سەزدە مەملەكەت باسشىسى Nur Otan پارتياسىنىڭ اتاۋىن Amanat دەپ وزگەرتۋدى قولدادى. «بۇل ەلىمىز ءۇشىن دە, ۇلتىمىز ءۇشىن دە ايرىقشا ءمانى بار كيەلى ۇعىم. ەگەمەندىگىمىز, ەلدىگىمىز بەن بىرلىگىمىز, كەڭ-بايتاق جەرىمىز بىزگە بابالاردان جەتكەن امانات. وسى قاستەرلى قۇندىلىقتارىمىزدى كوزدىڭ قاراشىعىنداي ساقتاپ, بولاشاققا ميراس ەتۋىمىز كەرەك. مەملەكەتتىلىك, ءداستۇر جالعاستىعى, ۇرپاق ساباقتاستىعى دەگەنىمىز – مىنە وسى. حالقىمىز ەشقاشان اماناتقا قيانات جاساماعان. پارتيا بۇل قاعيداتتى بەرىك ۇستانادى», دەدى قاسىم-جومارت توقاەۆ.
ەل پرەزيدەنتى: «Amanat – ورتاق ماعىناداعى تسەنتريستىك پارتيا. ول – ادىلدىك پارتياسى, حالىق بىرلىگى پارتياسى, العا قاراي نىق قادام باسۋ پارتياسى, حالىقتىڭ پىكىرى مەن ارمانىن تىڭدايتىن جانە ازاماتتارىمىزدىڭ مۇددەسى ءۇشىن ارەكەت ەتەتىن پارتيا», دەپ, پارتيانى جاڭعىرتۋعا ارنالعان بىرقاتار باسىمدىقتى اتاپ كورسەتتى. ولار: پارتيا اپپاراتىنىڭ تيىمدىلىگىن ارتتىرۋ, ءماجىلىس پەن ماسليحاتتارداعى فراكتسيا قىزمەتىن جانداندىرۋ, ازاماتتاردىڭ مۇددەلەرى مەن پارتيانىڭ اشىقتىعىن ارتتىرۋ, پارتياىشىلىك سايلاۋدى وتكىزۋ قۇرالدارىنىڭ اياسىن كەڭەيتۋ جانە اكىمدەر سايلاۋىنا بەلسەندى قاتىسۋ, ساياسي كادرلاردى دايارلاۋ. پرەزيدەنت بۇل ايتىلعانداردى بارىنشا قىسقا ۋاقىتتا جۇزەگە اسىرىپ, «دامۋدىڭ جاڭا كەزەڭىندە پارتياعا جاڭا تۇعىرناما قاجەت. بىراق نەگىزگى قۇندىلىقتارىمىز وزگەرمەۋگە ءتيىس», دەي وتىرىپ, ورتالىق اپپاراتقا جۇمىس توبىن قۇرىپ, پارتيانىڭ جاڭا تۇعىرناماسىن ازىرلەۋدى تاپسىردى.
سەزدە پارتيانى جاڭعىرتۋ بويىنشا جۇرگىزىلەتىن جۇمىستاردىڭ 7 باعىتى ايقىندالدى. ونىڭ ءبىرىنشىسى – حالىقپەن كەرى بايلانىس جاساۋ قۇرالدارىنىڭ تيىمدىلىگىن ارتتىرۋ. بۇل رەتتە پارتيانىڭ ورتالىق اپپاراتى مەن فيليالدارى جانىنداعى قوعامدىق كەڭەستەردىڭ سانى وڭتايلاندىرىلىپ, قۇرامى جاڭارتىلادى, قوعامدىق قابىلداۋ بولمەلەرىنىڭ جۇمىسى پرواكتيۆتى فورماتقا اۋىستىرىلادى. بۇگىنگى كۇنى قوعامدىق قابىلداۋ بولمەلەرى حالىقپەن ارالاسىپ, ولاردىڭ سۇرانىستارىن ورىنداۋعا باعىتتالعان ءتيىمدى تاسىلدەردىڭ ءبىرى بولىپ وتىر.
