«جەدەل-تەرگەۋ توپتارىنىڭ وندىرىسىندە سوتقا دەيىنگى 3 666 تەرگەپ-تەكسەرۋ ءىسى بار. تەرروريزم اكتىلەرى مەن جاپپاي تارتىپسىزدىكتەر تۋرالى ىستەردەن باسقا, توناۋ, ۇرلىق, قارۋدى ۇرلاۋ, قۇقىق قورعاۋ ورگاندارىنىڭ قىزمەتكەرلەرىنە كۇش قولدانۋ فاكتىلەرى تەرگەلۋدە. اتالعان ساناتتان 162 ايىپتالۋشىعا قاتىستى 101 قىلمىستىق ءىس سوتقا جولداندى. 62 ادام سوتتالدى», دەدى ە.قيلىمجانوۆ ورتالىق كوممۋنيكاتسيالار قىزمەتىندە وتكەن بريفينگ بارىسىندا.
جاپپاي تارتىپسىزدىك كەزىندە 4 مىڭنان استام ادام ءتۇرلى دەنە جاراقاتتارىن العان. ولاردىڭ ىشىندە 2402 پوليتسيا قىزمەتكەرلەرى, 990 قوعامدىق ءتارتىپتى قامتاماسىز ەتۋگە تارتىلعان اسكەري قىزمەتشىلەر بار.
«قۇقىق قورعاۋ ورگاندارى قىلمىسقا قاتىسقانداردى انىقتاۋ جانە جاۋاپقا تارتۋ بويىنشا بارلىق قاجەتتى شارالاردى اتقارۋدا. اقتوبە قالاسىندا ۇيالى تەلەفون بەينەجازباسىنىڭ ارقاسىندا ي. ەسىمدى ازاماتتىڭ 5 قاڭتاردا ۆاز-21014 اۆتوكولىگىن باسقارىپ, وبلىس اكىمدىگى الدىندا پوليتسەيلەردى ۇلكەن جىلدامدىقپەن سوققانى انىقتالدى. ناتيجەسىندە 4 پوليتسەي دەنە جاراقاتتارىمەن اۋرۋحاناعا جاتقىزىلدى. پوليتسيا قىزمەتكەرلەرىنىڭ ومىرىنە قولسۇعۋشىلىق ارەكەتى ءۇشىن بۇل تۇرعىن سوت سانكتسياسىمەن قاماۋعا الىندى. سونىمەن قاتار ت. جانە ي. ەسىمدى تۇرعىندار دۋبينكالاردى پايدالانىپ, الماتى قالاسى اكىمدىگىنىڭ الدىندا پوليتسيا قىزمەتكەرىن قاتتى سوققىعا جىققان. اتالعان ادامدار قاماۋدا وتىر», دەدى ەلدوس قيلىمجانوۆ.
