– مەملەكەت باسشىسى قاسىم-جومارت توقاەۆ «حالىق ۇنىنە قۇلاق اساتىن مەملەكەت» تۇجىرىمداماسىن ۇسىنعان ەدى. بۇل رەتتە ءبىزدىڭ ينستيتۋت الەۋمەتتانۋلىق زەرتتەۋلەر جۇرگىزۋ ارقىلى اتالعان تۇجىرىمدامانىڭ جۇزەگە اسۋىنا بارىنشا ۇلەس قوسىپ وتىر. مۇنداي زەرتتەۋلەر بىرنەشە جىل قاتارىنان قولعا الىنىپ كەلەدى. بيىل ءبىز زەرتتەۋ ناتيجەسىن تانىستىرۋ ماقساتىندا «قوعام كەلبەتى» جوباسىن قولعا الدىق. بۇگىنگى ءىس-شارا – سول اۋقىمدى جوبانىڭ باستاماسى دەپ بىلىڭىزدەر, – دەدى اتالعان ينستيتۋت ديرەكتورىنىڭ ورىنباسارى الۋا جولدىبالينا.
بۇل الەۋمەتتانۋلىق زەرتتەۋلەر اقپاننىڭ 7-18 كۇندەرى ارالىعىندا ءوتىپ, وعان باس-اياعى 6 800 رەسپوندەنت قاتىستى. 18 جاستان اسقان ءاربىر قازاقستاندىق ازاماتتىڭ زەرتتەۋگە قاتىسۋ مۇمكىندىگىن ارتتىرۋ ماقساتىندا زەرتتەۋ ادىستەمەسى بويىنشا كوپ ساتىلى ستراتيفيكاتسيالىق ىرىكتەمە ءتۇرى قولدانىلدى. ينستيتۋتتىڭ الەۋمەتتانۋلىق زەرتتەۋلەر ءبولىمىنىڭ باسشىسى جاننا كارىموۆا وسىلاي دەپ وتىر.
– ءۇي شارۋاشىلىعىنداعى ءاربىر رەسپوندەنت كۆوتا بويىنشا جاسى, جىنىسى جانە ۇلتى بويىنشا ىرىكتەلدى. ساۋالداما face-to-face (بەتپە-بەت) سۇحبات فورماتىندا جۇرگىزىلدى. زەرتتەۋ بارىسىندا ەلىمىزدىڭ 17 وڭىرىندەگى 185 قالالىق جانە اۋىلدىق ەلدى مەكەننىڭ تۇرعىندارى قاتىستى. ىرىكتەمە وڭىرلەردەگى حالىق سانىنا قاراي پروپورتسيونالدى ەسەپتەلدى. رەسپوندەنتتەردىڭ الەۋمەتتىك-دەموگرافيالىق سيپاتتامالارىنا نازار اۋداراتىن بولساق, ىرىكتەمە كولەمىندە قازاقستانىڭ ەرەسەك تۇرعىندارىنىڭ نەگىزگى پارامەترلەرى ساقتالعانىنا كوز جەتكىزۋگە بولادى. وسىلايشا, 6 800 رەسپوندەنتتىڭ 60,4%-ى قالا تۇرعىندارى بولسا, قالعان 39,6%-ى – اۋىل ازاماتتارى. سونىڭ 55,4%-ى – ايەلدەر, ال 44,6%-ى – ەر زاماتتار. ۇلتتىق قۇرامى بويىنشا ىرىكتەمە جالپى رەسپۋبليكالىق كورسەتكىشتەرگە سايكەس كەلەدى, – دەدى ءبولىم باسشىسى.
ج.كارىموۆانىڭ ايتۋىنشا, زەرتتەۋدىڭ نەگىزگى ناتيجەلەرىنە ءمان بەرگەن ءجون. ماسەلەن, حالىقتىڭ ءوز ءومىرى مەن ءارتۇرلى اسپەكتىگە قاناعاتتانۋ دەڭگەيىن انىقتاۋ ماقساتىندا رەسپوندەنتتەرگە بىرقاتار سۇراق قويىلىپتى.
– زەرتتەۋ ناتيجەسىندە رەسپوندەنتتەردىڭ 65,5%-ى تاۋارلار مەن قىزمەتتەردىڭ باعاسىنا, 53,2%-ى ءوز ەلدى مەكەنىنىڭ ەكولوگيالىق احۋالىنا, 51,7%-ى جول ساپاسىنا, 45,6%-ى مەديتسينالىق قىزمەت كورسەتۋ ساپاسىنا جانە 44,7%-ى كىرىس دەڭگەيىنە قاناعاتتانبايتىنى انىقتالدى. كەيىنگى 9 اي كولەمىندەگى وزگەرىستەرگە زەر سالاتىن بولساق, بارلىق پوزيتسيا بويىنشا قاناعاتتانباۋشىلىق ارتقانىن بايقاپ وتىرمىز. وسىلايشا, 2021 جىلعى ماۋسىم ايىمەن سالىستىرعاندا باعا دەڭگەيىمەن قاناعاتتانباۋ كورسەتكىشى 4,4%-عا, مەديتسينالىق قىزمەت ساپاسىمەن قاناعاتتانباۋشىلىق 7,5%-عا, ەكولوگيالىق احۋالعا كوڭىل تولماۋشىلىق 13,1%-عا ارتتى, – دەدى ج.كارىموۆا.
وڭىرلەردەگى ناتيجەگە كوز جۇگىرتسەك, اسىرەسە باتىس قازاقستان وبلىسىندا 86,6% رەسپوندەنت تاراپىنان, اقمولا وبلىسىندا 81,8% رەسپوندەنتتەن, اتىراۋ وبلىسىندا 78,9% رەسپوندەنت تاراپىنان ازىق-ت ۇلىك باعالارى مەن قىزمەت باعالارىنا الاڭداۋشىلىق بايقالادى. ەكولوگيالىق احۋالعا كوڭىلى تولمايتىن رەسپوندەنتتەردىڭ سالماقتى ۇلەسى 4 وڭىردە تىركەلىپ وتىر: نۇر-سۇلتان قالاسىندا – 66,6%, الماتى قالاسىندا – 58,9%, پاۆلودار وبلىسىندا – 68% جانە قاراعاندى وبلىسىندا – 66,4%.
– رەسپوندەنتتەردىڭ جارتىسىنان كوبىسى, ياعني 60,9%-ى مەملەكەت حالىق ۇنىنە قۇلاق اسادى دەپ وتىر. سونىمەن قاتار ساۋالداماعا قاتىسقان ازاماتتاردىڭ 33%-ى كەرىسىنشە, مەملەكەت ءوز ازاماتتارىنىڭ ۇنىنە قۇلاق اسپايدى, بۇگىندە بۇل قاعيدات قازاقستاننىڭ كەيبىر ايماقتارىندا تولىققاندى جۇمىس ىستەمەيدى دەگەن پىكىردە. الايدا 2021 جىلعى ماۋسىم ايىنداعى دەرەكتەرمەن سالىستىراتىن بولساق, مۇنداي كوزقاراستاعى رەسپوندەنتتەردىڭ ۇلەسى ازايدى. وڭ باعانى كوبىنەسە اۋىل تۇرعىندارى, تابىسى جوعارى ازاماتتار بەرىپ وتىر. قالا تۇرعىندارى, تابىسى تومەن جانە ورتاشا تومەن تابىسى بار ازاماتتار بۇل قاعيداتتىڭ جۇمىس ىستەۋىن تەرىس باعالاۋدا, – دەدى ا.جولدىبالينا.