ەكىنشى باعىت – پارتيالاستار اراسىندا ىنتىماقتاستىقتى ارتتىرۋ. بۇل رەتتە باستاۋىش پارتيا ۇيىمدارىمەن (بپۇ) جۇمىس كۇشەيتىلەدى. بپۇ-لاردى ىرىلەندىرۋ, ولاردىڭ توراعالارىن باعالاۋ جۇيەسى مەن رەيتينگ ەنگىزىلەدى. سونىمەن قاتار جەرگىلىكتى جەردەگى ماسەلەلەردى شەشىپ, پارتيالىق جوبالاردى جۇزەگە اسىرۋ ءۇشىن پارتيا جارنالارىنىڭ 20%-ى بپۇ-عا قايتارىلادى. پارتيالاستارعا حالىقپەن جۇمىس جاساۋ داعدىلارى ۇيرەتىلەدى. بۇل رەتتە پارتيا توراعاسى ساياسي مەنەدجمەنت اكادەمياسىنىڭ جۇمىسىن ايتارلىقتاي كۇشەيتۋ تۋرالى تاپسىرما بەردى. باستاۋىش پارتيا ۇيىمدارى پارتيالاستاردىڭ ۇيىمشىلدىعىن ارتتىرۋ قۇرالىنا اينالادى.
ءۇشىنشىسى – پارتيانىڭ جۇمىسىندا اشىقتىقتى ارتتىرۋ. بۇل ءۇشىن بارلىق دەڭگەيدەگى ءماسليحاتتاردا دەپۋتاتتار قىزمەتىنىڭ رەيتينگ قورىتىندىلارى جاريالاناتىن بولادى. 2021 جىلى پارتيا دەپۋتاتتارىنىڭ رەيتينگى قاناتقاقتى جوبا رەتىندە جۇرگىزىلە باستاعان بولاتىن. سەزدە پارتيانىڭ اتقارۋشى حاتشىسى اسحات ورالوۆ جوبانىڭ سىناقتان وتكەنىن, ەندى ناتيجەسى جاريالاناتىنىن ايتتى. سونىمەن قاتار اشىقتىقتى ارتتىرۋ ءۇشىن پاريانىڭ ءموبيلدى قوسىمشاسى ىسكە قوسىلادى, TALQYLAU پىكىرتالاس الاڭقايى, پارتيانىڭ ءباسپاسوز ورتالىعى قۇرىلادى.
ءتورتىنشى باعىت رەتىندە پارتيالىق باقىلاۋدى كۇشەيتۋگە ءمان بەرىلەدى. بۇل رەتتە ورتالىق اپپارات ماجىلىستەگى پارتيا فراكتسياسىمەن جانە ۇكىمەتپەن بىرلەسىپ, سايلاۋالدى باعدارلامانىڭ ورىندالۋىن تەكسەرەدى جانە پارلامەنت ماجىلىسىندەگى فراكتسيا وتىرىسىندا پرەمەر-ءمينيستردىڭ قاتىسۋىمەن ۇكىمەتتىڭ ەسەبىن تىڭدايدى. ال ماسليحاتتارداعى فراكتسيا وتىرىستارىندا ايماقتىق فيليال توراعالارىنىڭ – اكىمدەردىڭ ەسەپتەرى تىڭدالادى. بۇل پارتيانىڭ ەلەكتورات الدىنداعى ۋادەلەرىن ورىنداۋ تالابىن ودان ءارى كۇشەيتەدى.
بەسىنشى باعىت بويىنشا پارتيانىڭ باعدارلامالىق قۇجاتتارى قايتا قارالاتىن بولادى. بۇل رەتتە پارتيانىڭ جارعىسىنا وزگەرىستەر ەنگىزىلەدى, 2030 جىلعا دەيىنگى «باقۋاتتى قوعام: ونجىلدىقتىڭ 10 ماقساتى» باعدارلاماسى جاڭارتىلادى, 2025 جىلعا دەيىنگى «سىبايلاس جەمقورلىققا قارسى ءىس-قيمىل باعدارلاماسى» قايتا قارالادى. وسىنىڭ نەگىزىندە پارتيا توراعاسىنىڭ تاپسىرماسىنا وراي نەگىزگى قۇندىلىقتارىمىزدى وزگەرتپەي, پارتيانىڭ جاڭا تۇعىرناماسى ازىرلەنەتىن بولادى.
