اباي اتىنداعى قازۇپۋ رەكتورى دارحان ءبىلالوۆ «الەۋمەتتىك ينكليۋزيۆتى باعدارلامالار ورتالىعى» قوعامدىق قورىنىڭ وكىلدەرىمەن كەزدەسىپ, ينكليۋزيۆتى ءبىلىم بەرۋ كادرلارىن, پەداگوگ-اسسيستەنت رەتىندە تيۋتورلاردى دايارلاۋداعى ىنتىماقتاستىق ماسەلەلەرىن تالقىلادى. وسى ورايدا بەلگىلى ءبىر ءبىلىم بەرۋ باعدارلامالارى بويىنشا ماماندانۋعا مۇمكىندىك بەرەتىن قوسىمشا كۋرستار وتكىزۋ, تيۋتورلاردى كاسىبي قايتا دايارلاۋ باعدارلاماسىن ىسكە اسىرۋ جانە ولاردىڭ جۇمىسىن ادىستەمەلىك سۇيەمەلدەۋ ماسەلەلەرى دە ماڭىزدى.
اباي ۋنيۆەرسيتەتىنىڭ الماتى قالاسى مەن ەلىمىزدىڭ ءبىلىم سالاسىنىڭ ناقتى ماسەلەلەرىن شەشۋگە باعىتتالعان بەلسەندى ۋنيۆەرسيتەت رەتىندەگى مىندەتتەرىنە توقتالعان رەكتور مەكتەپتەرمەن تىعىز جۇمىس جاساۋ, قازىرگى تاڭدا سۇرانىسقا يە كادرلاردى قايتا دايارلاۋ, سونداي-اق جۇمىس بەرۋشىلەرمەن جانە «ورلەۋ» ورتالىعىمەن ءوزارا بايلانىس ورناتۋ, ستۋدەنتتەردىڭ پراكتيكاسىن وتكىزۋ ماسەلەلەرى جايىندا ايتىپ ءوتتى.
ۋنيۆەرسيتەت رەكتورى سونىمەن بىرگە ءبىلىم الۋعا تەڭ قۇقىقتى جانە ونىڭ مۇمكىندىگى شەكتەۋلى بالالار ءۇشىن قولجەتىمدىلىگىن, ولاردى وقىتۋدىڭ قولايلى باعىتىن تاڭداۋدى قامتاماسىز ەتەتىن ينكليۋزيۆتى ءبىلىم بەرۋدى دامىتۋ ءۇشىن ىنتىماقتاستىققا دايىندىعى مەن پسيحولوگيالىق تەستىلەۋ قۇرالدارىن قولدانۋ قاجەتتىگىنە دە توقتالدى.
«وكىنىشكە قاراي, قازاقستاندا تيۋتورلاردىڭ كومەگىنە مۇقتاج بالالار سانى ارتىپ كەلەدى. ءبىز بۇعان دايىن بولۋىمىز كەرەك. ءاربىر بالا فيزيكالىق, ينتەللەكتۋالدىق, الەۋمەتتىك, ەموتسيونالدىق, تىلدىك جانە باسقا دا ەرەكشەلىكتەرىنە قاراماستان, ءبىلىم الىپ, ءبىزدىڭ قامقورلىعىمىزدى الۋى كەرەك», دەدى د.ءبىلالوۆ.
«الەۋمەتتىك ينكليۋزيۆتى باعدارلامالار ورتالىعى» قوعامدىق قورىنىڭ پرەزيدەنتى سالتانات مۋرزالينوۆا-ياكوۆلەۆا ورتالىقتىڭ قىزمەتى مەن پەداگوگ-تيۋتورلاردى قايتا دايارلاۋ قاجەتتىلىگىنە توقتالىپ, بىلىكتى كادرلار تاپشىلىعىن اتاپ ءوتتى. ونىڭ ايتۋىنشا, قازاقستاندا مۇنداي ماماندارعا دەگەن قاجەتتىلىك جىل سايىن ارتىپ كەلەدى.
كەزدەسۋگە قاتىسۋشىلار وسى ماڭىزدى سالاداعى ىنتىماقتاستىقتى نىعايتۋ جونىندە پىكىر الماستى.
