«وتكەن عاسىردىڭ 30-جىلدارىندا كورەي حالقىنىڭ باسىنا قانداي اۋىر تاۋقىمەت تۇسكەنىن ءبارىمىز بىلەمىز. كورەي ۇلتىنىڭ 100 مىڭعا جۋىق وكىلى قاقاعان قىستا جۇك ۆاگوندارىمەن ايدالاعا جەر اۋدارىلىپ كەلگەندە, كەڭپەيىل قازاق حالقى ولاردى جاتسىنباي باۋىرىنا باسىپ, قيىن-قىستاۋ زاماندا كومەك قولىن سوزعان ەدى. بۇگىن ءبىزدىڭ دوستىعىمىز بەن ىنتىماعىمىزدىڭ بەرىكتىگى – حالقىمىزدى بىرىكتىرەتىن ايتۋلى وقيعالاردى ەسكە الىپ, وتكەن تاريحتى جادىمىزدا ساقتاۋ. سوندىقتان جاڭا كومپوزيتسيانىڭ اشىلۋى ءبىزدىڭ قوعامنىڭ ومىرلىك كۇشى ىنتىماعىمىز بەن بىرلىگىمىزدە ەكەنىنىڭ تاعى دا ءبىر ايقىن دالەلى», دەدى مارات ءازىلحانوۆ.
قحا توراعاسىنىڭ ورىنباسارى اكتسيانىڭ باستاماشىلارىنا شىنايى العىسىن ءبىلدىرىپ «اقتوبە وبلىسىنىڭ كورەيلەر قاۋىمداستىعى» قوعامدىق بىرلەستىگىنىڭ توراعاسى ك.ۆ.تسحايعا «حالىق العىسى» مەدالىن تابىستادى. سونداي-اق جوعارى مارتەبەلى كورەيا ەلشىسى كۋ حونگ-سوك مىرزا مەن كونسۋل كيم ۆون يون حانىمعا ەكى ەلدىڭ دوستىعى مەن ىنتىماقتاستىعىن دامىتۋعا ءاردايىم اتسالىساتىندارى ءۇشىن ءوزىنىڭ ايرىقشا ءىلتيپاتىن جەتكىزدى.
اقتوبە وبلىسىنىڭ اكىمى و.ورازالين: «1930-1940-جىلدارداعى جاپپاي جەر اۋدارۋ كەزەڭىندە ءتۇرلى ەتنوس وكىلدەرى حالقىمىزدىڭ قوناقجايلىلىعىنىڭ ارقاسىندا قازاقستاندا باسپانا تاۋىپ, جاڭا ومىرگە قول جەتكىزدى. ەڭ سۇراپىل ايازدا قازاق حالقىنىڭ قونىس اۋدارۋشىلارعا دەگەن شىنايى قارىم-قاتىناسى ارقىلى جان دۇنيەلەرىنە جىلۋلىق سىيلادى. بۇگىنگى تاڭدا سول قيىن-قىستاۋ كەزەڭدە قولداۋ كورسەتكەن جەر مەن حالىققا العىس رەتىندە كورەي ەتنوسىنىڭ وكىلدەرى قازاق حالقىنا ءوزارا قۇرمەت, سەنىم, دوستىق پەن بارشا قازاقستاندىقتىڭ بىرلىگىنىڭ نىشانىن بەينەلەيتىن وسى جارقىن مۇسىندىك كومپوزيتسيا تۇرىندە شەكسىز قۇرمەت كورسەتتى», دەدى.
كۋ حونگ-سوك قۇتتىقتاۋ سوزىندە: «وسىدان 85 جىل بۇرىن ستالين ۇكىمەتىنىڭ بۇيرىعىمەن كورەيلەر قيىر شىعىستا پويىزعا وتىرعىزىلىپ قازاقستانعا كۇشتەپ قونىس اۋدارىلعان. سول كەزدە قازاقستان حالقى اشارشىلىق پەن شارۋاشىلىقتىڭ توقىراۋى سالدارىنان قيىن جاعدايدا بولعانىنا قاراماستان, كورەيلەرگە باسپانا, كيىم-كەشەك, ازىق-ت ۇلىك جاعىنان كومەك قولىن سوزىپ, ولاردى جاقىن كورشى, وتباسى مۇشەسى رەتىندە قارسى الدى. بۇل ەسكەرتكىشتىڭ اشىلۋ سالتاناتى سول قيلى زاماندا قازاق ەلىنىڭ كورەيلەرگە دەگەن ىنتىماقتاستىعىنىڭ اسقاق رۋحىن ەسكە الىپ, قۇرمەت كورسەتۋدىڭ بەلگىسى», دەدى.
«بۇل مۇسىندىك كومپوزيتسيا قازاق حالقىنىڭ جەر اۋدارىلعاندارعا دەگەن كەڭپەيىلدىگى مەن مەيىرىمدىلىگىن اشىپ كورسەتەدى», دەدى كونستانتين تسحاي قازاق ەلىنە شىنايى ريزاشىلىعىن بىلدىرە وتىرىپ.
اتالعان تۋىندى قازاق جانە كورەي ايەلدەرىنىڭ مۇسىنىنەن تۇرادى. دەپورتاتسيانىڭ قيىن كەزەڭىندە كورەي ۇلتىنىڭ مىڭداعان وكىلدەرىنىڭ امان قالۋىنا كومەكتەسكەن قازاقتاردىڭ قوناقجايلىعىنىڭ سيمۆولى رەتىندە قازاق ايەلى كورەي ايەلىنە قىمىز قۇيىلعان ىدىستى ۇسىنىپ تۇر. ايەلدەر وزدەرىنىڭ ۇلتتىق كيىمدەرىن كيگەن. كورەي ايەلىنىڭ ارقاسىندا بالا – بۇل كورەي ۇلتىنىڭ بالالاردى الىپ ءجۇرۋىنىڭ ءداستۇرلى ءتاسىلى. اق قۇستىڭ ايشىقتى قاناتتارى قازاق ۇلتىنىڭ سيمۆولى شاڭىراقتى ۇستاپ تۇر. ايەلدەردىڭ ارعى جاعىندا شاڭىراقتى ۇستاپ تۇرعان اق قۇستىڭ ايشىقتى قاناتى – قازاقتارعا ارنالعان ءۇيدىڭ نىشانى. شاڭىراق كۇندى بەينەلەيدى.
وسى كۇنى مارات ءازىلحانوۆ اقتوبە وبلىستىق قحا مۇشەلەرىمەن, ونىڭ قوعامدىق قۇرىلىمدارىمەن, ۇەۇ وكىلدەرىمەن جانە «جاستار اسسامبلەياسى» جاستار قاناتىمەن كەزدەسۋ وتكىزىپ, جالپىۇلتتىق بىرلىك پەن كەلىسىم, جاستاردىڭ بويىنداعى پاراساتتىلىق قۇندىلىقتاردى قالىپتاستىرۋ, قازاقستاندىق ءپاتريوتيزمدى دامىتۋ ماسەلەلەرى توڭىرەگىندە وي قوزعادى. وعان قوسا اسسامبلەيا جۇمىسىنىڭ جاڭا باعىتتارى بويىنشا ۇسىنىستار تالقىلاندى.
