعى كۇدىكتىلەردىڭ بولۋىن, ولاردىڭ كەيبىرەۋلەرىنىڭ ءبىرىنشى رەت قىلمىس جاساعانىن جانە جاعىمدى سيپاتتامالارىن ەسكەرىپ, پروباتسيالىق باقىلاۋ ورناتا وتىرىپ, ۇكىم شىعارادى.
كىنالىلەردىڭ كوپشىلىگى 2-دەن 4 جىلعا دەيىن باس بوستاندىعىن شەكتەۋگە, 100 ساعاتتىق ءماجبۇرلى جۇمىسقا سوتتالدى. ولاردىڭ كوپشىلىگى جاستار مەن جۇمىسسىزدار. ولار تۇرمىستىق تەحنيكانى, زاتتاردى, الكوگولدى ىشىمدىكتەردى, ۇيالى تەلەفونداردى, كومپيۋتەرلىك تەحنيكانى قولدى قىلعان.