التىنشى باعىت حالىقتىڭ ءار ءتۇرلى توپتارىمەن جۇمىس ىستەۋگە ارنالادى. وسى ۋاقىتقا دەيىن «ارداگەرلەردى ارداقتايىق», «باقىتتى وتباسى», «كەدەرگىسىز كەلەشەك», «ۇلتتىق مۇرا», «جاستار – وتانعا», «حالىققا كومەك» سىندى 6 پارتيالىق جوبا جۇزەگە اسىرىلىپ كەلەدى. الداعى ۋاقىتتا تازاLIKE, «الەۋمەت», «جاڭا قازاقستانعا ارنالعان 30 يننوۆاتسيالىق يدەيا» اتتى جاڭا جوبالار ىسكە قوسىلاتىن بولادى. اتالمىش جوبالار قوعامدىق كوڭىل كۇيدى سارالاۋ مەن الەۋمەتتىك شيەلەنىستىڭ ىقتيمال وشاقتارىن انىقتاۋعا, ساراپشىلار مەن بەلسەندى ازاماتتاردىڭ ۇسىنىستارىن جيناقتاۋعا باعىتتالادى.
سوڭعى جۇمىس باعىتى Jas Otan جاستار قاناتىنىڭ جۇمىسىن جەتىلدىرۋگە ارنالادى. بۇعان دەيىن سايلاۋ كەزىندە ايەلدەر مەن جاستارعا ارنالعان كۆوتا ەنگىزىلگەنى بەلگىلى, سونىڭ ناتيجەسىندە, 2021 جىلى سايلانعان دەپۋتاتتاردىڭ اراسىندا جاستاردىڭ ۇلەسى ارتتى. مەملەكەت باسشىسىنىڭ Jas Otan قاتارىنا پايدالى قوعامدىق قىزمەتپەن اينالىسۋعا دايىن, جاستار اراسىندا سەنىمگە يە كوشباسشىلاردى تارتۋ قاجەت دەگەن تاپسىرماسىنا وراي بەدەلدى جاس كوشباسشىلاردى ۇيىم قاتارىنا شاقىرۋ جۇمىسى جۇرگىزىلەدى. سونىمەن قاتار جاس دەپۋتاتتار كورپۋسىنىڭ قىزمەتىن جانداندىرۋ, Biz birgemiz جانە «ۆولونتەر مەكتەبى» ۆولونتەرلىك ۇيىمدارىن كەڭەيتۋ, اۋىل جاستارىنىڭ الەۋەتىن دامىتۋعا باعىتتالعان جاڭا «ورلەۋ» جوباسىن ىسكە قوسۋ, جاستاردى وتانسۇيگىشتىككە باۋليتىن «قايسار» اسكەري-پاتريوتتىق جوباسىن جۇزەگە اسىرۋ جۇمىستارى مەن كرەاتيۆتى جاس پارتيا مۇشەلەرىنىڭ الەۋەتىن ىسكە اسىرۋعا مۇمكىندىك بەرەتىن «پارتيانىڭ كونتەنت-فابريكاسى» جوباسى قولعا الىنادى. پارتيا قىزمەتىندە جاستاردىڭ, سونىڭ ىشىندە NEET ساناتىنداعى جاستاردىڭ پروبلەمالىق ماسەلەلەرىن, ولاردى الەۋمەتتەندىرۋ ءادىس-تاسىلدەرىن انىقتاۋ بويىنشا كەشەندى جۇمىستار جۇرگىزىلىپ جاتىر.
سەزدە سويلەگەن سوزىندە مەملەكەت باسشىسى ق.توقاەۆ ەل بىرلىگىن نىعايتىپ, جاڭا قازاقستاندى قۇرۋ بارىمىزگە ورتاق مىندەت ەكەنىن ايتتى. وسىناۋ اسقارالى مىندەتتى جۇزەگە اسىرۋ ءۇشىن ەل بولاشاعى جاستاردىڭ الەۋەتىن ارتتىرۋ – ۋاقىت تالابى. پارتيانىڭ باعىت-باعدارى ايقىندالدى, ەندى جاڭعىرتۋ جولىنداعى باسىمدىقتاردىڭ ورىندالۋىنا جاۋاپكەرشىلىكپەن ايانباي ەڭبەك ەتۋىمىز كەرەك!
ميرا بالتىموۆا,
اقتوبە قالالىق ءماسليحاتىنىڭ دەپۋتاتى
