پرەزيدەنت ەندى قوعام دا, ادام دا بۇرىنعىداي ءومىر سۇرە المايتىنىن باعامدادى. سوندىقتان دا قازاقستاندى جاڭعىرتۋ جولىن تاڭدادى. بۇل نە؟ قانداي باعىت؟ بۇل تۋرالى سوڭعى جىلدارى ەكونوميكادا ساياسي رەفورما تۇرعىسىندا جاسالعان العاشقى قادامداردى ايتساق تا جەتكىلىكتى. اۋىل اكىمدەرىنىڭ سايلاۋى ءوتتى, ساياسي پارتيالاردىڭ ءرولىن كوتەرۋگە باعىتتالعان زاڭنامالىق قادامدار دا جاسالدى. ەندى اۋدان اكىمدەرى سايلاناتىن بولادى. كولەڭكەلى ەكونوميكامەن كۇرەس, كوررۋپتسيانى قۇرىقتاۋ, ءادىل قوعام قۇرۋ ماقساتى دا قويىلدى. مىنە, وسى جولدا مەملەكەت باسشىسى جاڭا باعىت, جاڭا جول تاڭدادى.
ىشكى جانە سىرتقى ەكسترەميستىك, تەرروريستىك, لاڭكەستىك ارەكەتتەردىڭ سەبەبىنەن قازاقستاننىڭ بۇرىنعىداي ءومىر سۇرە المايتىنى بەلگىلى. قازىرگى قالىپتاسقان جاعدايعا قاراي, پارتيا توراعاسى Nur Otan پارتياسىنىڭ كەزەكتەن تىس سەزىن شاقىردى.
پرەزيدەنت جاڭا قازاقستان – جاڭا قوعام تۇجىرىمداماسىن ۇسىندى.
Nur Otan پارتياسىنىڭ كەزەكتەن تىس سەزى ونلاين فورماتتا ءوتتى. وعان رەسپۋبليكامىزدىڭ بارلىق وڭىرىنەن 399 دەلەگات قاتىستى. كۇن تارتىبىندە ەكى ماسەلە قويىلدى. پارتيا ساياسي كەڭەسىنىڭ قۇرامىنا وزگەرىس ەنگىزىلدى. پارتيانى مودەرنيزاتسيالاۋ ماسەلەسى قارالدى. مەملەكەت باسشىسى پارتيا ءوزىنىڭ تاريحي ميسسياسىن ورىنداعانىن اتاپ ءوتتى. ەندى پارتيانىڭ اتى Amanat دەپ وزگەرتىلدى. بۇل ءسوزدىڭ استارى مەن مازمۇنى تەرەڭ. امانات – حالىق سەنىمى, قوعام تىرەگى, جاۋاپكەرشىلىك پەن ادىلەتتىلىك كەپىلى. ەندى پارتيانىڭ اتى عانا وزگەرىپ قويماي, ونىڭ جۇمىس ىستەۋ تاسىلدەرى دە جاڭعىرادى. پارتيا مەن حالىقتىڭ بىرلىگى جاقىندايدى. ول قوعامدىق وزگەرىستەردىڭ, بولاشاقتا جۇرگىزىلەتىن بارلىق جۇيەلىك وزگەرىستەردىڭ باسىندا تۇراتىن جاڭا پارتيا بولماق. «...زامان, قوعام, ادام وزگەرىپ جاتقاندا پارتيانىڭ وزگەرۋى زاڭدىلىق. ...ساياسي ۇيىمنىڭ اتاۋىن امانات دەپ وزگەرتۋ ۇسىنىلدى. جاسىراتىن ەشتەڭە جوق. مەن دە بۇل ماسەلەگە قاتىستى پىكىرتالاسقا قاتىستىم. بىرنەشە ۇسىنىس بولدى. سونىڭ ىشىندە امانات دەگەن اتاۋعا توقتادىق», دەدى پرەزيدەنت ءوز سوزىندە.
ءيا, ەندى ول ۇلتتىق قۇندىلىقتاردى دامىتۋعا نەگىزدەلگەن پارتيا بولماق.
ارينە, الەمدى الاڭداتىپ وتىرعان ماسەلە: رەسەي-ۋكراينا قارىم-قاتىناسى مەن سوعىسى. پارتيا سەزىندە مەملەكەت باسشىسى بۇل تاقىرىپتى اينالىپ وتكەن جوق. ء«بىز ەكى مەملەكەتتى كەلىسسوز ۇستەلىندە ورتاق ءتىل تابىسۋعا, ۋاعدالاستىق پەن كەلىسىمگە كەلۋگە شاقىرامىز. باسقا جول جوق», دەدى ق.توقاەۆ.
سەزدە كوتەرىلگەن ماسەلەلەردىڭ ءبىرى ماسليحاتتارداعى پارتيا دەپۋتاتتارىنىڭ رەيتينگىسىن كوپشىلىككە جاريا ەتۋ باعىتى بولدى. جاڭا قازاقستان بولاشاعى ۇلت پەن مەملەكەت تاعدىرىن شەشەتىن بەتبۇرىس بولاتىنى سەزدە اتاپ ءوتىلدى.
ەۋروپا مەن باتىستىڭ رەسەي تاراپىنا سالىپ جاتقان سانكتسيالارى قازاقستانعا اسەر ەتپەي قويمايدى. بۇل ماسەلەنى مەملەكەت باسشىسى پارتيانىڭ سەزىندە اشىق ايتتى. ول قازاقستان ەكونوميكاسى سانكتسيا جاعدايىنداعى قيىندىقتارعا دايىن بولۋى قاجەت دەپ ەسكەرتتى. داعدارىس جاعدايىنا قاراماستان قازاقستان قيىندىقتاردان قينالماي وتۋگە ءتيىس ەكەنىن مالىمدەدى. وسىعان وراي ۇكىمەتكە ناقتى تاپسىرمالار بەرىلگەندىگىن اتاپ ءوتتى.
بىرلىك بار جەردە تىرلىك بولاتىنى بەلگىلى. پرەزيدەنتتىڭ ويىنشا, قيىندىقتاردى ازايتپاي دا, كوبەيتپەي دە بىرلەسە جۇمىس ىستەگەندە عانا ونى جەڭۋگە بولادى.
ارينە, ەل مەن جەر ماسەلەسى ۇلكەن ەكونوميكالىق, ساياسي جانە رۋحاني وزگەرىستەردى تالاپ ەتەدى. اۋىلدى كوتەرۋ, جاستاردى اۋىلعا تۇراقتاندىرۋ – پراگماتيكالىق ساياسي ماسەلە. سوندىقتان دا سەزدە اۋىل جاستارىنا ارنالعان «ورلەۋ» جاڭا پارتيالىق جوباسى ۇسىنىلدى. بۇل – شىنىندا دا نازار اۋدارارلىق جاڭا باعىت. پارتيانىڭ جارعىسىنا ءتيىستى وزگەرتۋلەر جاسالادى. بۇل – زامان تالابى. سونداي-اق 2030 جىلعا دەيىنگى «باقۋاتتى قوعام: 10 جىلدىقتىڭ 10 ماقساتى» جانە «2025 جىلعا دەيىنگى جەمقورلىققا قارسى ءىس-قيمىلدار» باعدارلاماسى دا جاڭعىرىپ, جاڭا تۇرپاتتا مودەرنيزاتسيادان وتەتىن بولادى. جالپى, پارتيانىڭ بۇل سەزى حالىقتىڭ كۇتكەن ماسەلەلەرىن كوتەردى عوي دەپ ويلايمىن.
باقىتجان جۇماعۇلوۆ,
سەنات دەپۋتاتى
