بەلارۋس ورتالىق سايلاۋ كوميسسياسى رەفەرەندۋمدا سايلاۋشىلار تىزىمىنە ەنگەن ازاماتتاردىڭ 78 پايىزى داۋىس بەرگەنىن حابارلادى.
داۋىس بەرۋ بيۋللەتەنىندە ءبىر عانا سۇراق بولدى: ء«سىز بەلارۋس رەسپۋبليكاسىنىڭ كونستيتۋتسياسىنا ەنگىزىلگەن وزگەرىستەر مەن تولىقتىرۋلارعا كەلىسەسىز بە؟».
بەلارۋس ورتالىق سايلاۋ كوميسسياسى ەلدىڭ كونستيتۋتسياسىن وزگەرتۋدى سايلاۋشىلاردىڭ شامامەن 65 پايىزى قولداعانىن, ال 10 پايىزى بۇل وزگەرىسكە قارسى داۋىس بەرگەنىن حابارلادى.
كونستيتۋتسياعا ەنگىزىلگەن وزگەرىس بويىنشا ا.لۋكاشەنكونى قىلمىستىق قۋدالاۋعا رۇقسات بەرىلمەيدى جانە ونىڭ ودان ءارى پرەزيدەنت سايلاۋىنا ءتۇسىپ, ەلدى باسقارۋىن جالعاستىرۋعا مۇمكىندىك بەرەدى. ياعني تۇزەتۋگە سايكەس ول پرەزيدەنت رەتىندە جاساعان ارەكەتتەرى مەن شەشىمدەرى ءۇشىن جاۋاپقا تارتىلمايدى. ا.لۋكاشەنكو سونىمەن بىرگە بەلارۋس پارلامەنتىنىڭ جوعارعى پالاتاسىنىڭ تۇراقتى مۇشەسى بولادى.
بەلارۋس حالقى, سونداي-اق رەفەرەندۋم ارقىلى يادرولىق قارۋسىز ەل بولۋدان باس تارتتى. كەڭەس وداعى ىدىراعاننان كەيىن العاش رەت بەلارۋس جەرىنە يادرولىق قارۋلار قايتا ورنالاستىرىلۋى مۇمكىن.
باتىس ەلدەرى بەلارۋس ۇكىمەتىنىڭ ىشكى قارسىلاستارىنا قارسى ۇيىمداستىرعان جاپپاي قۋعىن-سۇرگىنمەن قاتار وتكىزىلگەن رەفەرەندۋمىنىڭ ناتيجەلەرىن مويىندامايتىنىن مالىمدەدى. جالپى, رەفەرەندۋمنىڭ رەسەيدىڭ ۋكراينا اۋماعىنا باسىپ كىرۋىمەن قاتار وتكەنى حالىقارالىق قوعامداستىقتىڭ نازارىن اۋدارتقانى راس.
ۋكراينانىڭ سولتۇستىگىنەن كىرگەن اسكەر بەلارۋس شەكاراسىنان كەلگەنى تۋرالى اقپارات بار. ا.لۋكاشەنكونىڭ بۇل ارەكەتىن قۇپتاماعان باتىس ەلدەرىنىڭ وكىلدەرى رەسەيمەن قاتار, بەلارۋسكە دە سانكتسيا سالىنۋى كەرەك دەگەن پىكىر ءبىلدىردى. بىرقاتار بەلارۋس شەنەۋنىگىنە قارسى سانكتسيالاردى ۇلىبريتانيا جاريالاي باستادى. ودان بولەك مەملەكەت باسقاراتىن قارجى ۇيىمدارى مەن بانكتەر دە نىساناعا الىنعان.
ەۋرووداق تا بۇل قادامنان قالىس قالمادى. سارسەنبىدە فرانتسيانىڭ ەو توراعالىعى سانكتسيالار بەلارۋس شەنەۋنىكتەرى مەن ەو-نىڭ رەسەيدىڭ ۋكرايناعا قارسى اگرەسسياسىنا قاتىسى بار اسكەري قىزمەتكەرلەرگە باعىتتالعانىن مالىمدەدى. ودان بولەك بەلارۋس ەكونوميكاسىنىڭ بەلگىلى ءبىر سالالارى, اتاپ ايتقاندا اعاش وڭدەۋ, مەتاللۋرگيا جانە باسقا ءوندىرىس ورىندارى شەكتەۋگە ىلىككەن.
وسىلايشا, كورشىلەس ۋكرايناداعى ءىرى داعدارىس كەزىندە وتكەن بەلارۋس رەفەرەندۋمى ەل كونستيتۋتسياسىنا بىرقاتار تۇزەتۋ ەنگىزۋگە مۇمكىندىك بەردى.
